ٹیکس ءِ نظام ءَ را ڈیجیٹل کنگ بوھگ ءَ اِنت،  سینیٹر محمد اورنگزیب

فیصل آباد۔ 03 جولائی (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ ٹیکس ءِ نظام ءَ را ڈیجیٹل کنگ بوھگ ءَ انت ایشی ءَ چہ نہ ایوک ءَ لیک ءِ ھلاسی بیت بلکیں آمدنی ءِ جم کنگ ءَ را ھم گیشی بیت۔ آئی ءَ جمعہ ءِ روچ ءَ فیصل آباد چیمبر آف کامرس اینڈ انڈسٹری ءَ کاروباری برات ءِ نمائندگ آنی دیوان ءَ گوں گشتانک دیگ ءَ ات۔ آئی ءَ گوشت کہ مرچیگیں دیوان بجٹ ءَ چہ پد دیوان نہ انت بلکینگ ءَ اے آیوکیں مالی سال ءِ بجٹ ءِ بنگیج انت ءُ ایشی ءَ را فیصل آباد چیمبر ءَ چہ بندات کنگ بوھگ ءَ انت۔ آئی ءَ گوشت کہ بجٹ ءِ تیاری نوں فنانس ڈویژن ءِ دست ءَ اِنت، وھدیکہ ایف بی آر ایوک ءَ ٹیکس انتظامی ءُ ٹیکس ءِ جم کنگ ءِ ھوالگ ءَ جیڈھ آناں چار ایت۔ اقتصادی دیمروئی ءِ واستہ پرائیویٹ سیکٹر لیڈ بہ کنت ۔ فنانسنگ ءِ ھوالگ ءَ آئی ءَ گوشت کہ سود ءِ شرح 22درسد ءَ چہ کم کنگ بوتگ ءُ 11.5درسد کنگ بوتگ۔ بجلی ءِ ٹیرف ءِ ھوالگ ءَ آئی ءَ گوشت کہ کراس سبسڈی ھلاس کنگ بوتگ ایشی ءَ چہ بجلی ءِ شرح ءَ گیش کمی کیت۔ ٹیکس ءِ حوالہ ءَ وفاقی وزیر ءَ گوشت کہ ایشی ءِ سر ءَ 2سال ءَ چہ گپ ءُ تران بوھگ ءَ اِنت ایشی ءِ آسر ءَ ایڈوانس ءُ سپر ٹیکس ھلاس کنگ بوتگ۔ آئی ئَ آئی ٹی ئِ شوبگ ئِ کارکردگی ساڑاتگ ئُُ گوشت کہ ایشی ئَ 4ارب ئُُ نیم برآمد کتگ۔ حکومت ایشانی واستہ گیش سازگاریں چاگرد ءِ پجارینگ ءَ اِنت۔ حکومت تعمیراتی شوبگ ءَ را دلبڈی دنت بلے فائلانی کاروبار ءِ واستہ ہچ وڑیں آسراتی نہ بیت۔ آٹومیشن ءِ ھوالگ ءَ وفاقی وزیر ءَ گوشت کہ ھر مردم ءِ سرجمیں ریکارڈ ناڈرا ءُ ایف بی آر ءِ گوما اِنت کہ ایشی ءَ را ھمگرنچ کنگ بیت۔ اے رسگ ءِ ھلاس کنگ ءَ کمک کنت۔ آئی ءَ گوشت کہ شکر ءِ شوبگ ءَ چہ ڈیجیٹلائزیشن ءِ عمل بندات کنگ بوتگ ایشی ءَ چہ 60ارب کلدار ءِ گیشیں سیلز ٹیکس رستگ۔ آئی ءَ گوشت کہ ایس ایم سی ءِ شوبگ ءِ واستہ میاں اوستمانی ٹیکس ءِ حکمت عملی جوڑ کنگ بیت ایشی ءَ چہ ٹیرف ءِ رژیم ءَ را کم کنگ بیت۔ ھمے رنگ ءَ زرعی مشینری ءِ سر ءَ ریگولیٹری ڈیوٹی ءُ ایڈوانس ٹیکس صفر ءَ چہ کم کنگ بوتگ ۔ گیش بوھوکیں آبادی ءِ زور ءَ چہ گر ءُ چیل بوھگ ءِ واستہ آئی ءَ گوشت کہ چیمبرز ءُ بزنس کمیونٹی ھم اے رد ءَ وتی کرد ءَ پیلو بہ کن اَنت۔ آئی ءَ گوشت کہ ایران ءِ جیڈھ ءِ گیواری ءَ چہ دمگی تجارت ءِ سر ءَ جوانیں اثر کپ ایت۔ ھمے رنگ ءَ آ امریکہ ءَ چہ گیش ٹیرف ءِ مراعات ءِ گرگ ءِ ھم کوشست ءَ اَنت کہ ایشی ءَ چہ اے ملک برآمدات ءَ گیش کنگ ءَ کمک رس اَنت۔ راجی سلامتی ءِ بابت ءَ ہچ وڑیں مصالحت نہ بیت۔ بلے نیشنل ٹیرف کمیشن ءِ ایم ڈی ءَ گوں گپ ءُ تران ءَ پد اینٹی ڈمپنگ ڈیوٹی ءِ سر ءَ عمل درآمد ءِ سر ءَ چار ءُ تپاسی کنگ بیت ءُ اے درگت ءَ فیصل آباد چیمبر ءِ ھمراھی ءَ سرجمیں سٹیک ہولڈر آناں ھم ھوار کنگ بیت۔ آئی ءَ گوشت کہ ایس ایم ای شوبگ ءِ واستہ جتاھیں زرّ ایر کنگ بیت تانکہ اے شوبگ ءَ گوں ترندی ءَ دیمروئی کت کنت۔ ایشی ءَ چہ پیسر صدر فیصل آباد چیمبر آف کامرس اینڈ انڈسٹری فاروق یوسف شیخ ءَ وفاقی وزیر خزانہ سینیٹر محمد اورنگزیب ءَ را وش اتک کنان ءَ گوشت کہ گوستگیں بجٹ ءَ بازیں سفارش ھوار کنگ بوتگ انت۔ آئی ءَ گوشت کہ اے مشورہ ءَ چہ فائدہ مند بوتگ ءُ مائیکرو فائبر ءُ ویلیویشن ءِ بازیں جیڈھ ایوک ءَ یک ءُ نیم ماہ ءِ تہ ءَ گیش ءُ گیوار بوتگ انت۔ آئی ءَ تعمیراتی شوبگ ءِ واستہ ترغیب آنی وش اتک کت ءُ گوشت کہ حکومت برآمدات ءَ را 60ارب ڈالر ءَ سر کنگ لوٹ ایت۔ آئی ءَ گوشت کہ حکومت معیشت بحالی ءِ واستہ سنجیدہ انت۔ آئی ءَ برآمدات ءَ را معیشت ءِ لائف لائن لیک اِتگ ءُ گوشت کہ ایشی ءَ را گیش کنگ ءِ واستہ روایتی سوچ ءَ چہ دریں پیسلہ کنگ لوٹ ایت۔ آئی ءَ حکومت ءِ ھم منت گپت کہ آئی ءَ ملک ءِ مزنیں برآمد کنوکاں اسلام آباد ءَ دعوت داتگ ءُ آھاں دلبڈی داتگ ءُ وفاقی وزیر ءَ را 24، 25، 26جولائی ءَ لاہور ایکسپو سینٹر ءَ برجم دارگ بوھوکیں فیصل آباد ایکسپو ءَ بھر زوری ءِ دعوت داتگ۔ آئی ءَ وتی تاثرات فیصل آباد چیمبر ءِ مہمان کتاب ءَ ہم نبشتہ کتگ انت۔