آئی بی سی سی ءَ 27 سرکاری وانگ ءُ زانگ ءِ بورڈ آنی تہ ءَ امتحان ءِ رہبند یک رنگ کنگ ءِ واستہ نیشنل انڈیکیٹر ءِ سر ءَ کار بندات

اسلام آباد۔14اکتوبر  (اے پی پی): انٹر بورڈز کوآرڈینیشن کمیشن (آئی بی سی سی) ءَ راجی چکاس ءِ سٹینڈرڈ انڈیکس ءِ سر ءَ کار دیم ءَ برتگ تانکہ ملک ءِ 27سرکاری وانگ ءُ زانگ ءِ بورڈ آنی تہ ءَ چکاس ءِ سٹینڈرڈ یک رنگ، شفاف ءُ میاں اوستمانی لوٹ آنی رد ءَ جوڑ کنگ بہ بنت۔ اے درگت ءَ چار شمبے ءِ روچ ءَ اسلام آباد ءَ آئی بی سی سی سیکرٹریٹ ءَ نیشنل امتحان اسٹینڈرڈ انڈیکس ءِ سٹیئرنگ کمیٹی ءِ اولی دیوان برجم دارگ بوت ایشی ءِ سروکی آئی بی سی سی ءِ ایگزیکٹو ڈائریکٹر ڈاکٹر غلام علی ملاحح  ءَ کت۔ وزارت وفاقی وانگ ءُ زانگ ءُ پیشہ وارانہ تربیت ءِ سیکرٹری ءِ ہدایت ءِ سرا برجم داشتگیں دیوان ءَ سرجمیں ملک ءَ سرکاری وانگ ءُ زانگ بورڈ آنی امتحانی نظام ءَ را گہتر کنگ ءِ ھاتر ءَ پیش کرتگیں فریم ورک، کارکردگی ءِ اشارہ، ٹارگٹ ءُ نفاذ ءِ گامگیج آنی سر ءَ چار ءُ تپاسی کنگ بیت۔ دیوان ءَ پیش کرتگیں اشارہ ءُ ٹارگٹ آناں گیش گہتر کنگ ءِ ھاترا یک ذیلی کمیٹی ءِ جوڑ کنگ بوتگ کہ آ وتی سفارشات آناں تیار کنت ءُ آیوکیں دیوان ءَ پیش کنت۔ راجی چکاس ءِ رہبندانی انڈیکس ءِ مول ءُ مراد سرجمیں ملک ءَ چکاس ءِ رہبند آنی ارزشت ءِ واستہ یک یک رنگیں، موثر ءُ معتبریں نظام ءِ جوڑ کنگ اِنت، ایشی ءِ وسیلگ ءَ چکاس ءِ کارروائی آنی تہ ءَ گہتری، وانگ ءُ زانگ ءِ بورڈ آنی کارکردگی ءُ آسر آنی تقابلی چار ءُ تپاسی، چکاس آنی تہ ءَ شفافیت ءُ الس ءِ اعتماد ءِ تہ ءَ گیشی ممکن بیت۔ اے گامگیج ءَ چہ پاکستان ءِ سیکنڈری ءُ ہائیر سیکنڈری وانگ ءُ زانگ ءِ اہلیت ءِ میاں اوستمانی منگ ءُ منگ ءِ دیمروئی ءَ ہم کمک رسیت، ایشی ءَ چہ پاکستان ءُ درملک ءَ ہائیر ایجوکیشن ءِ واھشت مندیں نودربر آنی واستہ گیش وانگ ءُ زانگ ءِ موہ پیداک بوت کنت۔ اے موہ ءِ سر ءَ ڈاکٹر غلام علی ملاح ءَ گوشت کہ راجی چکاس ءِ سٹینڈرڈ انڈیکس پاکستان ءِ چکاس ءِ نظام ءَ را نوک جوڑ کنگ، یک رنگیں سٹینڈرڈ ءِ بندات کنگ ءُ مُدامی گہتری آرگ ءِ نیمگ ءَ یک ھاسیں گامگیج اِنت۔ آئی ءَ گوشت کہ اے نظام چکاس ءُ جائزہ ءِ سٹینڈرڈ ءَ را گہتر کنگ، پاکستانی چکاس ءِ نظام ءَ را میاں اوستمانی سٹینڈرڈ آنی گوما ھمگرنچ کنگ ءُ ملک ءِ وانگ ءُ زانگ ءِ قابلیت آنی جھان ءِ منگ ءُ منگ ءَ را مھکم کنگ ءَ کمک رسیت۔ ڈاکٹر غلام علی ملاح ءَ گوشت کہ شفاف ءُ یک رنگیں معیار آنی سر ءَ عمل کنگ ءَ چہ چکاس آنی اعتبار ءَ را گیش کنگ ءُ نودربر آنی واستہ وانگ ءُ زانگ ءِ موہ آناں گیش کنگ ءَ کمک رسیت۔ آئی بی سی سی ءِ رد ءَ کمیشن سیادی داروکیں ادارگ ءُ وانگ ءُ زانگ ءِ بورڈ آنی کمک ءَ اے راجی گامگیج ءَ را دیم ءَ برگ ءَ انت تانکہ ملک ءَ یک شفاف، پکو ءُ میاں اوستمانی تک ءَ ھمگرنچیں چکاس ءِ نظام ءَ را دیمروئی دیگ بہ بیت۔