اسلام آباد۔ 08 ستمبر (اے پی پی) وزیر مملکت دیر و بجلی عابد شیرعلی پارینے کہ حکومت ملک آن لوڈشیڈنگ ناخاتمہ ئِ خواہک، خیبر پختونخوا ٹی 5گریڈ اسٹیشن اپ گریڈ کننگ نا چرجوئی ٹی صوبائی حکومت ڈغار نا دوئی ٹی کمک کپننگ ئِ، صوبائی حکومت تون 54کروڑ روپئی پونے مسہ سال اسکان تخوک ئسر داسا گڑا چکدرہ ٹی گریڈ اسٹیشن کن ڈغار فراوان کننگانے۔ پنچ شنبے آ قومی اسمبلی نا دیوان اٹی وقفہ سوج آتا وخت آ شیراکبر خان نا سوج انا ورندی ٹی وزیر مملکت پارے کہ ضلع بونیر اٹیII کے وی کڑاکڑ فیڈر بونیر ئِ اِرا بشخ اٹی بشخ و پانٹ کننگانے۔ اوپارے کہ بجلی فراوان کننگ نا 14اسکیم مارچ 2017ءٹی پورو مریرہ ہراڑآن لوڈشیڈنگ و ٹرپنگ نا سسٹم گچین مریک۔ II کے وی چاملا فیڈر بونیر ئِ اِرا بشخ اٹی بشخ وپانٹ کننگ نا کاریم آ پیش رفت جاری ئِ۔ 32دانہ ایچ ٹی کمبہ غاتا تنصیب کننگانے۔ آسیہ ناز تنولی نا سوج انا ورندی ٹی وزیرمملکت دیر و بجلی پارے کہ خیبر پختونخوا ٹی پنچ گریڈ اسٹیشن نا معاملہ صوبائی حکومت آتون چست کننگانے، فنڈز ساڑی ئِ واہم داویل ئِ ایسر کننگ کتوس۔ پونے مسہ سال آن پد چکدرہ گریڈ اسٹیشن نا ڈغار نامعاملہ ایسر مس۔ اوپارے کہ صوبائی حکومت ڈغار دوئی کرسا ایتے نن بجلی نا معاملہ ئِ ایسر کننگ خوانہ۔
