330میگاواٹ پون بجلی و 680 میگاواٹ جوہری توانائی آ تالان اسہ ہزار میگاواٹ توانائی نا 9 ڈٹ افتتاح کن تیار ئُ
اسلام آباد۔ 15ستمبر (اے پی پی) وزارت دیر و بجلی نا کنڈآن وزیراعظم محمد نواز شریف ئِ معلومدار کننگاکہ 330 میگاواٹ پون بجلی و 680 میگاواٹ جوہری توانائی آ تالان اسہ ہزار میگاواٹ توانائی نا 9 ڈٹ افتتاح کن تیار ئُ۔ وزیراعظم آفس آن چارشنبے آ جاری اسہ بیان اسے نا رداٹ وزیراعظم محمد نوازشریف ئِ معلومدار کننگاکہ فیسکو و آئیسکو نا موبائل ریڈنگ ڈٹ اتون اوار اوار آئیسکو ننا کسٹمر رسپانس سسٹم ہم افتتاح کن تیار ئِ۔ پون بجلی نا ڈٹ ہرانا اینخو سال اکتوبر اسکان وزیراعظم محمد نواز شریف نا کنڈآن افتتاح ئِ کننگک۔ داڈٹ آتیٹی یونس انرجی(50میگاواٹ)، میٹرو پاور(50میگاواٹ) ، ماسٹر انرجی(50 میگاواٹ)، اقبال انرجی(30میگاواٹ)، ہائیڈرو چائنہ داﺅد (50میگاواٹ)و تنا گاجنراسی(50میگاواٹ) اوارو۔ جوہری توانائی نا ڈٹ ہرافتا افتتاح اکتوبر 2016ءو مارچ2017ءاسکان کروئی ئِ، ٹی بالترتیب چشمہ تھری 340میگاواٹ و چشمہ فور 340میگاواٹ نا ڈٹ اوارو۔ وزیراعظم ئِ ٹرانسمیشن لائنز آتا ڈٹ آتیان ہم معلومدار کننگا ہرافتا بنداو ئِ تخوئی ئِ اوفتے ٹی 250کلومیٹر نا 500کے وی نا ڈی سی ٹرانسمیشن لین اینگروتھر آن مٹیاری و مٹیاری سوئچنگ سٹیشن آن بیاس اسکان اِرا لین اوارو۔ 250کلومیٹر لین ایل او ٹی ۔I(110کلومیٹر) و ایل او ٹی۔II(150کلومیٹر) نا ٹھیکہ بالترتیب 9 دسمبر 2015ءو 3جون 2016ءئِ تننگانو۔ داکان بیدس پورٹ قاسم مٹیاری ٹرانسمیشن لین نا ڈٹ ہم بنداو کن تیار ئِ ہرامرحلہ غاتیا تالان ئِ۔ اولیکو مرحلہ 45کلومیٹر 500 کے وی ٹرانسمیشن لین پورٹ قاسم آن حب جامشورو ٹرانسمیشن لین سی سی ٹی۔Iو ارٹ میکو مرحلہ 135کلومیٹر نا 500 کے وی ٹرانسمیشن لین حب جامشورو آن 500 کے وی مٹیاری اوارے۔ ساڑی آ حکومت وزیراعظم محمد نوازشریف نا سروکی ٹی نہ صرف توانائی تنکی نا مون ئِ توننگ بلکن پاکستان نا توانائی نا آخبت نا گر ج آتے پورو کننگ کن کوشست کننگ ئِ۔ توانائی نا پیداوار اٹی ودکی آن اقتصادی شون ، روزگارنا وارخواہی، صنعتی سرجزو درملکی زرکاری ٹی ہم ودکی مریک۔ وزیراعظم محمد نواز شریف نا سروکی ٹی ساڑی ہی ٹی توانائی آن بابت کابینہ کمیٹی نا دیوان مس ہراٹی او پارے کہ جاری ڈٹ آتا پوروی اتون نیشنل گریڈ اٹی نمان ودکی مریک ہراڑآن ہمیشہ ہمیشہ کن پاکستان آن لوڈشیڈنگ چٹک۔ ملکی تاریخ اٹی وخت اس ہم توانائی نا بشخ اٹی داخہ بھلو کچ اسے آ زرکاری کننگ تنے۔ وزیراعظم ذاتی وڑاٹ مچ آ ملک اٹی توانائی نا جاری ڈٹ آتا چاروکی ئِ کیک و داڈٹ آتا بروخت پوروی ئِ یخینی جوڑ کننگ کن غٹ توانائی نا ڈٹ آتا سائٹس آتا دورہ ئِ ہم کیک۔ جاری توانائی نا ڈٹ آتے کن ٹرانسمیشن لین شاغنگ نا کاریم ترندی اٹ جاری ئِ و ارب آ روپئی نا ساڑی آ ڈسٹری بیوشن نیٹ ورک اٹی زرکاری کننگ انگ ئِ تانکہ ودکی وڑاٹ ودی مروک آ بجلی نا لوڈ ئِ برداشت کننگ نا لائخی ئِ ہم ودفنگ مرے۔
