پاکستان دراہیں جیڈھ آنی گیواری ءِ واستہ گپ ءُ تران ءُ سفارتکاری ءِ پالیشی ءِ رندگیری ءَ کنگ ءَ انت،  سلاہ بندیں اُرد درملکی سرپرستی ءَ بوتگیں ناشرکاری ءِ ھترہ ءَ را ھلاس کنگ ءِ کوشست ءَ کنگ ءَ اَنت، سرجمیں راج سلاہ بندیں اُرد،   ءِ گوما ھمکوپگ ءَ اوشتاتگ، مزن وزیر

کراچی۔27جون  (اے پی پی): مزن وزیر محمد شہباز شریف ءَ ملک ءِ ھلاپ ءَ دژمن ءِ بدیں منصوبگ آناں ناکام کنگ ءِ آہنی جزم ءِ پدا زور دیگ ءَ گوشت کہ پاکستان مرچی دگنیا ءِ تہ ءَ امن دوست ءِ کرد ءَ پیلو کنگ ءَ اِنت۔ پاکستان ءِ  ساپ ءُ سلہ ایں  میانجی داری ءِ کوشست آنی آسر ءَ امریکہ ءُ ایران ءِ نیام ءَ راجدپتری اسلام آباد ءِ مفاہمت نامہ ءِ سر ءَ دستخط کنگ بوت۔ دژمن مئے امن ءُ ایمنی ءِ ھراب کنگ ءِ ھاترا بزدلیں پندل ءُ وتی پراکسی کارمرز کنگ ءَ اِنت۔ سلاہ بندیں اُرد درملکی سرپرستی ءَ بوتگیں ناشرکاری ءِ ھترہ ءَ را ھلاس کنگ ءِ کوشست ءَ کنگ ءَ اَنت۔ سرجمیں راج وتی بہادریں سلاہ بندیں لشکر ءِ کش ءَ اوشتاتگ۔ پاکستان امن، گپ ءُ تران ءُ سفارتکاری ءِ لوٹ ءَ کنگ ءَ انت تانکہ دراہیں دیم ءَ اتکگیں جیڈھ آناں گیش ءُ گیوار کنگ بہ بیت۔ دمگ ءِ بدل بوھوکیں جاور ھال ءَ چہ پیسر ءَ چہ گیش جہانی معیشت ءُ میاں اوستمانی سپلائی چین ءِ واستہ دریائی ایمنی ءِ ارزشت ءِ سر ءَ چمشانک داتگ۔ مرچی آزاتیں دریائی ٹریفک ءُ آزاتیں جہاز رانی سرجمیں دنیا ءِ بنیاتی لوٹ جوڑ بوتگ۔ حکومت پاک بحریہ ءَ را گیش مھکم، کارآمد ءُ نوکیں دفاعی فورس جوڑ کنگ ءِ واستہ جزمیگ انت۔ آئی ءَ اے ھیالانی درشانی شمبے ءِ روچ ءَ پاک نیول اکیڈمی پی این ایس راہبر ءَ 125مڈشپ مین ءُ 33می شارٹ سروس کمیشن کورس ءِ پاس آؤٹ پریڈ ءَ گوں گشتانک دیان ءَ کت۔ مراگش ءِ تہ ءَ وزیر دفاع خواجہ محمد آصف، وفاقی وزیر ءِ ھال ءُ اھوال عطا اللہ تارڑ، گورنر سندھ نہال ھاشمی، بنجاھی وزیر سندھ سید مراد علی شاہ، بحریہ ءِ سروک ایڈمرل نوید اشرف ءُ اے دگہ مزنیں افسراں بھر زوری کت۔ مراگش ءَ سر بوھگ ءَ گوں بحریہ ءِ سروک ایڈمرل نوید اشرف ءَ مزن وزیر ءَ را وش آتک کت۔ اے موہ ءِ سر ءَ مزن وزیر ءَ را گارڈ آف آنر پیش کنگ بوت، مزن وزیر ءَ پریڈ ءِ چار ءُ تپاسی کت۔ مزن وزیر ءَ جوانیں پرفارمنس ءِ کیڈٹ آنی نیام ءَ داد بھر ءُ بانگ کت۔ مڈشپ مین عمر مختار ءَ را وتی جوانیں کارکردگی ءِ ھاتر ءَ تلوار آف آنر ءِ داد دیگ بوتگ، آفیسر کیڈٹ حافظ محمد احمد منور ءَ را چیف آف ڈیفنس فورسز ءِ گولڈ میڈل دیگ بوتگ، اکیڈمی ڈریک مڈشپ مین ایوارڈ شارٹ سروس الحضارہ کمیشن کمپنی ءِ آفیسر کیڈٹ ھادی عباس خان ءَ را داتگ۔ کمانڈنٹ ءَ را گولڈ میڈل دیگ بوتگ۔ مراگش ءَ کیڈٹ افسر آں پیشہ وارانہ سوگند چست کت وھدیکہ پاک بحریہ ءِ ہیلی کاپٹر آں سلامی دات۔ مزن وزیر ءَ مراگش ءَ گوں گشتانک دیان ءَ گوشت کہ پاسنگ آؤٹ پریڈ ءَ بھر زوری ءَ چہ دل وشی بیت۔ من ھما درستیں کیڈٹاں مبارک بات دیان آں کہ آ پاس آؤٹ بوتگ انت ءُ داد زرتگ انت۔ مزن وزیر ءَ گوشت کہ من ءَ وشی اِنت کہ براتیں ملک ترکی، بحرین، بنگلہ دیش، عراق، سری لنکا ءُ جیبوتی ءِ کیڈٹ ھم پاس آؤٹ آنی تہ ءَ ھوار اَنت۔ منی اُمیت اِنت کہ اے جوانیں تربیتی مرکز ءَ چہ رستگیں زانت، تربیت ءُ پیشہ وارانہ مہارت وتی سرجمیں زند ءِ تہا آہانی واستہ سک باز کارآمد ثابت بنت ءُ آ وتی وتی ملکانی بحریہ ءِ پیشہ وارانہ کارانی تہا جوانیں رنگے ءَ بہر زورگ ءِ اہل بنت۔ چہ درستاں مستریں گپ ایش انت کہ ادا تربیت ءِ وھد ءَ آھانی وشیں یات، دوستی ءُ رابطہ مئے دوستیں ملک آنی نیام ءَ سیادی ءَ را گیش مھکم کنگ ءَ کمک کنت۔ مزن وزیر ءَ گوشت کہ پاس آؤٹ بوتگیں کیڈٹ آنی ھاندان ءُ سنگت ھم مراگش ءَ ساڑی انت۔ کمک شمئے سوبمندی آنی تہ ءَ المی کرد پیلو کنت ءُ پاک بحریہ ءِ تہ ءَ شمئے سر ءَ فخر مندیں کیریئر ءِ بندات کنگ ءِ وھد ءَ شمئے واستہ مزنیں توان ءِ بیت۔ مزن وزیر ءَ اکیڈمی ءِ کمانڈنٹ، فیکلٹی ءُ ٹریننگ اسٹاف ءَ را اکیڈمی ءَ مزنیں معیار ءِ تربیت ءِ پھجارینگ، نظم و ضبط ءِ زہرشانی کنگ ءُ اکیڈمی ءَ مثالی قیادت ءَ را دل یکیمی کنگ ءِ واستہ شگر ءُ منت گپت۔ مزن وزیر ءَ گوشت کہ من ءَ دل یکیمی اِنت کہ کمیشنڈ افسر نہ ایوک ءَ زانت ءُ زانشت ءَ چہ وت ءَ را نپ چست کن اَنت بلکینگ ءَ وت ءَ را ھما جرات، بہادری ءُ مقابلہ ءِ جذبہ ءَ را ھوار کن اَنت کہ آیوکیں وھد ءِ چیلنج آناں گر ءُ چیل بوھگ ءُ وتی وتی بحریہ ءِ شانداریں روایات آنی برجائی ءِ واستہ المی بیت۔ مزن وزیر ءَ گوشت کہ آ اے اکیڈمی ءَ را ھما موہ ءَ گشتانک دیگ ءَ آں کہ جہانی تک ءَ مزنیں بدلی آرگ ءَ انت، ایشی ءَ چہ مئے زندمان ءِ سر ءَ انچیں اثر کپگ ءَ انت کہ ایشی ءَ چہ پیسر تصور کنگ نہ بوتگ۔ مزن وزیر ءَ گوشت کہ مرچی پاکستان ءَ را پھر انت کہ اللہ تعالیٰ ءِ فضل ءُ کرم ءَ چہ دگنیا ءَ امن ءِ باروگ ءِ کرد ءَ پیلو کنگ ءَ انت۔ برات ءُ دوستیں ملک آنی کمک ءَ پاکستان ءِ مخلصیں میانجی داری ءِ کوشست آنی آسر ءَ امریکہ ءُ ایران ءِ نیام ءَ راجدپتری اسلام آباد ءِ مفاہمت نامہ ءِ سر ءَ دستخط کنگ بوتگ کہ من ءَ ھم میانجی ءِ بستار ءَ دستخط کنگ ءِ شرف رستگ۔ مزن وزیر ءَ امن ءِ برجائی ءُ فریق آناں امن ءُ ایمنی ءِ راہ ءَ آرگ ءِ واستہ شپ ءُ روچ بے مٹیں کوشست آنی پد ءَ پاک اُرد ءِ سروک ءُ دفاعی اُرد ءِ سروک فیلڈ مارشل سید عاصم منیر ءَ را شگر ءُ منت درشان کت۔ مزن وزیر ءَ گوشت کہ ایران ءِ صدر ڈاکٹر مسعود پیشکشکیان ءِ پاکستان ءِ گوستگیں تر ءُ تاب نہ ایوک ءَ پاکستان ءُ ایران ءِ نیام ءَ براتی سیادی ءِ درشان اِنت بلکینگ ءَ پڑ ءَ امن ءِ دیمروئی ءِ واستہ پاکستان ءِ کوشست آنی منگ اِنت۔ مزن وزیر ءَ گوشت کہ خطہ ءِ بدل بوھوکیں جاور ھال آنی سبب ءَ جھان ءِ معیشت ءُ میاں اوستمانی سپلائی چین ءِ واستہ میری ٹائم سیکورٹی ءِ ارزشت ءِ حقیقت ءَ را پیسر ءَ چہ گیش پدر کتگ۔ مرچی آزاتیں دریائی ٹریفک ءُ آزاتیں جہاز رانی نہ ایوک ءَ یک آسراتی یے بلکیں سرجمیں دنیا ءِ یک بنیاتی لوٹے جوڑ بوتگ۔ مزن وزیر ءَ گوشت کہ حکومت پاک بحریہ ءَ را یک مھکمیں، جوانیں ءُ نوکیں دفاعی اُرد ءِ جوڑ کنگ ءِ واستہ جزمیگ اِنت کہ ایشی ءَ چہ نا ایوک ءَ مئے راجی نپ آنی رکھینگ بیت بلکینگ ءَ مئے نپ آنی ھم رکھینگ بیت۔ اے دفاع ءِ ضمانت دیگ ءِ موثر صلاحیت ءِ واھند اِنت بلے دریائی دمگ ءَ ھم وسیع بنیاد ءَ کار کنگ ءِ صلاحیت ءِ واھند اِنت۔ پاک بحریہ ءَ راستی ءِ جنگ، آپریشن بنیان مرسوس ءَ وتی سرجمیں توان پیش داشتگ ءُ وتی دریائی سیم سر آنی رکھینگ ءِ وھد ءَ دژمن ءِ جزم ناکام کتگ۔ راستی ءِ جنگ ءَ پاک بحریہ ءِ کرد شاندار بوتگ۔ کیڈٹ آناں گوں تران کنان ءَ آئی ءَ گوشت کہ شما پاک بحریہ ءِ بامرد کموڈور ایس ایم انور،کمانڈر ظفر محمد خان  ءُ  وائس ایڈ مرل احمد تسنیم   ءِ پھزاریں میراث ءِ وارث اِت، ایشانی ھمت، بہادری، نوکربانی ءُ پیشہ وارانہ پاکستان ءِ واستہ شرپ اِنت۔ آئی ءَ گوشت کہ شما ھمت، جزم، نظم ءُ ضبط ءُ شرپ ءِ قدر آنی دیمروئی ءِ تہ ءَ ھم مھکم بہ بئے۔ من ءَ اے گپ ءِ سر ءَ دلجمی اِنت کہ شما ماتیں وطن ءِ دفاع ءِ ھاترا ھرچ چیلنج ءَ گوں مھکمیں رنگے ءَ دیم پہ دیم کن اِت ءُ ھما تربیت ءُ پیشہ وارانہ تجربہ کہ شما زرتگ آ عملی پڑ ءَ شمئے ھاترا سک باز کارآمد بیت۔ مزن وزیر ءَ گوشت کہ مرچی کمیشن زورگ ءَ بوھوکیں افسر نہ ایوک ءَ زانت ءُ ھنر ءَ گوں لیس درکپگ ءَ اَنت بلکینگ ءَ دل یکیمی، دلیری ءُ جنگی جذبہ ءَ گوں ھم ھوار اَنت، ایشی ءَ چہ آیوکیں وھد ءَ ھم کمک رسیت۔ آہاں گوشت کہ اے افسر ھما وھد ءَ پاک بحریہ ءِ بھر جوڑ بوھگ ءَ انت کہ میری ٹائم سیکٹر نوکیں ٹیکنالوجی، آرٹیفیشل انٹیلی جنس (اے آئی) ءُ بے پائلٹیں نظام ءِ نیمگ ءَ گوں ترندی ءَ دیم ءَ روگ ءَ انت۔ آئی ءَ نوکیں افسر آناں زور پر دات کہ آ مدام جزم، جرات، نظم و ضبط، ایمانداری ءُ وفاداری ءِ وڑیں قدر آناں اولیت بہ دنت۔ مزن وزیر ءَ گوشت کہ مرچی اے افسر آنی کوپگ آنی سر ءَ استیں رینک یک مزنیں ذمہ واری ءِ علامت انت۔ آرامیں دریا ہچبر ملاح ءِ چکاس ءَ نہ کنت ءُ نہ کہ سازگاریں ہوا کپتان ءِ توانائی ءِ معیار انت بلے طوفان ءِ دریا ءُ تُرندیں ہوا یک مردمے ءِ ہمت ءُ کردار ءِ اصل چکاس انت۔ مزن وزیر ءَ دمگ ءِ چیلنجیں سیکورٹی چاگرد ءَ آپریشن محبت البحر ءِ وسیلگ ءَ بندرگاہ آنی تہ ءَ بے رکاوٹیں توان ءِ سپلائی ءَ را دل یکیمی کنگ ءِ واستہ کتگیں کوشست آناں ھم ساڑات۔ مزن وزیر ءَ گوشت کہ پاکستان ءَ را میاں اوستمانی ءُ دری ھوپ آنی رد ءَ جتا جتائیں سیکورٹی چیلنج آنی دیم ءَ انت۔ مئے مشرقی ہمساہگ ءَ گوستگیں سال ءِ مئی ءَ ذلت آمیزیں شکست ءِ دیمپان بوتگ کہ مئے ملک ءِ سرا مزنیں دھکے بوتگ۔ دمگ ءِ امن ءُ ایمنی ءِ ھراب کنگ ءِ ھاترا بزدلیں پندل ءُ وتی پراکسیاں کارمرز کنگ ءَ اِنت ءُ مئے بہادریں سلاہ بندیں اُرد مئے مغربی سیمسراں چہ درملکی سرپرستی ءِ ناشرکاری ءِ ھترہ ءِ ھلاس کنگ ءِ ھاترا جھد کنگ ءَ اَنت۔ سرجمیں پاکستانی راج وتی بہادریں سلاہ بندیں لشکر ءِ کش ءَ اوشتاتگ۔ سرجمیں ملک ءَ دژمنانی ناپاکی ءِ رھبند آناں ناکام کنگ ءِ آہنی جزم اِنت وھدے کہ پاکستان امن، گپ ءُ تران ءُ سفارتکاری ءِ پالیسی ءِ رندگیری ءَ کنگ ءَ اِنت کہ دراھیں دیم ءَ اتکگیں جیڈھ آناں گیش ءُ گیوار بہ کنت۔ مزن وزیر ءَ کشمیر، فلسطین ءُ غزہ ءِ الس ءِ کمک ءِ واستہ پاکستان ءِ بے دروریں جزم ءِ ھم پدر کت۔