ذمہ واریں رسانکدر راجانی نیام ءَ دل یکیمی ءُ دود ءُ ربیدگ ءِ گپ ءُ تران ءَ را دیم ءَ برگ ءَ انت، وجیہہ  قمر

باکو۔1اکتوبر  (اے پی پی): وفاقی وانگ ءُ زانگ ءُ پیشہ وارانہ تربیت ءِ وزیر مملکت وجیہہ  قمر ءَ گوشت کہ تیزی ءَ گوں بدل بوھوکیں جھان ءُ ڈیجیٹل چاگرد ءَ رسانکدر ءِ ذمہ واری ایوک ءَ ھال ءُ اھوال ءِ شنگ کنگ ءَ گوں بندوک نہ اِنت بلکیں رسانکدر راج آنی نیام ءَ بھروسہ، چاگردی ھمگرنچی ءُ دود ءُ ربیدگی گپ ءُ تران ءِ دیمروئی ءِ تہ ءَ کلیدی کرد پیلو کنت۔ آئی ءَ اے ھیالانی درشانی آذربائیجان ءِ بنجاھی شھر باکو ءَ برجم داشتگیں اولی سی آئی سی اے میڈیا فورم ءَ گوں تران کنان ءَ کت۔ فورم ءِ مستریں بنگپ ’’یک بہر ءُ بانگ بوتگیں دگنیا ءِ تہ ءَ میڈیا ءِ وسیلگ ءَ بھروسہ ءِ دیمروئی‘‘ بوتگ وھدے کہ وجیہہ  قمر ءَ ’’چاگردی ھمگرنچی ءُ دود ءُ ربیدگی گپ ءُ تران ءِ دیمروئی ءِ تہ ءَ میڈیا ءِ کرد‘‘ ءِ سرھال ءِ سر ءَ پاکستان ءِ نمائندگی کتگ۔ وزیر مملکت ءَ گوشت کہ مرچی میڈیا ایوک ءَ زانتکاری ءِ وسیلگ نہ اِنت بلکیں جتا جتائیں راج آنی بابت ءَ راج ءِ رائے، چاگردی بیانیہ ءُ لیکہ آنی جوڑ کنگ ءِ سر ءَ ھم مزنیں اثرے داریت۔ اے گیش بوھوکیں اثر ءُ رسوخ ءِ سبب ءَ رسانکدر ءِ ذمہ واری ھم باز رند ءَ گیش بوتگ۔ آئی ءَ گوشت کہ دروگیں یا گمراہ کنوکیں بیانیہ چاگرد آنی نیام ءَ دوری، نادلگوشی ءُ بے باوری ءَ را گیش کنگ ءَ انت وھدیکہ مستند ءُ ذمہ واریں اھوالکاری ءَ چہ جتا جتائیں راج، دود ءُ ربیدگ ءُ چاگرد آناں یکے دومی ءِ گوما نزیک کنگ بیت۔ رسانکدر چاگردانی نیام ءَ دوری ءَ ھم گیش کنت ءُ ھمے دوریانی سر ءَ پُل ھم جوڑ کنت۔ پاکستان ءِ یک ھاسیں لیکہ ءِ است انت کہ ما پُل جوڑ کنگ ءِ راہ ءَ بہ زوریں ۔ واجہ قمر ءَ ڈیجیٹل دور ءِ چیلنج آنی بابت ءَ گپ جنان ءَ گوشت کہ سوشل میڈیا ءَ چہ لکاں مردم آناں دگنیا ءِ تہ ءَ سر بوھگ ءِ موہ داتگ بلے ردیں ھال، گمراہ کنوکیں ھال ءُ تپاکی ءِ بیانیہ آنی شنگ ءُ تالان کنگ ءَ ھم ترندی اتکگ۔ آئی ءَ اے گپ ءِ سر ءَ زور پر دات کہ اے چیلنج ءَ را نہ ایوک ءَ گیشیں زانتکاری ءِ گوما بلکن ءَ گیشیں مستندیں زانتکاری، مھکمیں صحافتی ءُ پیشہ وارانہ معیار، میڈیا سواد ءُ ذمہ وار ڈیجیٹل شہریت ءِ وسیلگ ءَ ھم دیم ءَ آرگ بوت کنت۔ وزیر ءِ مملکت ءَ ورنا آنی تہ ءَ میڈیا لٹریسی ءِ دیمروئی ءَ را ناگزیر لیکگ ءَ گوشت کہ ڈیجیٹل دور ءَ میڈیا لٹریسی ءَ را وانگ ءُ زانگ ءِ یک ھاسیں بھر جوڑ کنگ المی اِنت۔ ایوک ءَ زانتکاری ءِ رسگ ءِ بدل ءَ ورناہاں اے ھم المی اِنت کہ آ ایشی ءِ راستی، وسیلہ ءُ مول ءُ مراد ءِ تنقیدی ارزشت ءَ بہ دنت۔ واجہ قمر ءَ گوشت کہ ورنا اے جست ءِ وس ءَ بہ کن اَنت کہ اے زانتکاری باوست داریت؟ ایشی ءِ سرچشمگ چے اِنت؟ ءُ ایشی ءِ مول ءُ مراد چاگرد ءِ تہا سرپدی دیگ اِنت یا تپاکی پیداک کنگ؟ واجہ قمر ءَ سی آئی سی اے ءِ باسکیں ملک آنی نیام ءَ میڈیا کمک ءَ را گیش موثر ءُ پائیدار جوڑ کنگ ءِ واستہ سی آئی سی اے میڈیا کوآپریشن فریم ورک ءِ دائمی دیمروئی ءِ نیمگ ءَ پیشرفت ءِ ھم تجویز پیش کتگ۔ آئی ءَ گوشت کہ اے چیر دستی ءَ باسکیں ملک آنی میڈیا ادارگ، اھوالکار، اکیڈمک ءُ ورنا ڈیجیٹل کریٹر آناں یکیں پلیٹ فارم ءِ سر ءَ آرگ بوت کنت، وھدیکہ اھوالکار آنی تبادلہ، یکجائی دستاویزی فلم ءُ میڈیا پروڈکشن، مواد ءِ تبادلہ، ورنا میڈیا ءِ گامگیج ءُ یکجائی ڈیجیٹل پلیٹ فارم آناں ھم دیمروئی دیگ بوت کنت۔ وزیر مملکت ءَ ورنا اھوالکار، نودربر ءُ ڈیجیٹل کنٹنٹ جوڑ کنوک آنی سرجمی ءَ ھوار بوھگ ءِ سر ءَ زور پر دیان ءَ گوشت کہ مرچیگیں ورنا ایوک ءَ میڈیا ءِ صارف نہ اَنت بلکیں آ جوڑ کنوک، رابطہ کار اَنت ءُ الس ءِ رائے ءِ جوڑ کنگ ءَ ھاسیں کرد پیلو کنگ ءَ اَنت۔ آئی ءَ گوشت کہ ایشیا دود ءُ ربیدگی، زبان ءُ تہذیبی رنگ ءُ دروشم ءَ چہ مالا مالیں دمگ اِنت بلے اے درستیں رنگ ءُ دروشم ءِ باوجود مئے راج ءِ یکجائی واھشت ھست اَنت چوش کہ امن، شرپ، وانگ ءُ زانگ، موہ ءُ وتی آیوکیں باندات آنی واستہ جوانیں آیوکیں باندات ءِ واستہ۔ سی آئی سی اے ءِ وڑیں پلیٹ فارم اے مشترکہ ارزشت آناں برجا کنگ ءُ دمگ ءَ مردم آنی نیام ءَ سیادی ءَ را گیش مھکم کنگ ءِ یک ھاسیں وسیلہ یے ۔ واجہ قمر ءَ گْوشتگ کہ بھروسہ ءِ زور دیگ نہ بیت، آئی ءَ را رسگ لوٹ اِیت؛ گپ ءُ تران یکے دومی ءِ سرپدی ءَ ابید دیمروئی نہ کنت ءُ پائیداریں امن ایوک ءَ سرکارانی وسیلہ ءَ جوڑ کنگ نہ بیت بلکیں اے گپ ءِ سرا ہم بندوک اِنت کہ مئے چاگرد یکے دومی ءَ چون گند اَنت، سرپد بنت ءُ چوں رابطہ کن اَنت۔ آئی ءَ وتی جزم ءِ سر ءَ زور پر دات کہ پاکستان سی آئی سی اے ءِ درستیں باسکیں ملک آنی گوما کمک ءَ میڈیا ءِ وسیلگ ءَ دل یکیمی سازی، گپ ءُ تران، دود ءُ ربیدگ ءِ تنوع ءِ شرپ ءُ مردم آنی نیام ءَ رابطہ آنی دیمروئی ءِ تہ ءَ جوڑیشت ءِ کرد ءَ را برجاہ دار ایت۔ وزیر مملکت ءَ اے امیت ءِ درشانی کت کہ باکو ءَ برجم دارگ بوتگیں اولی سی آئی اے میڈیا فورم میڈیا ءِ طاقت ءِ سر ءَ گپ ءُ تران ءَ گوں بندوک نہ بیت بلکیں دل یکیمی ءِ جوڑ کنگ، گپ ءُ تران ءِ دیمروئی، تنوع ءِ شرپ ءُ ایشیا ءِ اُلس ءَ را یکجا کنگ ءِ واستہ عملی ءُ برجمیں کمک ءِ بندات ءِ رنگ ءَ یات کنگ بیت۔