اسلام آباد۔ 09 ستمبر (اے پی پی) پاکستان مسلم لیگ (ن) نا کسرشون مائزہ حمید پارینے کہ ساڑی آ حکومت ملک اٹی انفراسٹرکچر و شونداری کاریم تا جال اس شاغانے۔ ریڈیو پاکستان تون ہیت وگپ کرسا اوپارے کہ پاکستان مسلم لیگ(ن) نا حکومت مچ آ ملک اٹی شونداری کاریم کرفنگ ئِ و گڑاس بندغ آتا داخیال سہی اف کہ حکومت صرف پنجاب نا صوبہ ٹی شونداری کاریم کرفنگ ئِ۔ اوپارے کہ وزیراعظم محمد نواز شریف غٹ صوبہ غاتا دورہ ئِ کرینے و ہر جاگہ غا انفراسٹرکچر ڈویلپمنٹ ، تعلیمی اصلاحات، روڈو موٹرویز آتا جوڑ جاڑ و توانائی پروجیکٹس آتا اجراءکرینے۔ اوپارے کہ وزیراعظم ہراوعدہ ئِ کیک اودے پورو کرسا نشان ہم ایتک ۔ مائزہ حمید پارے کہ تدوک آ دے اوکراچی اسٹاک ایکسچینج نا دورہ ئِ کرے تو اسہ دے اٹی انڈیکس 4ہزار پوائنٹ بڑزاہنانے۔ اوپارے کہ وزیراعظم نا ویژن ئِ کہ ملک شون ہلے الس شونہال مرے ، کبینی ٹی کمتی مرے و بے روزگاری چٹے۔ اوپارے کہ منفی سیاست کروک آتے ملکی شون اٹی وزیراعظم تون تفوئی مرے و انتشار نا سیاست ئِ ہلوئی مرے تانکہ ملک شون نا کسر آ روان مرے۔
