وزیر داخلہ محسن نقوی ءَ روسی ھمکار ولادیمیر کولاکولتسیف ءَ گوں گند ءُ نند کتگ، سیکورٹی ءُ جرم ءِ گر ءُ دار ءَ دو نیمگی کمک ءِ دیمروئی ءِ بابت ءَ گپ ءُ تران

اسلام آباد۔14اکتوبر  (اے پی پی): روس ءِ تہی کارانی وزیر ولادیمیر کولاکولتسیف ءَ وفاقی وزارت داخلہ ءِ تر ءُ تاب کتگ، اودا آئی ءَ وفاقی وزیر داخلہ محسن نقوی ءِ گوما ھاسیں گند ءُ نند کتگ ءُ دوئیں ملک آنی نیام ءَ ڈل آنی تک ءَ سرجمیں گپ ءُ تران بوتگ۔ گپ ءُ تران ءِ تہ ءَ وت مہ وتی سیت ءِ جیڈھ، یکجائی سیت ءِ شوبگ آنی تہ ءَ کمک ءِ دیمروئی ءُ ایمنی ءِ جیڈھ آنی سر ءَ سرجمی ءَ گپ ءُ تران کنگ بوت۔ وزارت داخلہ ءِ نیمگ ءَ جاڑی بوتگیں بیان ءِ رد ءَ منظم جرم ءِ گر ءُ دار ءِ واستہ دوئیں ملک آنی نیام ءَ کمک ءُ حالات آنی مٹ ءُ بدلی ءِ ھوالگ ءَ یک مفاہمت نامہ ءِ سر ءَ دستخط کنگ ءِ پیسلہ کنگ بوتگ۔ دوئیں داخلہ ءِ وزیراں زوتاں چہ زوت مجرم آنی حوالہ کنگ ءُ سزا یافتہ آنی بدلی ءِ ھوالگ ءَ منوگری آناں گڈی رنگ ءَ دیگ ءُ دوبر داخلہ ءِ منوگری ءِ سر ءَ ترندیں رنگ ءَ عمل کنگ ءِ سر ءَ تپاک کتگ۔ ایشی ءَ ابید منشیات ءِ قاچاق ءِ گر ءُ دار ءِ واستہ اینٹی نارکوٹکس فورس ءُ روس ءِ سیادی داروکیں ادارگ آنی نیام ءَ کمک ءَ را گیش کنگ ءِ ھم پیسلہ کنگ بوتگ۔ دوئیں نیمگاں اے گپ ءِ سر ءَ ھم تپاک کنگ بوتگ کہ دوئیں ملک آنی تہی کارانی وزارت آنی کارگس زوت یکے دومی ءِ ملک آناں تر ءُ تاب کن اَنت۔ گند ءُ نند ءَ پاکستان ءَ چہ روس ءَ ہنرمندیں کارکن ءِ دیم دیگ، سیل ءُ سواد ءُ کاروباری برات ءِ واستہ ویزہ ءِ آسراتی، سائبر کرائم ءِ گر ءُ دار ءُ نیشنل پولیس اکیڈمی اسلام آباد ءُ پولیس اکیڈمی آف روس ءِ نیام ءَ تربیتی شریکداری ءِ بابت ءَ ھم گپ ءُ تران کنگ بوت۔ وفاقی وزیر داخلہ محسن نقوی ءَ گوشت کہ منظم جرم ءِ گر ءُ دار ءِ ھوالگ ءَ پیش کرتگیں منوگری پاک ءُ روس ءِ وت مہ وتی کمک ءَ را دیمروئی دیگ ءِ واستہ یک ھاسیں سنگ میل ءِ ثابت بیت۔ آئی ءَ گوشت کہ ویزہ ءِ نظام ءِ آسراتی ءَ چہ دوئیں راج آنی نیام ءَ مردم آنی نیام ءَ مردم آنی رابطہ ءُ تجارتی چست ءُ ایر آناں دیمروئی رسیت۔ محسن نقوی ءَ گوشت کہ پاکستان سائبر کرائم ءِ ھلاپ ءَ جنگ ءِ واستہ روس ءِ نوکیں تکنیکی مہارت ءُ تجروبت آں چہ سیت زورگ لوٹ ایت۔ آئی ءَ گوشت کہ اے وھد ءَ روس ءِ جتاجتائیں یونیورسٹی آنی تہ ءَ نزیک ءَ 1300 پاکستانی نودربر وانگ ءَ انت ءُ پاکستان ءِ واھشت انت کہ گیش ءَ چہ گیش نودربر مزنیں وانگ ءُ زانگ ءِ واستہ روس ءَ برو انت۔ اے موہ ءِ سر ءَ روس ءِ تہی کارانی وزیر ولادیمیر کولاکولتسیف ءَ گوشت کہ ناشرکاری، منشیات ءِ سوداگری ءُ ناجائزیں ھجرت ءَ ھوار ھمک رنگ ءِ منظم جرم ءِ ھلاسی ءِ واستہ یکجائی ءُ ٹھوس گامگیج المی اَنت۔ آئی ءَ گوشت کہ روس ءَ جوانیں حکمت عملی ءُ گامگیج آنی سبب ءَ وتی ملک ءَ سائبر کرائم ءِ شرح ءَ را 33درسد ءِ مزنیں کمی ءِ سوبمند بوتگ ءُ آ اے پڑ ءَ پاکستان ءِ گوما کمک ءِ ودار ءَ انت۔ گپ ءُ تران ءَ تہی کارانی وزیر مملکت طلال چوہدری، پاکستان ءَ روس ءِ سفیر، تہی کارانی ھاسیں ءُ گیشیں سیکرٹری ڈی جی ایف آئی اے، کمانڈنٹ نیشنل پولیس اکیڈمی آئی جی ایف سی، ڈی جی نیشنل فرانزک ایجنسی، ڈی جی این سی سی آئی اے، ڈی جی پاسپورٹ، چیف کمشنر آئی جی آئی جی پولیس اسلام آباد ءِ کلانہ ایں  اپسراں ھم بھر زوری کت۔