اسلام آباد۔ 06ستمبر(اے پی پی) پاکستان مسلم لیگ (ن) نا سینیٹر غوث محمدنیازی پارینے کہ پاکستان بھاز زوت دنیا نا مون آ بھلو معاشی واک اس جوڑ مرسا مون آ بریک۔ ریڈیو پاکستان تون ہیت و گپ کرسا اوپارے کہ پاکستان مسلم لیگ نا حکومت نا برسراقتدا بننگ نا وخت آ اودے دہشت گردی انتہاءپسندی ، توانائی تنکی و ایلو ویل آتا مون تروکی ئس واہم ساڑی آ حکومت دانشمندانہ حکمت عملی اس ردوبند ترسا بھلو حد اسسکان دا ویل آتا مون ئِ تورینے۔ اوپارے کہ ننا دور اقتدار نا اول دے تیٹی ملک لوڈشیڈنگ نا مشکل اٹی تموک ئس و حکومت نا گچین حکمت عملی نا سوب داسا لوڈشیڈنگ آ 90 درسد اسکان مون ئِ توننگانے۔ غوث محمد نیازی پارے کہ ساڑی آ حکومت نا گچین سفارتکاری و معاشی پالیسی تا بدولت پیشن نا زرکاری پاکستان آ بننگ ئِ و بھاز زوت پاکستان دنیا نا مون آ اسہ بھلو معاشی واک اس جوڑمرسا مون آ بریک۔ اوپارے کہ ہندا پالیسی تا سوب چین دنیا نا غٹ آن بھلا زرکاری ئِ پاکستان اٹی کننگ ئِ و او سمجھک کہ ساڑی آ حکومت باصلاحیت ئِ و او گڑاس کننگ و نشان تننگ خواہک۔ اوپارے کہ چین گوادر، سی پیک، سڑک آتا جوڑ جاڑ و توانائی نا کیہی پروجیکٹس آتیٹی زرکاری کننگ ئِ ہراڑآن معیشت اٹی گچینی بریک بے روزگاری نا خاتمہ مریک۔ اوپارے کہ وزیراعظم محمد نواز شریف نا اولین اولیت ملکی معیشت ئِ گچین جوڑ کننگ و توانائی تنکی نا مون ئِ توروئی ئِ۔ اوپارے کہ ہندا سوب ئِ کہ وزیراعظم توانائی نا غٹ پروجیکٹس آتا تینٹ چاروکی ئِ کننگ ئِ و اوفتے زوت آن زوت ایسری اسکان سرکننگ کن پارت ہم کرسا کیک۔ اوپارے کہ وزیراعظم نا عزم ئِ کہ 2018 اسکان ملک آن توانائی تنکی نا پوروی وڑاٹ خاتمہ ئِ کننگے۔
