اسلام آباد۔ 15ستمبر (اے پی پی) اسپیکر قومی اسمبلی سردار ایاز صادق تینا چینی ہم منصب ژانگ ڈی ژیانگ تون بیجنگ اٹی اوڑدہی کرے۔ پنچ شنبے آ جاری کروک آ بیان اٹی پاننگانے کہ ہڑتوم آ راہشونک دا ہیت انا اعادہ ئِ کریر کہ چین پاکستان اقتصادی راہداری ڈٹ انا رداٹ غٹ پروجیکٹس آتے تخوک آ وخت اٹی پورو کننگک۔ اوفک داڈٹ ئِ ہڑتوم آ ملک آتیان بیدس ڈیہہ نا ایلو ماندہ علاقہ غاتے کن ہم فائدہ مند ڈٹ گوندار۔ اسپیکر سردار ایاز صادق پارے کہ چین اسہ عظیم ئُ ملک اسے و پاکستان نا آزموندہ سنگت ئِ۔ ننے داہیت آ فخر ئِ کہ دا تعلق و رشتہ مسکوہی کیہی نسل آتیا محیط ئِ۔ اواومیت ظاہر کرے کہ ہڑتوم آ ملک آتے خڑک اتنگ کن متواتر پارلیمانی ڈل آتا درشان و تین پہ تینی السی رابطہ غاتیان کیہی دہائی آن جاری تاریخی تعلقداریک پین سوگومریک۔ اوچین پاکستان اقتصادی راہداری و پاک چین تعلقداری تیٹی پاکستان نا سیاسی واک آتا ہم آہنگی ئِ ہم تالان کرے۔ سردار ایاز صادق تینا چینی ہم منصب ئِ مقبوضہ وادی کشمیر اٹی انسانیت سوز سلوک نا بارواٹی ہم معلومدار کرے و داہیت آ زورشاغا کہ بھلو وخت اسے آن جاری دا ویل ئِ پرامن وڑاٹ اقوام متحدہ نا قرارداد و کشمیری الس نا است خواہی تا رداٹ ایسر کننگے۔ ژانگ ڈی ژیانگ پاک چین سنگتی ئِ ”سدابہاراسٹریٹجک شریدار“ گوندسا پارے کہ چین پاکستان نا شون اکن ہروڑکمک ئِ برجاتخک۔ او مقبوضہ کشمیر نا بابت پاکستان نا ساڑی آ پوزیشن آ پت انا درشانی ئِ کرے۔ ہڑتوم آ کنڈآن پارلیمانی ڈل انا درشان و سی پیک ڈٹ آ پارلیمانی چاروکی ئِ وخت انا گرج گوندسا پارے کہ داڑآن نہ صرف سنگتی نا رشتہ سوگو مریک بلکن ہڑتوم آ ملک آتا چندی بشخ آتیٹی شون بریک۔ داکان گڈ اسپیکر سردار ایاز صادق وائس چیئرپرسن سٹینڈنگ کمیٹی نیشنل پیپلز کانگریس شن یو یو نا کنڈآن اونااعزاز اٹی تروک آ اِرغ اٹی ہم شرکت کرے۔
