اسلام آباد۔ 08 ستمبر (اے پی پی) پارلیمانی سیکرٹری قومی جان جوڑی، خذمات، ڈاکٹر درشن پارینے کہ ساڑی آ دور حکومت اٹی اولیکو وار ڈرگ پالیسی اس درستی راستی کرفنگانےم، ملک اٹی دوائی تا تیاری نا 600 یونٹس ئُ، حکومت دوائی تا نرخ آتے کن اسہ پالیسی اس اختیار کرینے، جعلی دوائی تا چٹفنگ کن 54چھاپہ خلنگانے، 723دوائی جعلی خننگار، 6000آن زیات بندغ ہلنگار، 2015ءٹی عدالت آتا کنڈآن 7 کروڑ 16لکھ روپئی جرمانہ و پنچ آن دہ سال اسکان نا سزاتننگا۔ پنچ شنبے آ قومی اسمبلی نا دیوان اٹی وقفہ سوج آتا وخت آ نفیسہ عنایت اللہ خٹک نا سوج انا ورندی ٹی پارلیمانی سیکرٹری پارے کہ پاکستان اٹی اولیکو وار دوائی تا نرخ آتیٹی کمتی نا پالیسی اتنگانے، نواز شریف نا پارت آ اولیکو وار ڈرگ پرائسنگ بورڈ اس جوڑ کننگانے، نن دوائی تا نرخ آتیٹی ودکی نا بابت آن غاو سیل اس ہم جوڑ کرینن۔ زند ئِ بچفنگ نا دوائی تا مارکیٹ اٹی عدم دستیابی ئِ توننگ کن گڑاس دوائی تا نرخ آتیٹی 8 درسد ودکی نا موکل تننگا۔ جعلی دوائی تیا حکومت اِرا سال اٹی 54چھاپہ خلک، کیہی کمپنی تا لیسنس آتے معطل کننگاو لکھ آ روپئی جرمانہ کننگا۔ اوپارے کہ پاکستان آن دوائی تا برآمد بھاز کم ئِ۔ 80 آن 90 درسد دوائی ہندی کہول آ تیار مریرہ۔ منزہ حسن نا سوج انا ورندی ٹی اوپارے کہ تقریباََ10 آن 15درسد بے کچ المی دوائی پاکستان درآمد کننگ انگ ئِ، پاکستان اٹی 600 مینو فیکچرنگ یونٹس آتیان 359پنجاب، 140سندھ، 91خیبر پختونخوا، 11بلوچستان و 5آزاد کشمیر اٹی ئُ۔ ملک اٹی 380 دوائی تے زند بچفوک دوائی تا درجہ تننگانے۔
