دنیا ءِ کرکٹ ءِ تہا ترندیں بدلی ءِ دیم ءَ ٹیسٹ ءُ ٹی ٹوئنٹی کرکٹ ءِ گوازی کنوکیں کھڈکارانی یکیں پیمانہ ءِ سرا ارزشت دیگ ءِ ھاتر ءَ نوں ھچ وڑیں ھکّ نیست، محسن نقوی

لاہور۔15جون  (اے پی پی): پاکستان کرکٹ بورڈ ءِ چیئرمین سید محسن نقوی ءِ سروکی ءَ کرکٹر آنی واستہ مرکزی کنٹریکٹ آنی نظام ءِ تہ ءَ انقلابی بدلی آنی جار جتگ ءُ یک نوکیں ءُ منفردیں ڈھانچے ءِ دیم ءَ آرگ ءِ پیسلہ کتگ، ایشی ءِ مول ءُ مراد ایش اِنت کہ آ وتی جتا جتائیں فارمیٹ آنی لوٹ ءُ گزر آنی رد ءَ موہ ءُ ترغیب دیگ بہ بنت۔ پی سی بی ءِ چیئرمین محسن نقوی ءَ عاقب جاوید ءُ ایندگر حکام ءِ گوما پی سی ہوٹل لاہور ءَ پریس کانفرنس ءَ گوں تران کنان ءَ گوشت کہ جھان ءِ کرکٹ ءِ تہ ءَ ترندیں بدلی آنی رد ءَ ٹیسٹ ءُ ٹی ٹوئنٹی کرکٹ ءِ گوازی کنوکیں کھڈکار آناں یکیں پیمانہ ءِ سر ءَ ارزشت دیگ نوں ھچ وڑ ءَ جوان نہ اِنت۔ ہمے سبب انت کہ یک نظام ءِ پالیسی ءَ پہ درستاں یلہ دئیگ ءَ یک انچیں چارچوبے جوڑ کنگ بوتگ کہ آ ہر فارمیٹ ءِ جتا جتائیں پجار، اهمیت ءُ لوٹاں منّیت۔ نوکیں نظام ءِ رد ءَ ہر مرکزی منوگر کتگیں کھڈکار ءَ را یک خاصیں فارمیٹ ءِ راہ ءَ گوں بندوک کنگ بیت، ایشی ءِ تہا ریڈ بال ءُ وائٹ بال کرکٹ ءِ واستہ جتا جتائیں راہ بنت۔ کھلاڑی ءِ نیمگ ءَ گچین کتگیں راہ آئی ءِ ذمہ واری، توقعات ءُ مراعات ءِ تعین کنت۔ آئی ءَ گوشت کہ پی سی بی ءَ ٹیسٹ کرکٹ ءَ گوں سیادی داروکیں کھڈکار آنی واستہ گیشیں مراعات ءُ رکھینگ ءِ پیسلہ کتگ، وھدیکہ وائٹ بال ءُ ٹی ٹوئنٹی ءِ ھاسیں کرکٹر آناں ھاسیں رکھینگ دیگ بوتگ۔ کوھنیں نظام ءِ تہا اے، بی، سی ءُ ڈی ءِ زمرہ ءِ جاہ ءَ نوں پنچ فارمیٹ ٹریک ءِ دیم ءَ آرگ بیت۔ ٹریک اے بی ءَ ٹیسٹ ءُ ون ڈے کرکٹ ءِ نامداریں کھڈکار ھوار بنت ءُ ٹریک اے ءَ ریڈ بال ءِ ماہرین آنی واستہ ھوار کنگ بیت۔ ٹریک بی سی ءِ تہا ون ڈے انٹرنیشنل ءُ ٹی ٹوئنٹی انٹرنیشنل ءِ ماہریں کھڈکار ھوار بنت وھدے کہ ٹریک ڈی شارٹ فارمیٹ ءُ فرنچائز کرکٹ ءِ ماہریں کھڈکارانی واستہ ریزرو انت۔ پی سی بی ءِ رد ءَ ھر یک کھڈکارے ءِ مقابلہ ایوک ءَ وتی وتی ٹریک ءِ کھڈکاراں گوں کنگ بیت ءُ ھر ٹریک ءِ کارکردگی ءِ بنیاد ءَ پروموشن یا ڈیموشن ءِ موہ ھست بنت۔ آئی ءَ گوشت کہ نوکیں نظام ءِ یک کلیدی لیکہ ایش انت کہ پاکستان ءِ ٹیسٹ اسپیشلسٹ کرکٹر آناں اولی رند ءَ دگنیا ءِ مزنیں اولی درجہ ءِ ریڈ بال لیگ آنی تہ ءَ بھر زوری ءِ اجازت دیگ بیت تانکہ آ یک گرانیں مقابلہ ءِ چاگرد ءَ گیش تجربگ ءِ ھاترا جھد بہ کن انت۔ البت اے کھڈکاراں ٹی ٹوئنٹی فرنچائز لیگ ءَ بہر زورگ ءِ اجازت نہ دیگ بیت۔ پی سی بی ءِ چیئرمین ءَ گوشت کہ نوکیں نظام ءِ رد ءَ کرکٹر آناں میڈیکل ءُ فٹنس ٹیسٹ کنگ لوٹ ایت، ملکی کرکٹ ءَ سرگرم بھر زوری کنگ ءُ مرکزی کنٹریکٹ ءِ گرگ ءِ واستہ کارکردگی ءِ سرجمیں چار ءُ تپاسی کنگ لوٹ ایت۔ بورڈ ءِ رد ءَ اے فریم ورک ءَ چہ مرکزی منوگر ءِ نظام ءَ را گیش شفاف، منصفانہ ءُ احتساب جوڑ کنگ بیت، وھدیکہ وتی مہارت ءُ عزم ءِ رد ءَ درستیں فارمیٹ آنی تہ ءَ کھڈکار آناں دیمروئی ءِ واستہ یک وڑیں موہ رس ایت۔ نوکیں نظام 2026 ءِ کنٹریکٹ سائیکل ءَ چہ کار ءَ کیت ءُ انوگیں نظام ءِ جاہ ءَ کار کنت۔