اسلام آباد۔ 07 ستمبر (اے پی پی) دفاعی جاچکار ایئر مارشل (ر) ایاز احمد پارینے کہ 6 ستمبر 1965ءنا دے پاک شاہین آک بھارت نا 22جنگی جہاز آتے بھس کریر اوکان گڈ بھارتی فضائیہ پاکستا ن نا کنڈا ہم بتویسس۔ ریڈیو پاکستان تون ہیت وگپ کرسا اوپارے کہ 6ستمبر نا سہب بھارتی فضائیہ نا کنڈآن پاکستان آ جلہو پاک فضائیہ کن بھاز بھلو چیلنج اس ئس ہرانا بو زئِ پرغسا ورندی تننگا و ہمووخت ناپائلٹ تمغہ جرات سجاد حیدر پٹھان کوٹ آبمباری کرسا بھارت نا 13جنگی جہاز آتے بھس کرے و ہمودے پنی آ پائلٹ ایم ایم عالم سرگودھا غا جلہو کروک آ 5بھارتی جنگی جہاز آتے اسہ منٹ اسے نا تہہ ٹی بھس کرے و جمی وڑاٹ اوفک 9 بھارتی جہاز آتے خلکر بٹیر اوکان گڈ بھارتی فضائیہ نا جنگی جہاز آک پاکستان نا رخ ئِ ہم کتوس۔ ایئر مارشل (ر) ایاز احمد خان پارے کہ ہمووخت آ او لاہور نا علاقہ ٹی نان فائٹر بیس انا کمانڈر ئس و او ہمووخت انا چیف ایئر ماشل نورخان آن خواست کرے کہ اودے ہم بھارت آ بمباری نا موکل تننگے واہم اِرادے پد دا موکل ملا و اوہم بھارت نا گل زمین آ بمباری کرسا اوفتا کیہی جہاز آتے بھس کرے و غازی نا حیثیت آن وطن آ پدی بس۔ اوپارے کہ پاک فضائیہ وطن نا دفاع نا جوزہ آن اینو ہم سرشار ئُ و ملک انا کنڈا خراب انگا نظر اٹ ہروک آتا بوز ئِ پرغنگ نا لائخی تخک۔
