پاکستان ءَ ایران ءُ امریکہ ءِ جیڈھ ءَ امن ءِ واستہ ھاسیں کرد پیلو کتگ، آبنائے ہرمز ءِ پچ کنگ ءَ چہ توان ءِ رسگ ءُ نھاد گہتر بنت، سینیٹر شیری رحمان

اسلام آباد۔15جون  (اے پی پی): پاکستان پیپلز پارٹی ءِ نائب صدر سینیٹر شیری رحمان ءَ گوشت کہ من سرجمیں راج ءَ را مرچیگیں سربلندیں روچ ءِ سر ءَ مبارک بات دیان آں، پاکستان ءَ ایران ءُ امریکہ ءِ جیڈھ ءِ تہ ءَ امن ءِ واستہ ھاسیں کرد پیلو کتگ، آبنائے ہرمز ءِ پچ کنگ ءَ چہ توان ءِ رسگ ءُ نرخ آنی تہ ءَ گہتری کیت، غربت ءِ تہ ءَ راج ءِ نرخ آنی تہ ءَ گہتری کیت۔ دوشمبے ءِ روچ ءَ سینیٹ ءِ دیوان ءَ تران کنان ءَ آئی ءَ گوشت کہ مزن وزیر شہباز شریف ءَ صدر آصف زرداری، فیلڈ مارشل عاصم منیر، چیئرمین بلاول بھٹو ءُ سروکی ءِ شگر ءُ منت گپت۔ آئی ءَ گوشت کہ ایران ءُ امریکہ ءِ جیڈھ ءَ امن ءِ واستہ پاکستان ءَ ھاسیں کرد پیلو کتگ، سرجمیں دگنیا ءَ چہ پاکستان ءِ سفارتی کوشست آنی ستا کنگ بوھگ ءَ اِنت، منی دعا اِنت کہ جمعہ ءِ روچ ءَ ایران ءُ امریکہ ءِ منوگر ءِ سر ءَ دستخط کنگ بہ بیت، اسرائیل جنگ بندی ءِ کوشست آناں ناکام کنگ لوٹ اِتگ بلے سوبمند نہ بوتگ، پاکستان ءَ نا ممکنیں کار side channel ءِ وسیلگ ءَ ممکن کتگ۔ شیری رحمان ءَ گوشت کہ آبنائے ہرمز ءِ پچ کنگ ءَ توان ءِ رسگ ءُ نرخ آنی تہ ءَ گہتری کیت، گریب ءِ آماچیں الس ءَ را جھان ءِ نرخ آنی تہ ءَ کمی ءَ چہ ریلیف رس ایت، میان اُستمانی ءُ مظلوم آناں 1.8 کھرب کلدار ءِ بجٹ ءَ ریلیف رس ایت۔ آئی ءَ گوشت کہ پٹرولیم لیوی موقتی رنگ ءَ ایر کنگ بوتگ، ایشی ءَ مُدام گیش کنگ مہ بیت، لیوی ءُ ٹیکس ءِ نیام ءَ فرق است، لیوی ءِ زرّ صوبگ آنی تہ ءَ ٹرانسفر کنگ نہ بنت۔ آئی ءَ گوشت کہ جان سلامتی، وانگ ءُ زانگ ءُ چاگردی شوبگ آنی سر ءَ ھرچ ءُ درچ ءِ ذمہ واری صوبگ آنی سر ءَ اِنت، ٹیکس آناں لیویز ءِ تہ ءَ بدل کنگ ءَ چہ صوبگ آنی مالیاتی وسیلگ آناں محدود بوھگ ءَ اِنت، پٹرولیم لیوی اصل ءَ سیلز ٹیکس ءِ رنگ ءَ اِنت بلے ایشی ءَ را مدام گیش کنگ بوھگ ءَ اِنت، کاربن لیوی ءِ بدل ءَ کاربن ٹیکس ءِ سر ءَ عمل کنگ بوتگ۔ پی ایس ڈی پی کم کنگ بوتگ ءُ صوبہ آنی تہ ءَ کمی کنگ بوتگ، صوبائی وسیلگ آنی تہ ءَ کمی ءِ سبب ءَ دیمروئی ءُ چاگردی پروگرام آماچ بوھگ ءَ اَنت، راجی سلامتی ءُ دفاعی بجٹ ءِ ضلورت آناں رد کنگ نہ بیت۔ آئی ءَ گوشت کہ ٹیکس نیٹ ءَ را گیش کنگ بہ بیت تانکہ تجارت ءُ سروس سیکٹر آناں ٹیکس نیٹ ءِ تہ ءَ آرگ بہ بیت، پاکستان ءَ را ٹیکس ءِ تہ ءَ گیشی ءِ سک باز ضلورت اِنت، سروسز سیکٹر ءَ ایف بی آر ءَ چہ صوبہ جوانیں کارکردگی پیش دارگ ءَ اَنت، بجٹ ءِ تہ ءَ 42.8درسد وام آنی سر ءَ سود دیگ بوھگ ءَ اِنت۔ آئی ءَ گوشت کہ زالبول آنی پیڈ ءُ زھگ ءِ دارگ ءِ چیز آنی سر ءَ سیلز ٹیکس ءِ ھلاسی ءَ را وش اتک کنگ بیت، ملک ءَ بے روزگاری ءِ شرح 7درسد اِنت، وفاقی حکومت وتی ھرچ ءُ درچ ءَ را مزنیں کساس ءَ کم کنگ لوٹ ایت۔ وفاقی حکومت ءِ ھرچ ءُ درچ پی ایس ڈی پی ءَ چہ گیش اِنت، سرکاری ادارگ آنی واستہ 451ارب کلدار ایر کنگ بوتگ، مالی سال 2025 ءَ سرکاری ادارگ آنی تاوان 832.8ارب کلدار بوتگ، سرکاری ادارگ آنی کلیں ھرچ ءُ درچ 6.563کرب کلدار بوتگ۔ آئی ءَ گوشت کہ موسمی بدلی یک انچیں راستی یے کہ ایشی ءِ سبب ءَ وسیلگ آنی سک باز کمی بوھگ ءَ اِنت، موسمی بدلی ءِ نام ءَ لیویز زورگ بوھگ ءَ اِنت، بلے اے زرّ ھما وڑ ءَ کارمرد کنگ نہ بوھگ ءَ اَنت، موسمیاتی بجٹ ءِ تہ ءَ کمی جیڑھ ءِ سبب اِنت، پاکستان نوں کپاس، گندم ءُ شکر درآمد کنگ ءَ اِنت، اے ھما سامان اَنت کہ پاکستان ءَ گیشتر کارمرز کن اَنت شدید آؤکیں وھد ءَ درآمد ءِ نام ءَ وصولی ءِ گیش کنگ ءِ بدل ءَ استان آنی مالی حق آنی رکھینگ بہ بیت۔ آئی ءَ گوشت کہ صوبگ آناں وسیلگ پجاری کنگ ءَ ابید جان سلامتی، وانگ ءُ زانگ ءُ وشھالی ءِ مول ءُ مراد پیلو کنگ نہ بنت، آیوکیں بجٹ ءَ چہ پیسر جنوری ءَ چہ درستیں اسٹیک ہولڈر آنی گوما مشورہ کنگ بہ بیت۔