وفاقی وزیر مصطفیٰ کمال ءَ گوں وزیر خزانہ ءِ مشیر  عدنان پاشا ءَ گند ءُ نند کت، نامینگی ءُ سٹنٹنگ ءِ ھوالگ ءَ نوکیں منصوبگ ءِ بابت ءَ سرپدی

اسلام آباد۔24اگست  (اے پی پی): وفاقی جان سلامتی ءِ وزیر مصطفیٰ کمال ءَ گوں وزیر خزانہ عدنان پاشا ءَ گند ءُ نند کت۔ دیوان ءِ تہ ءَ ایڈیشنل سیکرٹری ہیلتھ ، ڈائریکٹر جنرل ہیلتھ، ڈائریکٹر جنرل پاپولیشن  ءُ دگہ سیادی داروکیں کارندہ ءَ شریک بوتگ ۔ گند ءُ نند ءِ ساھت ءَ عدنان پاشا ءَ وفاقی وزیر جان سلامتی ءَ را نیوٹریشن ءُ سٹنٹنگ ءِ ھوالگ ءَ نوکیں منصوبگ ءِ ھوالگ ءَ سرجمیں بریفنگ دات۔ اے موہ ءِ سر ءَ وفاقی جان سلامتی ءِ وزیر ایم۔ کمال ءَ گوشت کہ مات ءُ زھگ آنی جان سلامتی ءِ گوں وردن ءُ وراک ءَ براہ راست سیادی ھست، نادراھی ءِ کنٹرول کنگ ءَ ابید جان سلامتی ءِ لوٹ ءُ گزر ءِ مول ءُ مراد سرجم کنگ نہ بنت۔ آئی ءَ گوشت کہ پاکستان ءَ ھمک سال زھگ ءِ ودی بوھگ ءِ وھد ءَ نزیک ءَ 11 ھزار مات وتی جان ءَ چہ دست کش بنت، وھدیکہ نزیک ءَ 43درسد زھگ نادراھی ءِ سبب ءَ سٹنٹنگ ءِ آماچ بنت۔ وفاقی جان سلامتی ءِ وزیر ءَ گوشت کہ مات ءِ جوانیں ورگ جان سلامتیں زھگ ءِ بنیات اِنت، وھدیکہ جان سلامتیں زھگ جان سلامت ءُ مھکمیں چاگرد ءِ بنیات اَنت۔ مصطفیٰ کمال ءَ پنت ءُ شون کت کہ نادراہی ءِ کنٹرول کنگ، سٹنٹنگ ءِ شرح ءَ را کم کنگ ءُ مات ءُ زھگ آنی جان سلامتی ءَ را گہتر کنگ ءِ ھاتر ءَ کارروائی ءِ لائکیں سفارشات ءُ اشاریہ آناں گہتر کنگ ءِ ھاتر ءَ یک ھمگرنچیں حکمت عملی ءِ جوڑ کنگ بہ بیت۔ آئی ءَ گوشت کہ غذائیت ءِ جیڈھ آنی گیواری ءِ واستہ درستیں سیادی داروکیں ادارگ آنی نیام ءَ موثر رابطہ ءُ یکجاھیں گامگیج المی انت تانکہ مات ءُ زھگ ءِ جان سلامتی ءِ تہ ءَ پائیدار گہتری آرگ بہ بیت۔