صدر ءَ انڈونیشیا ءِ صدر، حکومت ءُ الس ءَ را آجوئی ءِ روچ ءِ مبارک بات داتگ

اسلام آباد۔17اگست  (اے پی پی): صدر آصف علی زرداری ءَ انڈونیشیا ءِ صدر پرابو سوبیانتو، حکومت ءُ الس ءَ را وتی آجوئی ءِ روچ ءِ مبارکی ءِ درشانی کتگ۔ صدارتی ایوان ءِ پریس ونگ ءِ نیمگ ءَ چہ جاڑی بوتگیں بیان ءِ رد ءَ انڈونیشیا ءِ آجوئی ءِ روچ ءِ درگت ءَ وتی مبارکی نمدی ءِ تہ ءَ صدر آصف علی زرداری ءَ گوشت کہ اے راجدپتری موہ مارا انڈونیشیا ءِ راج ءِ جذبہ، استقامت ءُ جزم ءِ یات ءَ دنت ءُ ھمے رنگ ءَ آجوئی ءِ واستہ وتی راج ءِ بنجاہی جہد ءِ سروک آنی سروکی ءِ یات ءَ دنت۔ صدر آصف علی زرداری ءَ گوشت کہ پاکستان ءُ انڈونیشیا ءِ نیام ءَ دو نیمگی، دمگی ءُ میاں اوستمانی تک ءَ یکجائی راجدپتر، وت مہ وتی بھروسہ، یکجائی عقائد ءُ کمک ءِ بنیات ءَ نزیکیں ءُ دوستی ءِ سیادی است انت۔ آئی ءَ گوشت کہ دوئیں ملک آں تجارت، سرمایہ کاری، دفاع، جان سلامتی، وانگ ءُ زانگ ءُ مردم آنی نیام ءَ رابطہ آنی ھوار بازیں شوبگ آنی تہ ءَ مدام کمک ءَ را گیش ءُ گیوار کتگ۔ صدر ءِ مملکت ءَ اے گپ ءِ سر ءَ دل یکیمی ءِ درشان کت کہ گوستگیں سال ءَ صدر پرابو سوبیانٹو ءِ پاکستان ءِ تر ءُ تاب ءَ دوئیں ملک آنی نیام ءَ سیادی ءَ را نوکیں رنگ ءُ دروشم داتگ، ایشی ءَ چہ وت مہ وتی نپ آنی تہ ءَ کمک ءَ را گیش گہتر کنگ ءَ کمک رسیت۔ آئی ءَ انڈونیشیا ءِ اُلس ءِ امن ءُ ایمنی، دیمروئی ءُ وشھالی ءِ واستہ وتی نیکیں واھگ درشان کتگ اَنت۔