اسلام آباد۔ 06ستمبر (اے پی پی) وزیر مملکت دیر و بجلی چوہدری عابد شیرعلی پارینے کہ 2018 ءٹی ملک آن تہاری تے ہمیشہ ہمیشہ کن چٹفنہ، 6 ستمبر شہید، غازی و پاکستان نا بقانا دے ئِ، عمران خان نواز شریف فوبیا ٹی دماغی توازن تے کاریم ئِ ہلانے۔ سے شنبے آ پارلیمنٹ ہاﺅس نا پیشن میڈیا تون ہیت وگپ کرسا اوپارے کہ وزیراعظم نا سروکی ٹی ملکی شون و شونہالی نا ایجنڈہ جوانی اٹ مون آ ہِننگ ئِ، وزیراعظم نا خصوصی توجوہ آن ملک آن بجلی نا لوڈشیڈنگ نا چٹفنگ کن بھلا بھلا ڈٹ آتیا کاریم برجائِ۔ 2018 ءٹی نیشنل گریڈ اٹی وافر کچ اٹی بجلی اوار مریک ہراڑآن ملک آن ہمیشہ ہمیشہ کن تہاری تے چٹفنگک۔ اسہ سوج اسے نا ورندی ٹی اوپارے کہ نواز شریف ئِ سیاست آن آﺅٹ کننگ نا تغ ئِ خنوک آک دُن مف کہ تینٹ سیاست نا اہلیت آن دوتے سلور۔ اوپارے کہ نواز شریف نا مخالفت اٹی عمران خان ہردے خلوک ئُ تغ خنسا خنسا اونا ذہنی توازن داسا کاریم ئِ ہلانے۔ دھرنہ و برانز نا سیاست آن الس نا شون و شونہالی نا عمل معطل مریک۔ عمران خان ئِ الس نا شون تون ہچ ئُ غرض اس اف۔ او صرف تینے وزیراعظم جوڑ کننگ خواہک خواہ اوڑکن انت کہ قیمت اس اودے تروئی تمے۔ 6 ستمبر نا بابت اسہ سوج اسے نا ورندی ٹی اوپارے کہ دا شہید، غازی تا دے ئِ دا دے پاکستان نا بقاءنا یات ئِ ترفک ۔ ہنداخاطران دادے یوم دفاع پاکستان نا پن تننگانے۔ قوم تینا ہیروز آتا قربانی تے ہمیش یات تخک۔
