ملک اٹی امن و ایمنی نا اڈتننگ کن آپریشن ضرب عضب نا سرسہبیک ستاکڑزرہ، سلہہ بند فوج انا ورنا و افسر آک لمہ وطن نا رکھ اکن تینا جان تے ندر کننگ ئُ، امن و ایمنی نا حالیت آتیٹی گچینی آن اقتصادی شون نا رفتار ترند مریک
اسلام آباد۔ 09 ستمبر (اے پی پی) سینیٹ نا باسک آک پارینو کہ ملک اٹی امن و ایمنی نا اڈتننگ کن آپریشن ضرب عضب نا سرسہبیک ستاکڑزرہ، سلہہ بند فوج انا ورناو افسر آک لمہ وطن نا رکھ اکن تینا جان تے ندر کننگ ئُ، امن و ایمنی نا حالیت آتیٹی گچینی آن اقتصادی شون نا رفتار ترند مریک، صدر مملکت پارلیمنٹ نا اسیجائی دیوان آن تران اٹی حکومت کن اسہ سمت اس متعین کرینے، صدر مملکت نا تقریر اٹی چست کروک آ ٹک آتیا عمل کننگ آن الس نا زند انا معیار ئِ گچین جوڑ کننگ و ملکی ویل آتے زوت ایسر کننگ اٹی کمک رسینگک۔ جمعہ آ پارلیمنٹ نا اسیجائی دیوان آن صدر مملکت نا تران آ شرہ ٹی بشخ ہلسا سینیٹر طاہر حسین مشہدی پارے کہ صدر مملکت تینا تران اٹی تینا وژن ئِ پاش کرینے و حکومت کن بروک آ سمت ئِ متعین کرینے۔ اوپارے کہ داوخت پاکستان اٹی امن و ایمنی نا حالیت آتے گچین جوڑ کننگ کن آپریشن ضرب عضب سرسہبی اتون مون آ ہِننگ ئِ، بجلی نا حالیت آتے گچین جوڑ کننگ کن ہم پین گام گیج کننگ نا گرج ئِ، ہراوخت اسکان لوڈشیڈنگ چٹپک پاکستان نا معیشت شون ہلنگ کپک۔ سینیٹر جاوید عباسی پارے کہ صدر مملکت نا تران بھاز جامع و متوازن ئس۔ اوملک ئِ مون تروک تہہ و پیشن نا چیلنج آتا احاطہ ئِ کرے و پاکستان نا معیشت آ ہم خیال آتا درشانی ئِ کرے۔ اوپارے کہ صدر مملکت تینا ترا ن اٹی اسہ پالیسی اس متعین کرینے ہراڑآ عمل کننگ نا ضرورت ئِ۔ اومعاشی بشخ اٹی حکومت نا سرسہبی تا پبی وڑاٹ ستائِ کرینے، امن و ایمنی نا بابت ہم صدر مملکت نا تران اٹی ہراٹک آتے چست کننگانے او قابل تقلید ئُ۔ اوپارے کہ دہشت گردی نا برخلاف آپریشن ضرب عضب سرسہبی اٹ جاری ئِ۔ پاکستان نا سلہہ بند فوج و قوم انا قربانیک گم مفسہ۔ اوپارے کہ آپریشن ضرب عضب نا سوب ملک اٹی امن و ایمنی نا حالیت آتیٹی نمان گچینی بسنے۔ سینیٹر لیفٹیننٹ جنرل (ر) عبدالقیوم پارے کہ صدر مملکت تینا تران اٹی غٹ بشخ آتا احاطہ ئِ کرے۔ اوگورننس و معیشت نا معاملہ غاتیا ہم خیال آتا درشانی ئِ کرے، تینا تران اٹی۔ اواقتصادی بحالی کن حکومت نا کنڈآن کروک آ گام گیج آتا ستائِ کرے۔ اوپارے کہ داوخت ملک اٹی ہراوڑنا حالیت آک مون تروک ئُ اوفتے تون مون تننگ کن اتحاد نا ضرورت ئِ و صدر مملکت نا تران اٹی ہرا تجویز تننگانے و ہراوڑنا کسرشونی کننگانے اوفتے مون آ تخسا ننے مون آ ہنوئی مریک۔ اوپارے کہ فاٹا اصلاحات و گچین کاری اصلاحات آتون اوار اوار عدالتی اصلاحات آتا ہم ضرورت ئِ تانکہ مقدمہ غاتے زوت چٹفنگ مرے۔ اوغان پناہ گزین آتا پدی ہِننگ نا عمل بایدے تیز مرے، مردم شماری قوم انا شون اکن بھاز المی ئِ۔ 1998 ءآن ننا ملک اٹی مردم شماری متنے۔ مردم شماری کن صوبہ غاتا کمک آن مون ئِ ہنوئی مریک۔ دا المی اف کہ مچ آ ملک اٹی اسہ وخت اٹی مردم شماری کرفنگے۔ اودے جتا درجہ غاتیٹی بشخ وپانٹ کرسا ہم مردم شماری کرفنگ مریک۔ مردم شماری آن ملکی وسیلہ غاتے بریبری وڑاٹ بشخ وپانٹ کننگ مریک۔ سینیٹر نعمان وزیر پارے کہ صدر مملکت نا پارلیمنٹ نا اسیجائی دیوان آن پارلیمالی سال انا بناءآ تران مچ آ سال اکن حکومت کن اسہ سمت اسے نا تعین ئِ کیک و خدونا اسہ سال اسے نا وخت حکومتی گام گیج آتا اوٹی احاطہ ئِ کننگک۔ اوپارے کہ چین پاکستان اقتصادی راہداری ڈٹ آن مچ آ ملک اٹی الس ئِ مستفید کروئی مرے و ہندن ئُ پالیسی جوڑ کننگے کہ الس نازند انا معیار گچین مرے۔ سینیٹر غوث محمد نیازی پارے کہ ساڑی حکومت نا گام گیج آتا سوب معاشی حالیت آتیٹی نمان گچینی بسنے۔ درملکی زرمبادلہ نا کوڑی 22 ارب ڈالر آن ودانے۔ ہراتم ساڑی آ حکومت برسراقتدار بسوسس ہموخت آ پاکستان نا بارواٹی پاننگاکہ کہ او دیوالیہ مننگ والا ئِ ولے ساڑی آ حکومت اودے دیوالیہ مننگ آن بچیفے و معیشت ئِ گچین جوڑ کرینے۔ سینیٹ عثمان کاکڑ صدر مملکت بنجانا علامت ئِ ، اونا تران اٹی حکومت کن مچ آ سال انا کسرشونی اوارمریک۔ صدر نا تران اٹی غٹ گڑاتا احاطہ کننگک واہم حکومت ئِ ہم مرے کہ او ہندن ئُ پالیسی جوڑ کے ہرافتے آن الس ئِ فائدہ مرے۔ صدر مملکت نا پارلیمنٹ نا اسیجائی دیوان آن تران سریس وختی وژن آ بایدے تالان مرے۔ بیرسٹر محمد علی پارے کہ ہر ملک انا سروک پوسکنا پارلیمانی سال انا بناآ تران کیک و دا تران اٹی بروک آ سال اکن حکومتی پالیسی تا بابت اسہ کسرشونی اس تننگک مستین سال انا کارکڑد نا احاطہ کننگک ۔ اوپارے کہ صدر مملکت نا تران اٹی کیہی سرحال آتیان ہیت کننگا و داچرجوئی ٹی کیہی ٹک آتے چست کننگا۔
