دسمبر 2026 ءَ K4 منصوبگ سرجم بوتگ، سکور حیدرآباد موٹروے ءِ سر ءَ کار پدا بندات بوتگ، وفاقی وزیر احسن اقبال

سلام آباد۔14جون  (اے پی پی): وفاقی وزیر ءِ منصوبگ بندی، دیمروئی ءُ ھاسیں گامگیج احسن اقبال ءَ گوشت کہ سندھ ءُ ھاسیں رنگ ءَ کراچی ءِ واستہ سئے مزنیں دیمروئی منصوبگ آنی سر ءَ کار بوھگ ءَ انت۔ وفاقی حکومت کراچی ءِ آپ ءِ دیریں جیڈھ ءِ گیواری ءُ صوبہ ءِ رابطہ ءِ نظام ءَ را گہتر کنگ ءِ ھاتر ءَ درستیں وسیلگاں کارمرز کنگ ءَ انت۔ راجی اسمبلی ءَ ایم کیو ایم ءِ باسک ءِ نیمگ ءَ چست کتگیں گپ ءِ پسو ءَ وفاقی وزیر ءَ گوشت کہ کراچی ءِ واستہ ھاسیں آپی منصوبگ ’’کے فور‘‘ اِنت۔ (کے چہارم) ءِ ھوالگ ءَ ھاسیں پیشرفت ءِ درشان کنان ءَ آئی ءَ گوشت کہ وفاقی حکومت 150ارب کلدار ءِ مزنیں ھرچ ءُ درچ ءَ گوں اے منصوبگ ءَ را دیم ءَ برگ ءَ اِنت۔ آئی ءَ اے گپ ءِ پدرائی کت کہ واپڈا ءَ فیڈریشن ءَ را دل یکیمی داتگ کہ دسمبر 2026 ءَ تاں کراچی ءِ نامینتگیں نقطہ ءَ ہر وڑ ءَ آپ سر کنگ بیت۔ اے پڑ ءَ چہ پد آپ ءِ رسگ ءُ بھر ءُ بانگ ءِ نیٹ ورک ءِ سرجم کنگ ءِ ذمہ واری صوبائی حکومت ءِ بیت۔ مواصلاتی منصوبگ آنی بابت ءَ گپ جنان ءَ احسن اقبال ءَ گوشت کہ سکھر حیدرآباد موٹروے ایم 6 ءِ کوھنیں کنٹریکٹ ناگزیریں سبب آنی سبب ءَ منسوخ کنگ بوتگ بلے نوں حکومت ءَ ایشی ءِ سر ءَ نوکیں رنگ ءَ کار بندات کتگ۔ آئی ءَ امیت کت کہ اے ھاسیں موٹروے منصوبگ آیوکیں سئے ءُ چار سال آنی تہ ءَ سرجم کنگ بیت، ایشی ءَ چہ سرجمیں سندھ ءِ سفر سک آسان بیت۔ وفاقی وزیر ءَ گوشت کہ گیش بوتگیں ٹریفک ءِ دباؤ ءَ را گر ءُ چیل کنگ ءِ واستہ کراچی ءُ حیدرآباد ءَ را یکجا کنوکیں استیں ایم 9 موٹروے ءِ نوکیں الائنمنٹ ءِ سر ءَ ھم کار بندات کنگ بوتگ۔ آئی ءَ اے درستیں منصوبگ آنی تفصیل ایوان ءِ دیم ءَ ایر کنگ ءَ پد پریزیڈنگ باسک میان وقاص صاحب ءِ منت گپت ءُ گڈ کت۔