وزارت تجارت ءَ برآمداتی شوبگ آنی کمک ءِ واستہ 10 ارب کلدار ءِ منظوری داتگ، جام کمال خان

اسلام آباد۔8اگست  (اے پی پی): وفاقی وزیر تجارت جام کمال خان ءَ جار جتگ کہ وزارت تجارت ءَ ڈیوٹی کٹوتی ءُ ٹیکنالوجی ءِ اپ گریڈیشن اسکیم ءِ چیر دستی ءَ ٹیکسٹائل ءُ ملبوسات ءِ صنعت ءُ ایندگر برآمداتی شوبگ آنی واستہ 10ارب کلدار ءِ منظوری داتگ، ایشی ءِ مول ءُ مراد برآمداتی جی گرو لیکویڈیٹی ءَ را گہتر کنگ اِنت۔ سوشل نیٹ ورکنگ ویب سائٹ ایکس ءِ سر ءَ اے دیمروئی ءِ بابت ءَ شیئر کنان ءَ وفاقی وزیر جام کمال خان ءَ گوشت کہ من ءَ اے گپ ءِ سرپدی دیگ ءَ وشی اِنت کہ وزارت تجارت ءَ ٹیکسٹائل ءُ ملبوسات ءُ ایندگر برآمداتی شوبگ آنی واستہ ڈیوٹی کٹوتی ءُ ٹیکنالوجی ءِ اپ گریڈیشن اسکیم آنی واستہ 10 ہزار کلدار ءِ منظوری داتگ۔ آئی ءَ اے امیت ھم سہرا کت کہ ایشی ءَ چہ صنعت ءِ لیکویڈیٹی ءَ را گہتری کیت ءُ برآمدات ءَ را گیش کنگ ءِ اہل بیت۔ امیت انت کہ منظور بوتگیں فنڈز ءَ چہ برآمدات ءِ سرا مبنی صنعت آناں سک باز لوٹ ءُ گزر ءِ لیکویڈیٹی ءِ کمک رس ایت ءُ ٹیکنالوجی ءِ اپ گریڈیشن ءَ را ھم آسراتی رس ایت، ایشی ءَ چہ برآمد کنوک وتی مقابلہ ءِ توان ءَ را گہتر کنگ ءُ میاں اوستمانی مارکیٹ آنی تہ ءَ وتی ھستیں جاہ ءَ را گیش کنگ ءِ ھاترا توانمند بنت۔ وفاقی وزیر جام کمال خان ءَ گوشت کہ اے گامگیج پاکستان ءِ برآمداتی شوبگ آناں مھکم کنگ، صنعت ءَ را آسراتی دیگ ءُ پیداواری برآمداتی دیمروئی ءِ واستہ جوانیں چاگرد ءِ جوڑ کنگ ءِ سر ءَ حکومت ءِ برجاھیں دلگوشی ءِ درشان اِنت۔