اسلام آباد۔ 15ستمبر (اے پی پی) وزیراعظم محمدنواز شریف ملک اٹی بجلی نا پیداوار نا جاری ڈٹ آتا بروخت پوروی و بروک آ وخت انا گچین ڈٹ بندی آ زورشاغسا پارینے کہ الس کن ہڑزان و وافر بجلی نا فراوانی ئِ باوری جوڑ کننگ تون اوار اوار زیات اقتصادی نمو وصنعتی سرجز اکن بجلی نا آخبت نا گرج آتے کن مناسب بست و بند کننگ نا گرج ئِ۔ پنچ شنبے آ وزیراعظم ہاﺅس اٹی کابینہ کمیٹی توانائی نا دیوان نا کماشی ئِ کرسا اوپارے کہ اونا حکومت تینا مدت نا پورو مننگ آن مست لوڈشیڈنگ نا چٹفنگ کن قوم اتون کروک آ وعدہ غاتے پورو کیک۔ چیئرمین واپڈا لیفٹیننٹ جنرل (ر) مزمل حسین دیوان ئِ 969میگاواٹ نا نیلم جہلم ہائیڈرو پاور پروجیکٹ و 3478میگاواٹ نا تربیلا IV ودیکی ڈٹ انا حالیت آتا بارواٹی بریفنگ تس۔ اوپارے کہ سائٹس انا ساڑی آ دورہ غاتا وخت آ ڈٹ آتے بروخت پورو کننگ کن اسہ وڑوڈول اسے گڈیکو دروشم تننگانے۔ چیئرمین واپڈا پارے کہ نیلم جہلم ڈٹ انا اولیکو یونٹ فروری 2018ءٹی کاریم کننگ نا بنائِ کیک وخت اس کہ ایلو یونٹس 2018ءنا تیرمہ آن مست فعال مریرہ۔ تربیلا ودیکی ڈٹ انا بارواٹی اوپارے کہ تربیلا IVنا اولیکو یونٹ 14اگست 2017ءآ وزیراعظم نا دوتے اٹ افتتاح کن تیار مریک۔ چیئرمین واپڈا نا کارکڑد نا ستائِ کرسا وزیراعظم نیلم جہلم و تربیلا ودیکی ڈٹ آ پیش رفت آ است جمی نا درشانی ئِ کرے۔ او پن بجلی نا ڈٹ آتیا عملدرآمد کرسا شفافیت ئِ باوری جوڑ کننگ آ زورشاغا۔ سیکرٹری دیر و بجلی دیوان ئِ بجلی نا جاری ڈٹ آتا ہدف آتا بارواٹی معلومدار کرے ہرافتے ٹی صاف توانائی نا ڈٹ جاٹ، کولاآن چلینگوک آ بجلی اُرا و ایل این جی پاور پلانٹس اوارو ہرافتے آن 2017ءنا وخت آ و مارچ 2018ءآن مست قومی گریڈ اٹی بجلی نا ودکی مریک۔ دیوان ئِ پاننگاکہ 330 میگاواٹ نا ونڈ و 980 میگاواٹ نا جوہری توانائی نا ڈٹ آتون اوار اسہ ہزار میگاواٹ آن زیات نا 9 ڈٹ جاٹ وزیراعظم نا کنڈآن افتتاح کن تیار ئُ۔ مستی پاننگاکہ تھر۔مٹیاری و پورٹ قاسم ۔ مٹیاری ٹرانسمیشن لین نا ڈٹ جاٹ ہم بنداو تخنگ کن تیار ئِ۔ دیوان ئِ پاننگاکہ ایل این جی پاور پلانٹس نا جوڑ جاڑ نا شیڈول پٹڑی آٹی ئِ و بھکی ٹی ایل این جی آن چلینگوک آ پاور پلانٹ تخوک آ وخت آن بھاز مست پورو کننگک۔ سیکرٹری دیر و بجلی 2018ءنا تیرمہ نا وخت آ بجلی نا طلب و رسد نا جامع جاچ ئِ پیش کرے و پارے کہ مئی 2018ءاسکان تقریباََ مسہ ہزار میگاواٹ بجلی فاضل مریک۔ دیوان اٹی بنجائی وزیر دیر و بجلی خواجہ محمدآصف، وزیر اطلاعات و نشریات سینیٹر پرویز رشید، وزیر ڈٹ بندی و شون احسن اقبال ، وزیر ریلوے خواجہ سعد رفیق ، وزیراعظم نا خصوصی کمکار طارق فاطمی و ایلو سینئر کمامدارآک ہم ساڑی ئسر۔
