فیصل آباد۔03 ستمبر (اے پی پی) مزن وزیر محمد نواز شریف ئَ یک شمبے ئَ جِندی شوبگے تہ ئَ 40میگاواٹ ئِ اشکر ئَ چہ چلوکیں توان ئِ منصوبگ ئِ بُنگیج کت۔ اے موہ ئِ سر ئَ گورنر پنجاپ محمد رفیق رجوانہ، بُنجاھی وزیر آپ ئُُ توان خواجہ محمد آصف، بُنجاھی وزیر منصوبہ بندی ئُُ دیمروئی احسن اقبال ، بُنجاھی وزیر تجارت خرم دستگیر،وزیرمملکت آپ ئُُ توان عابد شیرعلی ئُُ ایندگہ مزن مزنیں کارندہ ساڑی اَتاں۔ستارہ کیمیکل انڈسٹریز لیمیٹڈ فیصل آباد ئَ 40میگاواٹ ئِ اشکر ئَ چہ چلوکیں توان گس ئِ بُنگیج پاور ئِ شوبگ ئَ وت واجئی ئِ نیمگ ئَ چہ یک گام اِت۔ چیف ایگزیکٹو ستارہ کیمیکلز انڈسٹریز میاں محمد ادریس ئَ اے موہ ئَ منصوبگ آنی سر ئَ چمشانک دات۔ جِندی شوبگ آنی تہ ئَ اے وڑیں گامگیج مزنیں گام ئُُ دلبڑی زانگ بنت۔ ایشی ئَ چہ ملک ئِ اندر ئَ توان ئِ کمیگ آناں پورا کنگ ئَ کمک رسیت۔ سے ارب ئُُ نیم ئِ ھرچ ئُُ درچ ئَ جوڑ بوھوکیں اشکر ئَ چہ چلوکیں ستارہ کیمیکل فیصل آباد ئَ 40میگاوٹ ئِ توان گس صنعتی شوبگ ئِ تہ ئَ وتی مٹ وت اِنت ئُُ مستریں جِندی منصوبگ اِنت۔ نوکیں ٹیکنالوجی ئِ اے منصوبگ اِت، ایشی ئِ مشین وتی چار گزار ئَ وت کن اَنت۔ ایشی ئِ سبب ئَ 24کلاک ئَ ایش چلیت۔ استیں حکومت ئَ کاروباری برات آناں باز موہ دیگ ئِ دل یکیمی داتگ۔ حکومت ھاسیں رنگ ئَ جِندی شوبگ ئِ نیمگ ئَ توان ئِ صنعتی لوٹ ئَ را پورا کنگ ئِ ھاتراپاور ئِ منصوبگ آنی دلبڑی ئَ کنگ ئَ اِنت تانکہ نیشنل گرڈ ئِ بار کم کنگ بہ بیت۔
