چمن۔ 29 اگست (اے پی پی) جماعت اسلامی پاکستان نا بنجائی امیر سینیٹر سراج الحق پارینے کہ کرپشن اسہ ناسور اس جوڑ مسنے، بدعنوانی نا چٹفنگ آن بیدس ملکی شون ناگزیر ئِ، بلوچستان اٹی نیزگاری انتہاءاسکان سرمسنے۔ داخیال آتا درشانی ئِ جماعت اسلامی نا کنڈآن کرپشن فری پاکستان نا عنوان آن چمن اٹی اسہ بھلو لس جلسہ سے آن تران کرسا کرے۔ جماعت اسلامی نا بنجائی امیر سینیٹر مولانا سراج الحق پارے کہ اینو دُوانزدہ دے مننگ نا باوجود پاک اوغان چمن بارڈر آ درگہ پوروی وڑ اٹ بند ئِ ہرانا سوب لکھ آ بندغ آتے ہڑتوم آ کنڈآتیان مشکلات آتا مون تروکی ئِ۔ اوپارے کہ پاکستان ئِ سوگو جوڑ کننگ کن بلوچستان نا الس ئِ شونہال جوڑ کروئی مریک پاکستان نا برخلاف نعرہ خلوک آک تینٹ مردہ باد ئُ۔ سینیٹر سراج الحق پارے کہ پاک اوغان باڈر نا بابت تینٹ بنجائی وزیر داخلہ تون ہیت کیوہ تانکہ چمن بارڈر آ باب سنگتی نا گیٹ ملنگ کے۔ اوپارے کہ اوغانستان تون سنگتی و ایلمی نا رشتہئِ سوگو کے و اوغانستان اٹی امن نا اڈتننگ کن پاکستان ئِ سخت کوشست کروئی مرے انتئے کہ ہراتم اوغانستان اٹی امن مریک تو پاکستان اٹی ہم امن مریک۔
