نائب مزن وزیر اسحاق ڈار ءَ فرانس ءِ دری کارانی وزیر جین نوئل بیرو ءَ گوں گند ءُ نند کتگ، دمگی ءُ جھان ءِ دیمروئی آنی بابت ءَ گپ ءُ تران

اسلام آباد/نیویارک۔21ستمبر (اے پی پی): نیویارک ءَ اقوام متحدہ ءِ جنرل اسمبلی ءِ 81می دیوان ءِ ساھت ءَ نائب مزن وزیر ءُ درئی کارانی وزیر سینیٹر محمد اسحاق ڈار ءَ فرانس ءِ یورپ ءُ درئی کارانی وزیر جین نوئل بیرو ءَ گوں گند ءُ نند کت۔ گند ءُ نند ءَ پاکستان ءُ فرانس ءِ وت مہ وتی سیادی آنی سر ءَ چار ءُ تپاسی کنگ بوت ءُ دمگی ءُ جھان ءِ دیمروئی آنی سر ءَ ھیال ریچی کنگ بوت۔ درئی کارانی کارگس ءِ جارکش ءِ نیمگ ءَ جاڑی بوتگیں بیان ءِ رد ءَ نائب مزن وزیر ءُ وزیر ءِ درئی کار ءَ پاکستان ءِ واھشت ءِ سر ءَ زور پر دات کہ آ سیاسی سیادی، تجارت ءُ سرمایہ کاری، وانگ ءُ زانگ ءِ سیادی ءُ مردم آنی نیام ءَ تبادلہ ءَ ھوار جتا جتائیں پڑ آنی تہ ءَ دو نیمگی سیادی ءَ را گیش مھکم بہ کنت۔ نائب مزن وزیر ءُ دری کارانی وزیر ءَ فلسطین ءِ جیڈھ ءِ دو ریاستی گیواری ءِ واستہ فرانس ءِ کوشست آنی توسیپ کت ایشی ءِ تہ ءَ فرانس ءِ اسرائیل ءِ آبادی آنی تہ ءَ سامان آنی درآمد ءِ سر ءَ بندش جنگ ءِ پیسلہ ھم ھوار اِنت۔ دوئیں رہشوناں اے گپ ءِ سر ءَ زور پر دات کہ فلسطین ءِ جیڈھ ءَ را جھان ءِ ایجنڈا ءِ تہ ءَ مزنیں اولویت ءِ رنگ ءَ بہ مان ایت۔ دوئیں بامرد آں جیڈھ ءِ عادلانہ، پائیدار ءُ سرجمیں گیواری ءِ واستہ برجاھیں جھان ءِ کوشست آنی ارزشت ءِ سر ءَ زور پر دات۔ ایران ءِ جاور ھال ءِ ھوالگ ءَ دوئیں نیمگاں بحران ءِ گر ءُ دار ءِ واستہ برجاھیں سفارتی ھوار بوھگ ءُ دمگی کوشست آنی ارزشت ءِ سر ءَ گپ ءُ تران کنگ بوت ءُ اسلام آباد ءِ مفاہمت نامہ ءِ سر ءَ عمل کنگ ءِ ارزشت ءِ سر ءَ زور پر دات۔ دوئیں رہشوناں گیشیں اقتصادی اثرات ءِ رد ءَ سمندری ٹریفک ءِ ایمنی، آزاد روانی ءُ توان ءِ بے رکاوٹیں سپلائی ءَ را دل یکیمی کنگ ءِ ضلورت ءِ سر ءَ ھم زور پر دات۔ فرانس ءِ دری کارانی وزیر ءَ دمگی امن ءُ ایمنی ءِ واستہ پاکستان ءِ سفارتی کوشست آناں ساڑات ءُ دمگی چیلنج آناں گیواری ءُ گپ ءُ تران ءِ دیمروئی ءِ واستہ دمگی فورم آناں کارمرد کنگ ءِ ارزشت ءِ سر ءَ تپاک کت۔ گند ءُ نند ءَ وت مہ وتی سیت ءِ واھندیں وت مہ وتی ءُ دمگی جیڈھ آنی سر ءَ نزیکیں رابطہ برجائی ءِ سر ءَ تپاک کنگ بوت۔