اسلام آباد۔ 31 اگست(اے پی پی)دفاعی امور نا چاہندار ڈاکٹر فرحت حق پارینے کہ امریکہ ئِ مرے کہ او کشمیر اٹی بھارتی بیدادی ئِ بند کرفنگ و ویل انا ایسری کن تینا کڑد ئِ ادا کے۔ ریڈیو پاکستان تون ہیت وگپ کرسا اوپارے کہ بھارت دنیا نا مون آ تینے بھلو جمہوری ملک اس ظاہر کیک وخت اس کہ حالیت آک اونا باالکل جتائُ اونا تہہ نا حالیت، نیزگاری ، شیفکو ذات آتون برتاﺅ و کشمیر اٹی بیدادی اونا مکروہ دروشم ئِ دنیا نا مون آ پیش کیک۔ اوپارے کہ امریکہ صدر اوباما مودی تون تینا ذاتی تعلقداری و ڈیہہ ٹی چین نا مقابلہ ٹی بھارت ئِ اسہ پوسکن ئُ واک اسے نا وڑاٹ مون آ اتنگ نا بنداو آ ہڑتوم آ ملک آتا تعلقداری تے مون آ دننگ ئِ۔ اوپارے کہ دنیا بھارت نا سفارتی تعلقداری و واپار ئِ ہرک اونا منفی پروپیگنڈہ غاتے نظر انداز کیرہ۔ ڈاکٹر فرحت حق پارینے کہ امریکہ بے لوز اٹی کشمیر اٹی بھارتی بیدادی نا تنقید ئِ تو کیک واہم اودے مرے کہ او صاف لوز اٹی کشمیر اٹی بھارت نا کنڈآن انسانی حق انا پامالی تیا ہیت کے۔ اوپارے کہ امریکہ ئِ مرے کہ او ویل انا ایسری کن تینا کڑد ئِ ادا کے۔
