امریکہ ءُ ایران ءِ نیام ءَ امن ءِ معاہدے ءِ جوانیں اثرات ءَ چہ دمگ ءَ اقتصادی استحکام ءُ دیمروئی ءِ ھاتر ءَ نوکیں موہ پیداک بنت، محمد حنیف عباسی

اسلام آباد۔15جون  (اے پی پی): ریلوے ءِ وفاقی وزیر محمد حنیف عباسی ءَ گوشت کہ امریکہ ءُ ایران ءِ نیام ءَ امن معاہدے ءِ جوانیں آسر آنی سبب ءَ دمگ ءَ اقتصادی برجائی ءُ دیمروئی ءِ واستہ نوکیں موہ پیداک بنت ءُ دمگی یکوئی ءُ دیمروئی ءِ واستہ پاکستان ءِ وژن ءَ را ھم مھکم کنگ بیت۔ یک بیانے ءِ تہ ءَ آئی ءَ گوشت کہ پاکستان ءَ مُدام امن، برجائی ءُ جوڑیشت ءِ سفارتکاری ءِ دیمروئی ءَ جوانیں کرد پیلو کتگ ءُ جیڈھ آناں ایمنی ءِ گیواری، وت مہ وتی شرپ ءُ گپ ءُ تران ءِ اصول آنی سر ءَ کمک کتگ۔ محمد حنیف عباسی ءَ گوشت کہ امریکہ ءُ ایران ءِ نیام ءَ مفاہمت ءَ چہ خطہ ءَ کش ءُ چیل ءِ تہ ءَ کمی کیت وھدیکہ اقتصادی چست ءُ ایر، تجارت ءُ سرمایہ کاری ءِ دیمروئی ءِ واستہ ھم راہ پچ بیت۔ وفاقی وزیر ءَ مزن وزیر محمد شہباز شریف ءُ فیلڈ مارشل سید عاصم منیر ءِ سروکی ءَ پاکستان ءِ سیاسی ءُ فوجی سروکی ءِ سفارتی کوشست آناں ستا دات ءُ گوشت کہ جھان ءِ تک ءَ اے کوشست آناں منگ ستا کرز اِنت۔ آئی ئَ گوشت کہ پاکستان ئِ سروکی ئَ پڑ ئَ امن ئِ دیمروئی ئِ تہ ئَ دانائیں ئُُ زمہ واریں کرد ئِ پیلو کتگ ایشی ئَ چہ ملک ئِ جوانیں امیج ئُُ سفارتی وقار ئَ را گیش مھکم بوتگ۔ محمد حنیف عباسی ءَ گوشت کہ امن معاہدے ءِ جوانیں آسر آنی سبب ءَ دمگ ءَ اقتصادی برجائی ءُ دیمروئی ءِ واستہ نوکیں موہ پیداک بنت، ھمے وھد ءَ پاکستان ءِ دمگی یکجاھی ءُ دیمروئی ءِ وژن ءَ را ھم مھکم کنگ بیت۔ آئی ءَ اے جزم ءِ درشان کت کہ پاکستان آیوکیں وھد ءَ ھم دمگی برجائی، امن ءُ اقتصادی کمک ءِ دیمروئی ءِ تہ ءَ وتی جوانیں کرد ءَ را برجاہ دار ایت، پرچا کہ جھان ءِ امن ءُ وشھالی ءِ ھاترا گپ ءُ تران، مفاہمت ءُ کمک ءِ تہنا موثریں راہ اَنت۔