اسلام آباد۔ 02ستمبر (اے پی پی) پختونخوا ملی عوامی پارٹی نا سروک و قومی اسمبلی نا باسک محمود خان اچکزئی پارینے کہ اسہ وار ولدا جمہوریت نا برخلاف صف بندی مننگ ئِ، وزیراعظم نواز شریف عید آن پد پارلیمنٹ نا اسیجائی دیوان ئِ بٹنگے۔ جمعہ آ پارلیمنٹ ہاﺅس نا پیشن پریس کانفرنس کرسا اوپارے کہ پارلیمنٹ 20 کروڑ الس نا نمائندہ ئِ۔ اوپارے کہ مسکوہی ٹی کینیڈین شاری اس پارلیمنٹ ہاﺅس نا مون آ دھرنہ تس و داوخت آ سیکورٹی کارندہ غاتے بیدادی نا نشانہ جوڑ کننگا، حکومت ہراوڑ الطاف حسین نا برخلاف برطانیہ ئِ چھٹی اس نوشتہ کرے ہنداوڑ طاہر القادری نا برخلاف کینیڈین حکومت ئِ چھٹی اس نوشتہ کننگے۔ اوپارے کہ طاہر القادری پارلیمنٹ و جمہوریت نا برخلاف صف بندی کننگ ئِ، دا جھگڑہ ئِ حکومت تنیا ختم کننگ کپک و نہ ہی اسہ ادارہ اس ختم کننگ کیک ، ہنداخاطران اپوزیشن جماعت و الس ئِ فرنٹ لائن آ برسا اسیجائی ایسری اس کشوئی مریک۔ اووزیراعظم نواز شریف آن عید آن دمدستی گڈ پارلیمنٹ نا اسیجائی دیوان اس بٹنگ انگ نا خواست ئِ کرے وپارے کہ ملک اٹی ودوک آ دہشت گردی و دھرنہ غاتون اوار غٹ ویل آتا ایسری اس کشنگ کن دا گام المی ئِ۔ اوپارے کہ اسہ وار ولدا جمہوریت نابرخلاف صف بندی مننگ ئِ۔ قادری اول دھرنہ تس و داسا دُوارہ دھرنہ تننگ کن بننگ ئِ ، دا پارلیمنٹ آ جلہو ئِ ولے اودے ہچ گہس جرم مننگ پننگ ئِ ہراافسوزناک ئِ۔ اوپشاور و مردان اٹی جلہو آتا ترند انگا لو ز آتیٹی مذمت ئِ کرینے۔
