بروک آ نسل آتے تینا ہیروتا قربانی تیان معلومدار کننگ کن خصوصی گام گیج چست کروئی مرے، سلہہ بند فوج وطن نا دفاع و سیم آتا رکھ اکن تینا جان تے ندر کننگ ئُ، 1965ءنا جنگ اٹی پاکستان نا فوج مثالی و لازووال قربانی تسر
اسمبلی نا باسک آتا درشانِ خیال
اسلام آباد۔ 06ستمبر (اے پی پی) قومی اسمبلی ٹی غٹ سیاسی جماعت آتا کسرشونک شش ستمبر نا شہید آتے خراج عقیدت پیش کرسا پارینو کہ تینا بروک آ نسل آتے تینا دا ہیروتا قربانی تیان معلومدار کننگ کن خصوصی گا م گیج چست کروئی مرے، پاکستان نا سلہہ بند فوج وطن نا دفاع و سیم آتا رکھ اکن تینا جان تے ندر کننگ ئُ ہراڑآ نن اوفتے خراج تحسین پیش کینہ۔ سے شنبے آقومی اسمبلی ٹی پیپلزپارٹی نا کسرشون شازیہ مری پارے کہ یوم دفاع نا وخت آ حکومت نا کنڈآن قرارداد اس بایدے بروسس۔ ایم کیو ایم پاکستان نا باسک شیخ صلاح الدین پارے کہ یوم دفاع نا وخت آ پاک فوج اتون یکجہتی نا درشانی کن قرارداد اس اتنگے، ننا ورناتا قربانیک بھاز ئُ ۔ دا جنگ اٹی فضائیہ و بحری فوج انا خذمت آک ہم ستاکڑزرہ۔ تحریک انصاف نا باسک قومی اسمبلی شفقت محمود پارے کہ ایوان اٹی ہرہیت ئِ حق ئِ مون آ تخسا کروئی مرے۔ جماعت اسلامی نا پارلیمانی لیڈر صاحبزادہ طارق اللہ پارے کہ شش ستمبر آ قربانی تروک آتے نظر انداز کروئی ہلوکہ، 6ستمبر 1965ءآ بھارت پاکستان آ کوزہ نا مذموم ارادہ ئِ کریسس واہم ننا فوج ہراقربانی تے تس او مثالی ئسر۔ مسلم لیگ (ن) نا باسک کیپٹن (ر) صفدر پارے کہ ننا دیوان نا بناءغا ہی سلاہ تسوسن کہ اینو ہردے نا بزنس ئِ تورسا شش ستمبر آ ہیت کننگے تانکہ ننا چنا و پوسکنا نسل ئِ دادے انا اہمیت نا اندازہ مرے۔ نن تینا شہید آتے سلام پیش کینہ۔ مسکوہی اسپیکر قومی اسمبلی ڈاکٹر فہمیدہ مرزا پارے کہ شش ستمبر نا بابت صفائُ کلہو اس بایدے کائے۔ تحریک انصاف نا باسک سراج محمد خان شش ستمبر نا شہید آتے خراج عقیدت پیش کرسا پارے کہ اینو نادے دا ایوان آن دابابت اسہ جامع قرارداداس منظور کروئی مروسس۔ پیر بخش جونیجو پارے کہ پیر پگاڑ و اونا حرہ غاک ہم شش ستمبر آ دفاع وطن کن اہم کڑد ادا کریر و اوفتے ہم خراج عقیدت پیش کروئی مرے۔
