اسلام آباد۔ 06ستمبر (اے پی پی) فیڈرل پبلک سروس کمیشن بل 2016ءقومی اسمبلی ٹی پیش کننگا ہراٹی تجویز کننگانے کہ گریڈ 11 آن 15اسکان نا ملازم آتا تقرر ہم پبلک سروس کمیشن نا کمک اٹ کروئی مرے۔ سے شنبے آ ایم کیو ایم پاکستان نا باسک ڈاکٹر فوزیہ حمید تحریک پیش کرے کہ فیڈرل پبلک سروس کمیشن بل 2016ءپیش کننگ نا موکل تننگے۔ ڈاکٹر فوزیہ حمید بل انا غرض و مقصد آتے پیش کرسا پارے کہ فیڈرل پبلک سروس کمیشن اہم ادارہ اسے واہم اونا واک آک محدود ئُ۔ دا ادارہ ئِ گریڈ 11 آن 15اسکان نا ملازم آتا تقررہم ایف پی ایس سی نا کمک اٹ بایدے مرے۔ بنجائی وزیر شیخ آفتاب احمد پارے کہ گریڈ 16نا ملازم آتا تقرر ایف پی ایس سی نا کمک اٹ مریک وخت اس کہ اوڑآن شیفکو گریڈ نا ملازم آتا تقرر وزارت آک تینٹ کننگ نا اختیار تخرہ۔ بل ئِ کمیٹی نا حوالہ کننگ اٹی ہچ ئُ حرف اس اف۔ تحریک نا منظوری آن گڈ ڈاکٹر فوزیہ حمید بل ئِ پیش کرے ہرا تعلقدار قائمہ کمیٹی نا حوالہ کننگا۔
