اسلام آباد۔ 15ستمبر (اے پی پی) وزیراعظم محمد نواز شریف واپڈا ئِ ملک آن بجلی نا کاختی نا مون ئِ توننگ کن مستعدی اٹ کاریم کننگ نا گرج آ زورشاغسا پارینے کہ ساڑی آ حکومت ملک آن لوڈشیڈنگ نا چٹفنگ کن پرعزم ئِ ، ننا مقصد اُرائی صارف آتے وافر و ہڑزان بجلی تروئی ئِ۔ اوداہیت ئِ چیئرمین واپڈا لیفٹیننٹ جنرل (ر) مزمل حسین تون پنچ شنبے آ ایوان وزیراعظم اٹی ہیت وگپ کرسا پارے ۔ چیئرمین واپڈا وزیراعظم ئِ ملک اٹی جاری کیہی ہائیڈرو پاور ڈٹ آتیا پیش رفت نا بارواٹی بریفنگ ترسا یخین ترفے کہ پن بجلی نا جاری ڈٹ آک تخوک آ مدانا تہہ ٹی پورو کننگرہ۔ اوپارے کہ دا ڈٹ آتیان نہ صرف قومی گریڈ اٹی ودکی بجلی اوار مریک بلکن کشت و کشار و صنعتی بشخ آتے کن وافر بجلی نا دستیابی تون اوار اوار روزگار نا وارخواہی ہم ودی مریک۔ وزیراعظم محمد نواز شریف پارے کہ ہڑزان و صاف ستھری بجلی نا پیداوار آن نہ صرف صارف آتے آسراتی ملک بلکن آبی کوڑی نا جوڑ جاڑ آن ملک ئِ تینا دیر انا گرج آتے پورو کننگ اٹی ہم کمک رسینگک۔ اوپارت کرے کہ واپڈا ئِ مچ آ ملک اٹی آبی کوڑی نا جوڑ جاڑ ئِ ترند کننگ ناگرج ئِ ہرا یقینا سیلاب آتا توننگ اٹی ہم کمکار مریک۔ وزیراعظم چیئرمین واپڈا ئِ پارت کرے کہ جاری ڈٹ آتیا شونداری کاریم ئِ ترند کننگے و ملک انا الس نا مفاد اٹی زیات آن زیات کاریم اٹ اتنگ کن پن بجلی نا بھلو کچ اسیا پیداوار نا پین وارخواہی ہم پٹنگے۔
