اقوام متحدہ نا جنرل اسمبلی ٹی کشمیر نا ویل ئِ پبی وڑاٹ تالان کننگک، جتا ملک آتا سروک آتون اوڑدہی ٹی ہم کشمیر معاملہ غا ہیت مریک
مظفر آباد۔ 16ستمبر (اے پی پی) وزیراعظم محمدنواز شریف پارینے کہ اقوام متحدہ نا جنرل اسمبلی ٹی کشمیر نا ویل ئِ پبی وڑاٹ تالان کننگک و جتا ملک آتا سروک آتون اوڑدہی تیٹی ہم کشمیر نا معاملہ غا ہیت کیوہ، مقبوضہ کشمیر اٹی ظلم و وستم و بربریت نا انتہامسنے، کشمیری الس نا تحریک آجوئی ئِ واک اٹ توننگ مفک ، تحریک آجوئی نا دے ضرور دے ٹک ایتک ۔ اوداہیت ئِ جمعہ آ داڑے حریت کانفرنس نا کسرشون آتون اوڑدہی ناوخت آ ہیت وگپ کرسا پارے۔ صدر آزاد کشمیر مسعود خان وو زیراعظم راجہ فاروق حیدر ہم اوڑدہی ٹی اوار ئسر۔ وزیراعظم محمد نوازشریف پارے کہ کشمیریک انصاف و خودارادیت نا خواست ئِ کیرہ، کشمیری الس نا حق خودارادیت ئِ جہانی برادری امنا کرینے۔ اوپارے کہ اقوام متحدہ تینا قرارداد آتا رداٹ حق خودارادیت نا وعدہ ئِ پوروکے، پاکستان کشمیری الس نا حق خودارادیت نا مخ تفی ئِ برجاءتخک۔ وزیراعظم پارے کہ مقبوضہ کشمیر نا الس نا تحریک آجوئی نا دے ضرور پاش کیک۔ اوپارے کہ تاریخ گواہ ئِ کہ طاقت اٹ دننگا تحریک آتے توننگ مفک۔ اوپارے کہ ظلم ئِ چٹفوئی ئِ و حق انا فتح ئِ مروئی ئِ۔ وزیراعظم پارے کہ نن کشمیری تا سفارتی ، اخلاقی و سیاسی مخ تفی ئِ برجاتخنہ وکشمیر نا ویل انا ایسری کن ہر فورم آ توار ہرفینہ۔ حریت کسرشون آک دورہ امریکہ آن مست پت اٹی ہلنگ آ وزیراعظم نا منت واری ئِ ادا کریر۔
