اسلام آباد۔ 06ستمبر (اے پی پی) وزیراعظم محمد نواز شریف سینیگال تون ہڑتوم آ کنڈآتا واپار ئِ ودفنگ کن ٹیکسٹائل ، کشاری مشینری و فارما سیوٹیکل نا بشخ آتیٹی کمکاری ٹی ودکی آ زورشاغانو۔ سے شنبے آ داڑے وزیراعظم ہاﺅس اٹی سینیگال نا صدر مکی سال اتون ون آن ون اوڑدہی نا وخت آ وزیراعظم سالانہ ہڑتوم آ کنڈآتا واپار نا ساڑی آ کچ 30.469ملین ڈالر ئِ اونا حقیقی لائخی تون ودفنگ آ زورشاغار۔ وزیراعظم نواز شریف پارے کہ سینیگال پاکستان نا پروڈکٹس بشمول چمڑا، چنکا انجینئرنگ نا گڑاتیان فائدہ ہرفے۔ اوپارے کہ دا چرجوئی ٹی وزیر واپار نا سرکڑدہی ٹی اسہ واپاری و زرکاری ڈل سینیگال نا دورہ ئِ کننگ کیک۔ وزیراعظم پارے کہ پاکستان سینیگال اٹی اسہ پاکستانی بینک اس ملنگ نا ہم جاچ ئِ ہلنگ ئِ ہراڑآن ہڑتوم آ ملک آتا نیام اٹ واپار و زرکاری ٹی آسراتی ملک۔ اومسکوہی سال نیویارک اٹی اقوام متحدہ نا جنرل اسمبلی نا سیشن نا وخت آ سینیگال نا صدر مکی سال اتون تینا اوڑدہی تا حوالہ ئِ تس ہراڑے ہڑتوم آ کسرشونک کیہی بشخ آتیٹی کمکاری ٹی ودکی آ اتفاق کریر۔ وزیراعظم محمد نواز شریف سال 2016-17 ءکن اقوام متحدہ نا سلامتی کونسل نا بے آخبتی باسک جوڑ مننگ نا چرجوئی ٹی سینیگال ئِ گچین کننگ آ سینیگال نا صدر ئِ مبارکبادی تس و اومیت ظاہر کرے کہ سینیگال اسلامی ملک آتا مفادات آتا رکھ ئِ باوری جوڑ کننگ آ سینیگال نا صدر نا صفت ئِ کرے و علاقائی ویل آتا ایسری کن اونا مثبت کڑد انا ذکر ئِ کرے۔ وزیراعظم محمد نواز شریف اسلام آباد اٹی سینیگال نا سفارتخانہ ملنگ نا چرجوئی ٹی سینیگال نا صدر نا فیصلہ نا خیرمقدم ئِ کرے و پارے کہ داڑآن ہڑتوم آ ملک آتا نیام اٹ کمکاری پین سوگو مریک۔ ہڑتوم آ ملک آک دفاعی بشخ ودفاعی خریداری ٹی کمکاری نا ہم جاچ ئِ ہلکر۔
