ما تحریک انصاف ءِ دور ءَ فاشزم ءُ جمہوریت ءِ دیم دیستگ، احسن اقبال

اسلام آباد۔14جون  (اے پی پی): وفاقی وزیر ءِ منصوبہ بندی، دیمروئی ءُ اصلاحات پروفیسر احسن اقبال ءَ گشتگ کہ ما تحریک انصاف ءِ دور ءَ فاشزم ءُ جمہوریت ءِ دیم دیستگ۔ آ وھد ءَ ایوان ءَ دزگیریں باسک آنی واستہ پروڈکشن آرڈر شنگ نہ بوتگ ات ءُ روچ ءِ ایجنڈا ھم ڈکٹیشن ءِ وسیلگ ءَ ایوان ءَ آرگ بوتگ ات۔ یک شمبے ءِ روچ ءَ راجی اسمبلی ءَ پیسریگیں اسپیکر اسد قیصر ءِ نیمگ ءَ چست کتگیں جست آنی پسو ءَ وفاقی وزیر احسن اقبال ءَ گوشت کہ ما بجٹ ءِ ھوالگ ءَ گشتانک دیگ ءَ ایں ۔ ادا ما راستی ءِ بابت ءَ گپ بہ جنیں ءُ ردیں بیان کنگ ءَ چہ بہ رکّیں۔ ما پی ٹی آئی ءِ دور ءَ جمہوریت دیستگ کہ ما اسپیکر چیمبر ءَ شتگ اتیں ءُ اے ایوان ءِ دزگیریں باسک آنی پروڈکشن آرڈر ءِ جاری کنگ ءِ گُد گُد کتگ ات بلے پروڈکشن آرڈر جاری نہ بوتگ ات۔ ما آئی ءِ دور ءَ پارلیمنٹ ءِ آجوئی ھم دیستگ کہ یک مردمے اد ءَ ملتوی ءِ تحریکانی سر ءَ پیسلہ کنت ءُ روچ ءِ رھبند ھم آئی ءِ واھگ ءِ رد ءَ جوڑ کنگ بوتگ۔ آئی ءَ گوشت کہ آ عدلیہ ءِ آجوئی ءِ گپ ءَ کن اَنت، وھدیکہ آئی ءِ دور ءَ پنجاب ءَ بنجاہی حکومت بحال کنگ بوتگ اَنت، بلے سپریم کورٹ ءِ پیسلہ ءِ سر ءَ 9 ماہ ءَ عمل کنگ نہ بوتگ۔ آئی ءِ دور ءَ نواز شریف، شہباز شریف، مریم نواز، خواجہ آصف، سعد رفیق، حمزہ شہباز شریف ءُ رانا ثنا اللہ ءُ دگہ سروک جیل ءَ بند کنگ بوتگ انت، آئی ءِ دور ءَ اپوزیشن دیوال ءِ سرا ایر کنگ بوتگ، ہرکس ءَ آئی ءِ فاشزم ءُ جمہوریت ءِ دیم دیستگ۔ احسن اقبال ءَ گشت کہ ما اسد قیصر ءِ حلقہ سوابی ءَ یک یونیورسٹی یے ءِ سوغات داتگ ات ءُ من وتی دستاں اے یونیورسٹی ءِ بُن ہشت ایر کتگ ات۔ ایشی ءَ چہ پیسر راجی اسمبلی ءِ پیسریگیں اسپیکر اسد قائسر ءَ گشتگ کہ بجٹ سرکار ءِ نہ انت بلکیں آئی ایم ایف ءِ انت۔ اے وھد ءَ معیشت ءِ تہ ءَ کمی بوھگ ءَ اِنت۔ ما ادا وتی وتی دور ءِ اصلاحاتانی سرا تران کنگ ءَ تیار ایں ۔ ما شکر مافیا ءِ سرا دست ایر کتگ۔ آئی ءَ گوشت کہ ما اقتصادی چارٹر ءِ بابت ءَ گپ جنگ ءَ ساڑی آں۔ بیا اِت یکجاہ بہ نندیں ءُ یک الیکشن کمیشنے جوڑ بہ کنیں کہ آ درستاں منّگ بہ بیت۔ ما عدلیہ ءِ آجوئی ءُ پارلیمنٹ ءِ مھکمی ءِ منوگر ایں ۔ پہ ایشی ءَ بیا اِت کہ ما درست یکجاہ بہ نندیں. مئے دمگ ءَ 70درسد تمباک پیداک بیت ۔ کشمیر ءِ جاور ھال ءِ گیواری گپ ءُ تران انت ۔ تربیلا بند ءَ چہ 6418 میگاواٹ بجلی پیداک بیت وھدے کہ سرجمیں استان ءَ 3300 میگاواٹ بجلی رسیت۔ مئے دمگ ءَ 12 کلاک ءِ لوڈ شیڈنگ انت۔ ہما جاگہ ​​ءِ مردماں کہ اودا برق پیداک بیت، اولی حق است انت۔ مئے لوٹ اِنت کہ پارلیمنٹ آزات ءُ مہلوک ءِ نمائندہ بہ بیت۔