23 سد ایکڑ آ تالان گوادر فری زون چائنہ اوورسیز پورٹ ہولڈنگ کمپنی جوڑ جاڑ کیک
گوادر بزنس سروس کمپلیکس 2 ارب روپئی نا خڑچ آن اِرا سال اٹی پور و مریک، داڑے کنٹینریارڈ ہم جوڑ جاڑ مریک
شادی کورڈیم اٹی 45ہزار ایکڑ فٹ دیر کوڑی کننگ نا گنجائش مریک
گوادر۔ 01ستمبر (اے پی پی) وزیراعظم محمد نواز شریف پنچ شنبے آ داڑے اسہ ڈیم، گوادر فری زون ، بزنس کمپلیکس تون اوار چندی شونداری ڈٹ آتا افتتاح ئِ کرے ہرافتا مقصد ملک انا مر مر انگا علاقہ غاتے بنجائی دنگ اٹی اتنگ و شون و شونہالی نا بھرم آتیان مستفید کروئی ئِ۔ گورنر بلوچستان محمد خان اچکزئی ، وزیراعلیٰ نواب ثناءاللہ زہری، بنجائی وزیر ڈٹ بندی و شون احسن اقبال ، بنجائی وزیر پورٹ و شپنگ میر حاصل خان بزنجو و قومی سلامتی سلاہکار لیفٹیننٹ جنرل (ر) ناصر جنجوعہ ہم وزیراعظم تون اوار ئسر۔ دود اٹی پاکستان اٹی چین نا سفیر سن وائی ڈونگ ہم ساڑی ئس۔ داوخت آ وزیراعظم ئِ کیہی ڈٹ آتا بارواٹی بریفنگ تننگا۔ وزیراعظم گوادر اٹی 23سد ایکڑ آ تالان گوادر فری زون نا بنداو ئِ تخاہرادے چائنہ اوورسیز پورٹ ہولڈنگ کمپنی جوڑ جاڑ کیک۔ گوادر فری زون نا انفراسٹرکچر اسہ سال اسے ٹی جوڑجاڑ مریک۔ گوادر فری زون اٹی انڈسٹریل یونٹس جوڑجاڑ مریک۔ دا فری زون 23سال اکن ٹیکس آن مستثنیٰ مریک۔ وزیراعظم 4لکھ ڈالر نا خڑچ آن فقیر آباد،گوادر اٹی چین پاکستان پرائمری اسکول نا بنداو ئِ ہم تخا دا ڈٹ کمیونسٹ پارٹی چین نا کنڈآن ٹیکی اسے۔ وزیراعظم گوادر بزنس سروس کمپلیکس نا ہم بنداو ئِ تخا ہراڑے کمپنی، درآمد، برآمد کنندگان آتا دفتر آک مریرہ، دا ڈٹ آ 2ارب روپئی خڑچ بریک و دااِراسال اٹی پورو مریک وخت اس کہ ہراڑے کنٹینر یارڈ ہم جوڑ جاڑمریک۔ اوٹی بزنس سروس کمپلیکس نا اڈتننگ ، لنگر انداز جہاز آتا عملہ کن سی مین سینٹر اس ہم جوڑ کننگک۔ وزیراعظم گوادر اٹی شادی کورڈیم نا ہم افتتاح ئِ کرے ہراڑآن پسنی و ایلو علاقہ غاتا رہینگوک آتے آبپاشی کن دیر دوئی مریک۔ وزیراعظم ساور کورڈیم نا ہم افتتاح ئِ کرے ، دا ڈیم آجون 2011ءٹی کاریم نا بناءمسوسس داٹی 45ہزار ایکڑ فٹ دیر کوڑی کننگ نا گنجائش مریک۔ وزیراعظم یونیورسٹی آف گوادر نا بنداو ئِ ہم تخاہرا ملک انا مر مر انگا علاقہ غاتے ٹی خلقت آتے آب اٹو تعلیم ایتک و قومی شون نا عمل ئِ مون آ دننگ اٹی کمک رسینگک۔
