اسلام آباد۔ 07 ستمبر (اے پی پی) بنجائی وزیر پٹرولیم و قدرتی وسیلہ شاہد خاقان عباسی پارینے کہ تیل و گیس انا پٹنگ نا بشخ اٹی 1.6کھرب روپئی نا زرکاری مسنے، مسکوہی مسہ سال انا وخت آ آئل و گیس انا 82فیلڈز دریافت مسنے، گیس رائیلٹی صوبہ غاتے تننگک ہرا پابند ئُ کہ اونا دہ درسد بشخ آئل فیلڈ انا حامل ضلع غاتیٹی خڑچ کیرہ، گیس انا پوسکنا کنکشنز”مہالو ببو مہالو دبو“ نا بنداو آ تننگ انگ ئِ، 2011ءٹی گیس انا پوسکنا کنشنزآتیا خلوک آ پابندی ئِ ہرفنگ نا بابت سفارش کرینے، ملک اٹی گیس انا لوڈشیڈنگ نا حالیت گچین مسنے، پوسکنا آبادی ٹی ودکی 100 کنکشن تننگاکہ ہرافتے ودفسا 200 نا سفارش کرینے۔ چارشنبے آ قومی اسمبلی ٹی وقفہ سوج آتا وخت آ شاہد خاقان عباسی پارے کہ 2011ءٹی گیس انا پوسکنا کنکشن تننگ آ پابندی خلنگاسس۔ نن داسا امپورٹڈ گیس انا بنداو آ پابندیئِ ہرفنگ ناسفارش کرینن۔ اوصفاکرے کہ اسہ صوبہ اس ہم گیس انا پیداوار اٹی خودکفیل اف۔ اُرائی کاریم اٹ اتنگ نا کنکشن آتیا پابندی اف واہم اوڑکن تینا باری اہم ئِ۔ اوپارے کہ ملک اٹی گیس انا کاختی ٹی نمان گچینی بسنے۔ اوپارے کہ پوسکنا ہاﺅسنگ سوسائٹی تے گیس کنکشن تفننگ انگ ئِ۔ ملک اٹی داوخت آ گیس انا اسہ جاگہ اس ہم لوڈشیڈنگ اف۔ ایل پی جی نا نرخ ئِ ریگولیٹ کننگانے۔ ننا کانود موکل تفک کہ گیس دُزی نا چیک اپ کن اُراتیٹی پترینگر۔ شاہد خاقان عباسی پارے کہ سسٹم 2010-11ءٹی کمپیوٹرائزڈ کرفنگانے۔ گڑاس فیلڈ آفیسر آتے جعلی رسید تننگانے دامعاملہ مون تروک ئِ، نن”مہالو ببو مہالو دبو“ نا بنداو آ کنکشن تننگ اُن۔ اگہ جاگہ اس دا رسید والا کیس آک اریر تو معلومدار کننگے۔ معاملہ ئِ ایسر کینہ۔ مسرت رفیق مہیسڑ نا سوج انا ورندی ٹی اوپارے کہ ننا تیل انا پیداوار اسہ لکھ بیرل یومیہ آن تجاوز کرینے واہم صرف 15درسد تینا گرج آک ہندی کہول آ ودی مریرہ۔ زیات تر درآمد کرسا ہی تینا گرج آتے پورو کننگک۔ اوپارے کہ گیس آ رائیلٹی صوبہ ئِ تننگک اونا دہ درسد آئل فیلڈ انگا ضلع ٹی صرف کننگ نا پابندی ئِ۔ اوٹی ننا ہچ ئُ عمل و دخل اس اف۔
