وفاقی وزیر محمد حنیف عباسی ءِ گوما روس ءِ تجارتی قونصل ءِ گند ءُ نند، ریلوے ءِ تہ ءَ کمک ءِ دیمروئی، سرمایہ کاری ءِ موہ ءُ وت مہ وتی مفاد ءِ جیڈھ آنی سر ءَ سرجمیں گپ ءُ تران

اسلام آباد۔15جون  (اے پی پی): ریلوے ءِ وفاقی وزیر محمد حنیف عباسی ءَ گوں روس ءِ تجارتی قونصل ءَ ریلوے ءِ وزارت ءَ گند ءُ نند کت۔ گند ءُ نند ءَ پاکستان ءُ روس ءِ نیام ءَ ریل ءِ شوبگ ءَ کمک ءَ را دیمروئی دیگ ، سرمایہ کاری ءِ موہ ءُ وت مہ وتی دلپدردی ءِ جیڈھ آنی سر ءَ سرجمی ءَ گپ ءُ تران کنگ بوت۔ وفاقی وزیر محمد حنیف عباسی ءَ گوشت کہ پاکستان روس ءِ گوما وتی دوستی ءِ سیادی ءَ را سک باز ارزشت دنت ءُ دوئیں ملک آنی نیام ءَ ریلوے ءِ شوبگ ءَ کمک ءِ سک باز امکان است انت۔ آئی ءَ گوشت کہ پاکستان ریلوے ءِ تہ ءَ سرمایہ کاری، ریلوے ءِ بنیات ءِ گہتری، ٹریک ءِ اپ گریڈیشن، سگنلنگ سسٹم ءِ نوک کنگ ءُ آپریشنل کارکردگی ءِ تہ ءَ گیشی ءِ واستہ روس ءِ کمپنی ءُ سرمایہ کار آناں وش اتک کنگ بیت۔ آئی ءَ روس ءِ کمپنی آناں پاکستان ریلوے ءِ جتا جتائیں دیمروئی منصوبگ آنی تہ ءَ بھر زوری ءِ لوٹ کت ءُ گوشت کہ اے کمک ءَ چہ دوئیں ملک آنی نیام ءَ اقتصادی ءُ تجارتی سیادی گیش مھکم بنت۔ محمد حنیف عباسی ءَ گوشت کہ آ نزیکیں وھد ءَ روس ءِ تر ءُ تاب کنگ لوٹ ایت تانکہ روس ءِ ریلوے ءِ نظام، نوکیں ٹیکنالوجی ءُ جوانیں کارروائی آناں نزیکی ءَ گوں چار ءُ تپاسی کنگ بہ بیت، ایشی ءَ چہ دوئیں ملک آنی نیام ءَ تکنیکی کمک ءُ تجربگ آناں بدلی ءَ را گیش دیمروئی رسیت۔ روس ءِ تجارتی قونصل ءَ پاکستان ریلوے ءِ دیمروئی ءُ نوک جوڑ کنگ ءِ واستہ روس ءِ کمک ءَ گوں دلگوشی ءِ درشان کت۔ ریلوے ءِ شوبگ ءَ رابطہ کاری ءَ را گیش وسعت دیگ ءِ ھم واھشت مند اِنت۔ آئی ئَ اے امیت سہرا کت کہ آیوکیں وھد ئَ دوئیں ملک آنی نیام ئَ ٹیکنیکل کمک ئُُ ادارکی کمک ئُُ مھکم جوڑ بیت۔ گند ءُ نند ءِ گڈ ءَ دوئیں نیمگ ءَ ریلوے ءِ شوبگ ءَ کمک ءَ را گیش دیمروئی دیگ، سرمایہ کاری ءِ موہ آناں سید چست کنگ ءُ وت مہ وتی یکوئی آناں مھکم کنگ ءِ جزم ءِ درشان کت۔ آہاں اے گپ ءِ سرا تپاک کت کہ پاکستان ءُ روس ءِ نیام ءَ ریل ءِ کمک ءَ چہ دوئیں ملک آنی واستہ وت مہ وتی سیت ءُ اقتصادی دیمروئی ءِ نوکیں موہ پیداک بنت۔