چیئرمین سینیٹ ڈل اتون ااور تہران آ سرمس، آیت اللہ سید علی خامنہ ای نا نمازِ جنازہ و جہہ جاگہ کننگ اٹی بشخ ہلیک

تہران۔ 03 جولائی (اے پی پی ) چیئرمین سینیٹ سید یوسف رضاگیلانی بڑزکو کہول انا پاکستانی ڈل اتون اوار تہران آ سرمسنے ہراڑے او آیت اللہ سید علی خامنہ ای نا نمازِ جنازہ و جہہ جاگہ کننگ اٹی بشخ ہلیک۔ گورنر خیبرپختونخوا فیصل کریم کنڈی ہم داوخت آ چیئرمین سینیٹ تون اوار ءِ۔ سینیٹ سیکرٹریٹ نا رداٹ تہران آ بننگ آ ایرانی کمامدار و پارلیمانی نمائندہ غاک پاکستانی ڈل ءِ جم وجوش اٹ بخیرکریر۔ دورہ تہران اٹی چیئرمین سینیٹ نا ایرانی سرکڑدہ و پارلیمانی کمامدار آتون اوڑدہی ہم گمانی ءِ، ہرافتے ٹی ہڑتوم آ کنڈآتا تعلقداری، پارلیمانی کمکاری و تین پہ تینی است خواہی نا ایلو امور تیا گپ وتران کننگک۔ داوخت آ پاکستان و ایران نا نیام اٹ تاریخی ، مذہبی ، دودوربیدہ ئی و ایلمی تعلقداری تے پین سوگو کننگ نا عزم انا ہم درشانی ءِ کننگک۔ تہران اٹی میڈیا تون گپ وتران کرسا چیئرمین سینیٹ سید یوسف رضاگیلانی ایرانی سرکڑدہ، پارلیمان و الس تون ہڑزخواہی و ہمدردی نا درشانی ءِکرے۔ اوپارے کہ آیت اللہ سید علی خامنہ ای عالم اسلام نا اسہ گچین، باوقار و بااثر ءُ شخصیت اس ئس، ہرانا دینی، فکری و سیاسی خذمت آتے مدام یات تخنگک۔ چیئرمین سینیٹ پارے کہ پاکستان و ایران نا نیام اٹ متکن آ برادرانہ تعلقداری ءِ و پاکستان غم انا داساہت اٹی ایرانی الس تون پورو یکجہتی نا درشانی ءِ کیک۔ اودااومیت نا درشانی ءِ کرے کہ ہڑتوم آ ملک آتا نیام اٹ تین پہ تینی کمکاری و پارلیمانی رابطہ آخبت ہم پین شون ہلیک۔