اسلام آباد۔ 22 اگست (اے پی پی) بنجاایوان ہائے صنعت و واپار پاکستان (ایف پی سی سی آئی ) سلاہ تسنے کہ کشاری بشخ ئِ ہم چین پاکستان اقتصادی راہداری ڈٹ (سی پیک) اٹی اوڑدہ کننگے۔ ایف پی سی سی آئی نا ریجنل قائمہ کمیٹی کشت و کشار و ہائی کلچر نا چیئرمین احمد جواد طبی مدت نا ڈٹ بندی نا رداٹ چین و سویلی ایشیاءنا ملک آتے کشاری مصنوعات آتا برآمدات آتا مون آ دننگ نا چرجوئی ٹی کشاری بشخ ئِ سی پیک اٹی اوڑدہ کننگ آ زورشاغانے۔ او دوشنبے آ ”اے پی پی“ تون خصوصی ہیت وگپ کرسا پارے کہ او ملک آتے پاکستان آن کینو، اِلار، امب، امرود، کھیلا ، خرن ئُ مرچی ، ٹماٹر تون اوار ایلو میوہ و سوزی تا برآمدات آتے ودفسا قیمتی زرمبادلہ کٹیا کننگ مریک۔ اوپارے کہ مسکوہی مالی سال اٹی نن اقتصادی کچ نمو نا ہدف دوئی کننگ کتویسن و سی پیک ننا توانائی و بنداوی ڈھانچہ نا مشکلات آتا خاتمہ ٹی کمکار ثابت مریک ہراڑآن کشاری بشخ انا شون اٹی ہم کمک رسینگک۔ احمد جواد پارے کہ کشاری بشخ انا اہمیت نا پیش نظر بشخ ئِ سی پیک اٹی اوڑدہ کننگ نا گرج ئِ وخت اس کہ شنگھائی کمکار تنظیم اٹی شرکت آن ننے اسہ بھلو منڈی اسسکان رسینگ دوئی مریک ۔ اسہ سوج اسے نا ورندی ٹی اوپارے کہ سی پیک ڈٹ آن حقی استفادہ کن المی ئِ کشاری بشخ انا ویل آتا تدارک کن جامع پالیسی اس مرتب کننگے و دابابت ڈٹ بندی کمیشن ئِ کڑد ادا کروئی مرے تانکہ بشخ انا برآمدات آتیٹی خاطر خواہ ودکی آن قیمتی زرمبادلہ نا دوئی ٹی ودکی کننگ مریک ہراڑآن نہ صرف خلقی معیشت بلکن قومی شون آ ہم خوشگوار زئم تمک۔
