اقتصادی استحکام اجتماعی کوشست ءِ نتیجہ اِنت۔ راجی معیشت ءَ را نوں صنعتی کاری ءُ برآمدات ءِ تہ ءَ گیشی ءِ بنیاد ءَ پائیدار دیمروئی ءُ روزگار ءِ پیداوار ءِ سر ءَ دلگوشی دیگ لوٹ ایت، پاکستان دگنیا ءِ نقشہ ءِ سرا یک طاقتوریں معیشت ءِ دروشم ءَ دیم ءَ کیت، مزن وزیر محمد شہباز شریف

کراچی۔1اکتوبر  (اے پی پی): مزن وزیر محمد شہباز شریف ءَ اقتصادی استحکام ءَ را ٹیم ورک ءُ برجاھیں محنت ءِ آسر لیکگ ءِ وھد ءَ گوشت کہ راجی معیشت ءَ را نوں صنعتی کاری ءُ برآمدات ءِ تہ ءَ گیشی ءِ بنیات ءَ پائیدار دیمروئی ءُ روزگار پیداک کنگ ءِ سر ءَ دلگوشی دیگ لوٹ ایت۔ معیشت ءِ مھکم کنگ ءِ واستہ نجی شعبہ ءُ سرمایہ کار آنی کرد کلیدی انت۔ تعمیراتی صنعت ءِ دیمروئی ملک ءِ معیشت ءُ روزگار ءِ ھاتر ءَ المی انت۔ اقتصادی جاور ھال آنی گہتری ءِ تہ ءَ سیاسی ءُ فوجی سروکی ءِ نیام ءَ وت مہ وتی کمک سک باز المی اِنت۔ حکومت ءَ بازیں وھد ءَ چہ رند ءِ گہتری کار  آناں سنجیدگی ءَ گوں عمل درآمد کتگ۔ پاکستان انشاءاللہ دنیا ءِ نقشہ ءِ سرا یک طاقتوریں معیشت ءِ رنگ ءَ سہرا بیت۔ آئی ءَ اے گپ پنچ شمبے ءِ روچ ءَ نیا نظیم آباد اپارٹمنٹس ءِ لسٹنگ ءِ موہ ءَ پاکستان اسٹاک ایکسچینج ءَ برجم داشتگیں ورچوئل گونگ مراگش ءَ گوں گشتانک دیان ءَ کت۔ اے موہ ءِ سر ءَ مزن وزیر ءِ ھمراھی ءَ وفاقی وزیر عطا اللہ تارڑ، میان ریاض حسین پیرزادہ، ڈاکٹر مصادق ملک ساڑی ات، وھدیکہ وزیر ھزانگ محمد اورنگزیب، گورنر اسٹیٹ بینک آف پاکستان، نامداریں کاروباری لیڈر عارف حبیب ءُ کارپوریٹ سیکٹر ءِ ھاسیں مردم مراگش ءَ بھر زوری کت۔ مراگش ءَ کیک ھم کٹ اتگ ات۔ مزن وزیر ءَ وتی گشتانک ءِ تہ ءَ گوشت کہ پاکستان ءَ نوں وتی معیشت ءِ تہ ءَ دیمروئی ءِ درشان کنگ لوٹ ایت ھاسیں رنگ ءَ برآمدات ءِ سروکی ءَ دیمروئی ءِ آسر ءَ روزگار، پیداواری چست ءُ ایر، سامان ءُ ازمت آنی سپلائی ءُ برآمدات ءِ تہ ءَ گیشی بیت ءُ پاکستان ءِ معیشت ءَ را گیش مھکم کنگ بیت وھدیکہ نجی شوبگ ءَ را دیمروئی دیگ ءِ ضلورت اِنت۔ مزن وزیر ءَ گوشت کہ پاکستان انشاء اللہ جھان ءِ نقشہ ءِ سر ءَ یک سکیں توانمندیں معیشت ءِ رنگ ءَ سہرا بیت ءُ جھان ءِ تہ ءَ پاکستان ءِ عزت ءُ شرپ سک باز گیش بیت۔ آئی ءَ گوشت کہ پاکستان ءِ معیشت ءَ را مشکلیں جاور آنی تہ ءَ چہ در کنگ ءُ وتی پاد آنی سر ءَ اوشتگ ءِ واستہ وفاقی حکومت ءُ سیادی داروکیں ادارگ آنی نیام ءَ ٹیم ورک مثالی اِنت، ایشی ءِ واستہ وزیر ءِ ھزانگ، آئی ءِ ٹیم، سیادی داروکیں وزیر، صوبائی سر وزیر ءُ ایندگر ادارگ آنی سروک مبارکی ءُ ستا ءِ مستحق اَنت۔ نیویارک ءُ لندن ءِ گوستگیں تر ءُ تاب ءِ وھد ءَ میاں اوستمانی بینکر ءُ مالیاتی شعبہ ءِ سروکاں گوں گند ءُ نند ءِ حوالہ ءَ مزن وزیر ءَ گوشت کہ میاں اوستمانی مالیاتی ادارگ آنی نیمگ ءَ پاکستان ءَ را ڈھانچہ ءِ گہتری کار  ءِ واستہ دیریں وھد ءَ چہ ودار بوتگیں کمک داتگ۔ آئی ءَ عمل درآمد ءِ توسیپ کت ءُ گوشت کہ حکومت ءَ دیراں چہ ودار بوتگیں گہتری کار  ءِ سر ءَ سنجیدگی ءَ گوں عمل درآمد کتگ، ایشی ءِ آسر ءَ مرچی پاکستان ءَ دلکشیں جاور گندگ بوھگ ءَ انت۔ آئی ءَ گوشت کہ نیویارک ءَ آئی ایم ایف ءِ منیجنگ ڈائریکٹر ءَ گوں گند ءُ نند ءِ ساھت ءَ آئی ءَ گوشت مزن وزیر اے نوکیں پاکستان اِنت، ایشی ءِ پسو ءَ من گوشت کہ اے نوکیں پاکستان نہ اِنت بلکیں نوکیں ٹیم اِنت کہ آئی ءَ یکجائی ءَ پاکستان ءِ اقتصادی جاور ھال گہتر کتگ اَنت۔ محمد شہباز شریف ءَ گوشت کہ اے ٹیم ورک اِنت ایشی ءِ تہ ءَ سیاسی ءُ فوجی سروکی اے سک باز ذمہ واریں کار ءَ را مزنیں شریک آنی رنگ ءَ دیم ءَ برگ ءَ اَنت۔ آئی ءَ گوشت کہ ھمے رنگ ءَ درملک ءَ زرّ دیم دیگ ءِ تہ ءَ گیشی بوتگ، آئی ٹی ایکسپورٹ ءِ تہ ءَ گیشی بوتگ ءُ روشن ڈیجیٹل اکاؤنٹ ءِ ھم جوانیں کارکردگی گندگ ءَ کیت۔ نوں اصل لوٹ پاکستان ءِ معیشت ءِ تہ ءَ دیمروئی ءِ درشان کنگ اِنت ءُ اے بُنکی رنگ ءَ برآمدات ءِ سروکی ءَ دیمروئی ءِ وسیلگ ءَ بہ بیت۔ ایشی ءَ چہ روزگار، پیداواری روزگار، پیداوار، سامان ءُ ازمت آنی سر کنگ ءُ برآمدات ءِ تہ ءَ گیشی بیت، ایشی ءَ چہ پاکستان ءِ معیشت گیش مھکم بیت۔ مزن وزیر ءَ گوشت کہ اے درستیں کار نجی شوبگ ءَ کنگ لوٹ ایت، ایشی ءِ واستہ حکومت ءِ نیمگ ءَ چہ جار جتگیں بجٹ ءَ ایکسپورٹر، مینوفیکچررز ءُ صنعت آنی واستہ بازیں سد ارب کلدار ءِ ٹیکس ترغیب پجاری کنگ بوتگ۔ تعمیراتی صنعت ءِ حوالہ ءَ آئی ءَ عارف حبیب ءَ را ’’ریٹ‘‘ ءِ ڈھانچہ ءِ تہا نوکیں ناظم آباد ءِ بندات کنگ ءِ سرا مبارک بات دات ءُ گوشت کہ لاہور ءُ کراچی ءَ ہمے ڈھانچہ ءِ تہا جوڑ بوتگیں منصوبگ سک باز ستا کرز انت۔ سرمایہ کاری مارکیٹ ءِ کارکردگی ءِ توسیپ کنان ءَ آئی ءَ گوشت کہ ایشی ءِ کارکردگی سک باز جوانیں، البت ایشی ءِ تہ ءَ انگت ءَ لھتیں ردی ءُ کمزوری است انت۔ آئی ءَ گوشت کہ خطہ ءِ ملک آنی اسٹاک ایکسچینج آناں ھیال ءَ دارگ ءَ سرمایہ مارکیٹ ءَ ھما بدلی آنی واستہ ترندی ءَ گوں گامگیج کنگ بہ بیت کہ آرگ بہ بیت۔ محمد شہباز شریف ءَ اے وڑیں لھتیں صنعت آنی کارکردگی ءِ سر ءَ جیڈھ ءِ درشانی کت ءُ درآمد ءِ بدلی ءِ ھاترا جوڑ بوتگیں صنعت آنی ذکر کنان ءَ گوشت کہ نزیک ءَ 60 سال پیسر اے درگت ءَ لھتیں صنعت یک مھکمیں وژن ءِ چیر دستی ءَ جوڑ کنگ بوتگ اَنت، آھاں کمک ءُ سبسڈی دیگ بوتگ تانکہ اے صنعت آناں پیداواری روزگار ءُ روزگار ءِ وسیلگ ءَ دیمروئی دات کن اَنت۔ ذاتی مفاد آنی سر ءَ راجی مفاد ءَ را اولیت دیگ ءُ ایمانداریں رپک ءِ زورگ ءِ سر ءَ زور پر دیان ءَ گوشت کہ دیمروئی ایوک ءَ نوکیں مشینری، پیداواری ءُ محنت ءِ وسیلگ ءَ ممکن اِنت۔ مزن وزیر ءَ گوشت کہ جاور ھما وھد ءَ بدل بنت کہ ھون ریچی بہ بیت، شپ ءُ روچ محنت کنگ بہ بیت ءُ پاکستان ھما جاگہ ​​ءَ برگ بہ بیت کہ آئی ءِ ھک اِنت۔ آئی ءَ یک رندے پدا عارف حبیب ءَ را مبارک بات دات ءُ گوشت کہ بجٹ ءَ تعمیراتی صنعت ءَ را داتگیں ترغیب آنی آسر کم کم ءَ درکپگ ءَ انت ءُ اے صنعت نوں ھاسیں رنگ ءَ کراچی ءَ دیم ءَ روگ ءَ انت وھدیکہ پاکستان ءِ دگہ دمگ آنی تہ ءَ ھم ایشانی اثر گندگ بوھگ ءَ بندات بوتگ انت۔ مزن وزیر ءَ گوشت کہ اے شوبگ ءَ سرجمی ءَ دلگوشی دیگ بہ بیت۔ آئی ءَ گوشت کہ اے گپ ءِ گوشگ ھم کم اِنت کہ 40صنعت آنی پیداوار تعمیراتی انڈسٹری ءَ اَنت۔ مزن وزیر محمد شہباز شریف ءَ گوشت کہ اے یک جوانیں ٹیم ورک انت ءُ ٹیم ورک ءَ ابید کدی ھم آسراتی نہ رس ایت۔ آئی ءَ گوشت کہ اے یک چمکداریں مثال اِنت کہ دیم ءَ روگ ءَ ھرچ شوبگ ءَ وتیگ کنگ بیت گڈا ان شاءاللہ آسر سک باز جوانیں ءُ وشیں بیت۔ چیئرمین نیب ءِ کوشست آں ساڑاھگ ءَ آئی ءَ گوشت کہ آئی ءَ نہ ایوک ءَ برآمد کتگ بلکینگ ءَ ارباں بلکیں کھرباں کلدار ءِ زمین ھم درگیتکگ انت۔ مزن وزیر ءَ لینڈ بینک ءِ جوڑ کنگ ءِ منصوبگ ءَ را ھم ساڑات۔ آئی ءَ ھاسیں رنگ ءَ وزیر ءِ ھزانگ، کابینہ ءِ باسک، فیڈرل بورڈ آف ریونیو ءُ وفاقی سیکرٹری آنی منت گپت ءُ گوشت کہ آھاں اقتصادی استحکام ءِ یک کار کنوکیں ماڈل ءِ جوڑ کتگ کہ ایشی ءَ را ایندگر شوبگ آنی تہ ءَ ھم زورگ بوت کنت ءُ ایشی ءِ آسر ءَ پاکستان پائیدار دیمروئی ءِ راہ ءَ پدا واتر بوتگ۔ مزن وزیر ءَ گوشت کہ گہتری کار  آنی سر ءَ جوانیں رنگ ءَ عمل درآمد ءُ اقتصادی برجائی سیاسی ءُ مالیاتی سروکی ءِ نیام ءَ سرجمیں ھمگرنچی ءِ بنیات ءَ یک ھمگرنچیں شریکداری ءِ آسر اِنت۔ کلیدی اقتصادی اشارہ آنی ذکر کنان ءَ آئی ءَ گوشت کہ پاکستان ءَ سوبمندیں رنگ ءَ 3ارب ڈالر ءِ یوروبانڈ جاری کتگ ایشی ءِ واستہ 6ارب ڈالر ءِ آفر رستگ اَنت وھدیکہ اسٹیٹ بینک آف پاکستان ءِ درملکی زرّ ءِ ذخیرہ ءِ کساس 21.4ارب ڈالر بوتگ ءُ تجارتی بینک آنی ذخیرہ 5.5ارب ڈالر ءَ سر بوتگ۔ آئی ءَ گوشت کہ زرّ دیم دیگ ءُ آئی ٹی ایکسپورٹ ھم گیش بوھگ ءَ انت، وھدیکہ روشن ڈیجیٹل اکاؤنٹ ءِ کارکردگی ھم دلبڈی انت۔ البت مزن وزیر ئَ استحکام ئَ چہ دیمروئی ئِ نیمگ ئَ رؤگ ئِ سر ئَ زور پر دات۔ آئی ئَ گوشت کہ ٹیکنالوجی، روزگار ئِ موہ، پیداوار ئُُ برآمدات ئِ بنیات ئَ اقتصادی دیمروئی ئِ وسیلگ ئَ چہ ملک ئِ معیشت ئَ را دیم ئَ برگ ئِ واستہ گیش گامگیج کنگ لوٹ ایت۔ آئی ءَ یات دات کہ مالی سال 2026-27ءِ وفاقی بجٹ ءَ برآمد کنوک، صنعت کار ءُ جتا جتائیں صنعتی شوبگ آنی واستہ تعمیراتی شوبگ ءَ ھوار سداں ارب کلدار ءِ ٹیکس ءِ ترغیب ءُ آسراتی داتگ۔ مزن وزیر محمد شہباز شریف ءَ راجی سلامتی ءُ اقتصادی دیمروئی ءِ واستہ دائمی کمک ءُ جزم ءِ پد ءَ دفاعی اُرد ءِ سروک ءُ اُرد ءِ سروک فیلڈ مارشل سید عاصم منیر ءَ را شگر ءُ منت گپت۔ آئی ءَ گوشت کہ اے رنگیں دل سھل ءُ برجائی ءِ کوشست آنی وسیلگ ءَ پاکستان یک مھکمیں معیشت ءِ رنگ ءَ سہرا بیت ءُ دگنیا ءَ وتی جاگہ ​​ءُ نام جوڑ کنت۔ ایشی ءَ چہ پیسر نامداریں کاروباری مردم عارف حبیب ءَ مراگش ءَ گوں گشتانک دیان ءَ گوشت کہ دمگی مارکیٹ آنی مقابلہ ءَ پاکستان ءِ سرمایہ مارکیٹ ءِ کارکردگی جوانیں رنگ ءَ بوتگ، سرمایہ کار آنی نیمگ ءَ سرمایہ کار آنی نیمگ ءَ رجحان گیش بوھگ ءَ اِنت، پاکستانی کرنسی ءِ ارزشت زیات بوھگ ءَ اِنت۔ آئی ءَ گوشت کہ بنجاہی سرمایہ کار پاکستان ءَ استیں سرمایہ کاری ءِ موہ آں چہ پائدگ چست بہ کن انت۔ عارف حبیب ءَ گوشت کہ جھان ءِ سرمایہ کار پاکستان ءِ اقتصادی جاور ھال ءُ حکومتی پالیسی آنی سر ءَ چماں دارگ ءَ اَنت پمیشکا جھان ءِ پڑ ءَ پاکستان ءَ را گیش ءَ چہ گیش پدر کنگ ءِ ضلورت اِنت۔