اسلام آباد۔ 31 اگست (اے پی پی) مسکوہی سفیر عابدہ حسین پارینے کہ امریکہ بھارت ئِ چین انا متبادل نا وڑاٹ مون آ اتنگ خواہک۔ ریڈیو پاکستان تون ہیت وگپ کرسا اوپارے کہ بھارت امریکہ تعلقداری تیٹی گچینی نا کوشست آک مسکوہی 10 آن 15سال آن کننگارہ ہراداسا مون آ بسنے۔ اوپارے کہ ہڑتوم آ ملک آتا نیام اٹ تعلقداری نا غٹ آن بھلا سوب بھارت نا سلہہ غاتا بھلا ہلوک مننگ تون اوار اوار امریکہ تون گچین واپاری لین دین ہم ارے۔ اوپارے کہ داوخت آ بھارت 51 ارب ڈالر نا سلہہ ہلسا امریکہ غان سلہہ ہلوک آ غٹ آن بھلا ملک جوڑ مسنے۔ عابدہ حسین پارے کہ بھارت نا کنڈآن داخہ بھلو کچ اسے ٹی سلہہ نا ہلنگ آن ڈیہہ ٹی گڑی خننگک۔ اوپارے کہ بھارت ڈیہہ ٹی نزوری و بے چینی تالان کننگ خواہک وخت اس کہ پاکستان اقتصادی راہداری کون آ ڈٹ آتیا کاریم کرسا شون و شونہالی نا کسرتے ملنگ نا خواہش مند ئِ۔ امریکہ بھارت تعلقداری نا پاکستان آزئم آتا بابت آن چست کروک آ سوج انا ورندی ئِ ترسا اوپارے کہ دا دے تیٹی پاک امریکہ تعلقداری ٹی گڑاس فاصلہ بسنے اونا باوجود پاکستان ئِ نسخان مفک انتئے کہ پاکستان اسہ جوہری واک اسے و تینا دفاع ئِ کننگ چاہک۔ اومستی پارے کہ بھارت نا کنڈآن سلہہ غاتا ہلنگ و امریکہ تون معاہدہ آن ڈیہہ ٹی عدم توازن نا حالیت ودی مریک۔
