اسلام آباد۔ 09 ستمبر (اے پی پی) بنجائی وزیر لیفٹیننٹ جنرل (ر) عبدالقادر بلوچ پارینے کہ فاٹا اصلاحات اٹی ایف سی آر نا مون انگا کانود ئِ چٹفسا اونا جاگہ غا ررسم و رواج آ مبنی پوسکنو کانود اس اتنگ، 2017ءٹی داڑے بلدیاتی گچین کاری کرفنگ، فاٹاٹی کنوئی آ گڑاتیا خلوک ٹیکس ئِ ختم کننگ نا سفارش کرینے۔ پنچ سال انا وخت 500 ارب روپئی نا بھلو زر اس شونداری کاریم تیٹی خڑچ کننگک، 5سال گڈ فاٹا ئِ خیبر پختونخوا ٹی ضم کننگک، 31دسمبر 2016ءاسکان ہمپ و بٹ کروک آ ہر بندغ تینا اُراغا پدی کاہک۔ جمعہ آ قومی اسمبلی نا دیوان نا وخت آ بنجائی وزیر لیفٹیننٹ جنرل (ر) عبدالقادر بلوچ کمیٹی نا سفارشات آتیا ہیت کرسا پارے کہ بدقسمتی اٹ فاٹا پاکستان نا اڈ ہلنگ آن داوخت اسکان بھاز انگا آسراتی تیان محروم مسنے۔ وزیراعظم محمد نواز شریف دا ہیت انا نوٹس ئِ ہلک تانکہ فاٹا نا الس نا تینا علاقہ غا حق حاکمیت رائج مرے و اودے ملک انا ایلو صوبہ غاتا بریبر اتنگے۔ فاٹا نا ہزار آ ملک و پولیٹیکل ایجنسٹس داوخت اسکان شہید مسنو ہراڑآن فاٹا نا انتظامی ڈھانچہ بھاز بے وڑ زہمی مسنے۔ بدامنی نا سوب آن فاٹا نا ایجنسی تا گیشتری ٹی آبادی ئِ ہمپ و بٹ کروئی تما۔ اوفتے تینا اُراتیٹی بسانا اصل ویل ئس ہرا وسیلہ غاتیا اسہ انسانی بھاریم اس ئس۔ نن فاٹا نا خلقت آتا نیام اٹ ہنسا صلابت کرین۔ نن ہموڑے زند انا ہر بشخ آن تعلق تخوک آ خلقت آتا رائے ئِ ہلکن۔ اوفتا غٹ آن بھلا خواست دا ئس کہ غٹ آن مست اوفتے پدی تینا اُراتیا رادہ کننگے و اوفتا بھس حال ڈھانچہ ئِ ازسرنو جوڑ جاڑ کننگے۔ اوفتا داہم خواست ئس کہ اوفتے ہائیکورٹ و سپریم کورٹ اٹی اپیل نا حق تننگے۔ فاٹا نا الس نا گیشتری داہیت انا مخ تفی ئِ کریر کہ اوفتے خیبر پختونخوا ٹی ضم کننگے۔ اوپارے کہ دا کاریم دمدستی وڑاٹ مننگ کپک۔ داڑکن ٹرانزیشنل پیریڈ اس درکار مریک۔ دا سفارشاک آک گڈیکو افس۔ باسک آتا سلاہ نا ہم خیرمقدم ئِ کننگے۔ فاٹا نا ساڑی آ پی ایس ڈی پی 22ارب کاریم اوٹی 90 ارب نا ودکی مریک۔ فاٹانا کنوئی آ دیر انا گرج و شون نا عمل اٹی اولیکو پنچ سال گام گیج چست کننگک۔ پنچ سال اسکان فاٹا نا ساڑی آ حالیت برقرار سلک۔ داوخت 500 ارب روپئی نابھلو زر اسے آن ہموجاگہ نا الس نا زند انا معیار ئِ گچین جوڑ کننگک۔ اوکان گڈ فاٹا ئِ کے پی کے ٹی ضم کرفنگے۔ اوپارے کہ 31دسمبر 2016ءاسکان ہمپ و بٹ کروک آ ہر بندغ تینا اُراتیا پدی کاہک۔ 2017ءٹی ہموڑے بلدیاتی گچین کاریک مریرہ۔ گریڈ 22 نا عہدہ نا اسہ چیف سیکرٹری اس گورنر کے پی کے نا چاروکی ٹی فاٹا ٹی شونداری سرجزآتا چاروکی ئِ کیک و دابابت اسہ خصوصی کمیٹی اس ہم جوڑ کننگک۔
