اسلام آباد۔ 09 ستمبر (اے پی پی) پاکستان مسلم لیگ (ن) نا سینیٹر نہال ہاشمی پارینے کہ پاکستان اسٹاک ایکسچینج اٹی گچینی ، زرمبادلہ و برآمدات آتیٹی ودکی ، مائیکرو اکنامک حالیت آتیٹی سوگوی ساڑی آ حکومت نا گچینی پالیسی تا نتیجہ ئِ۔ ریڈیو پاکستان تون ہیت و گپ کرسا اوپارے کہ کراچی نا تاریخ ئِ ہرفنگے اُننگے تو بدامنی ، ٹارگٹ کلنگ، لاکانودیت و بھتہ خوری کون آ ویل آتا سوب اسٹاک ایکسچینج شیفکو کہول آ سرمسوسس و کیہی وار ای بھاز بے وڑکرش ہم مسوٹ۔ اوپارے کہ پاکستان مسلم لیگ (ن) نا حکومت نا پالیسی تا سوب داسا اسٹاک ایکسچینج بڑز بننگ نا بنائِ کرینے وکراچی ، لاہورو اسلام آباد نا اسٹاک ایکسچینج آتے یکجا کننگ نا سوب کاروبار اٹی دے پہ دے ودکی مننگ ئِ۔ اوپارے کہ کراچی ٹی غٹ آن زیات کاروبار مریک و کمپنیک رجسٹرڈ مریرہ کاروباری شخصیت آک زرکاری کیرہ انتئے کہ امن و ایمنی ٹی گچینی نا سوب زرکارآک سمجھرہ کہ او و اوفتا زرآک رکھوک ئُ۔ نہال ہاشمی پارے کہ وزیراعظم پاکستان نا ذاتی است خواہی نا سوب ملکی معیشت اٹی گچینی بننگ ئِ ۔ ملکی شون و معیشت اٹی گچینی نا بابت چست کروک آ سوج انا ورندی ئِ ترسا اوپارے کہ پاکستان مسلم لیگ (ن) نا اقتدار نا دور اٹی بننگ نا وخت ملک توانائی تنکی نا سوب لوڈشیڈنگ نا پلویڑ اٹی ئس کیہی علاقہ غاتیٹی بجلی ہناکہ تو پدی بتوکہ واہم داسا حالیت آک اسہ وڑ بدل مسنو و توانائی تنکی نا بھلو حد اسسکان مون ئِ توننگانے۔ اوپارے کہ ساڑی آ حکومت نا کنڈآن برجاءکروک ونڈ، کول و ہائیڈرو پروجیکٹس ، نیلم جہلم اٹی ودیکی، پورٹ قاسم و حب اٹی بجلی نا کارخانہ غاک ہندن ئُ ڈٹ ئُ ہرافتا پوروی آن بجلی تنکی نا پورو ی اٹ مون ئِ توننگک۔
