اسلام آباد۔ 29 اگست (اے پی پی) وزارت داخلہ نا کنڈآن شاری تے سلہہ لیسنس کمپیوٹرائزڈ کرفنگ نا یات دہانی تا باوجود شاری تا بھلو کچ اس داوخت اسکان وزارت داخلہ تون رجوع کتنو۔ تخوک آ تاریخ آن پد دا شاریک کانودی مشکلات و ویل آتا گواچی مننگ کیرہ۔ وزارت نا ذرائع دوشنبے آ پارے کہ وزارت داخلہ مسکوہی دور اٹی جاری مروک آ سلہہ لیسنس آتے کمپیوٹرائزڈ و تجدید کرفنگ کن شاری تے وار وار موقع ترسا کرے و دارداٹ کیہی وار اخبار آتیٹی اشتہار ترسا شاری تے خبردار کننگا کہ او تخوک آ مدت اٹ تینا لیسنس آتے کمپیوٹرائزڈ و تجدید کرفیر۔ شاری تا بھلو کچ اس اگرچہ دا مہم آن پد تینا لیسنس آتے کمپیوٹرائزڈ کرفیر و داوخت آ بھلو کچ اسے ٹی بوگس سلہہ لیسنس آتا پیدواری ہم مس۔ ہراڑآ تعلقدار بندغ و اوٹی اوار افسر و کارندہ غاتا برخلاف کارروائی ہم کننگا واہم داساہم بھلو کچ اسے ٹی ہندن ئُ شاری ارے ہراک لیسنس آتے کمپیوٹرائزڈ کرفنگ کن نادراتون رجوع کتنو۔ وزارت داخلہ دننگا شاری تے داسا 30نومبر 2016ءاسکان گڈیکو ڈیڈلین تسنے کہ تینا لیسنس آتے کمپیوٹرائزڈ و تجدید کرفیر۔ ایلو دروشم اٹی او لیسنس آتے نہ صرف منسوخ کننگک بلکن کانودی کارروائی نامون تروئی ہم تمک۔ نادرا کمامدارآک پاریر کہ شاری تے مرے کہ آخریکو تاریخ نا انتظار ئِ کننگ آن بیدس داسی آن شاریک نادرا نا تعلقدار دفتر آتون رجوع کیرو تینا سلہہ لیسنس آتا تجدید ئِ کرفیر و ہموشاریک ہرافتے تون داوخت اسکان متکنا کاپی والا لیسنس ارے او اوفتے جمع کرفسا کمپیوٹرائزڈ کارڈ دوئی کیر۔
