آئین، کانود ءَ جمہوریت ءَ دیمروئی ءَ ھاترا اپوزیشن ءَ گوں گپ ءَ تران کنگ ءَ ھاترا تیار ایں، مارا وتی سیکورٹی فورسز ءَ قربانیانی احترام کنگی انت، مزن وزیر محمد شہباز شریف

اسلام آباد۔13جون  (اے پی پی): مزن وزیر محمد شہباز شریف ءَ یک رندے پدا وتی جزم ءَ پدرائی کتگ کہ آ آئین، کانود ءَ جمہوریت ءَ دیمروئی ءَ واستہ اپوزیشن ءَ گوں گپ ءَ تران کنگ ءَ تیار آں ۔ ناشرکاری ءَ ھلاسی ءَ واستہ مئے سیکورٹی فورسز وتی سراں ندر کنگ ءَ انت ۔ ما وتی نیروانی سلامتی ءَ قربانیانی احترام ءَ بہ کنیں۔ شمبے ءَ روچ ءَ راجی اسمبلی ءَ تران کنان ءَ مزن وزیر شہباز شریف ءَ گوشت کہ اپوزیشن ءَ سروک ءَ نیمگ ءَ چست بوتگیں دراہیں نکات آں گوں دلگوشی ءَ گوش داشتگ۔ آئی ءَ وتی نیمگ ءَ چست کتگیں نکاتانی پسو ءَ ھما وھد ءَ گوں تفصیل ءَ دنت۔ اے ایوان ءَ گچین بوتگیں باسک پاکستان ءَ چاریں صوبہ آں گوں سیادی دار اَنت ءَ ما درستانی شرپ ءَ شرپ ءَ کناں۔ اے لوگ چو لوگے ءَ اِنت۔ پاکستان ءَ مھکم کنگ ءَ سیادی آنی تہ ءَ ھرچ وڑیں ٹکر ءَ ھلاسی ءَ واستہ مارا درستاں وتی کرد پیلو کنگی اِنت۔ مارا عزت ءَ شرپ ءَ دیمروئی کنگی اِنت۔ سیاست، نظریات ءَ مئے درستانی وتی سوچ انت بلے اگاں پاکستان است انت گڑا ما درست انت، آئی ءَ واستا ہرچ قربانی دیگ بیت آ کم انت۔ آئی ءَ گوشت کہ اپوزیشن ءَ سروک ءَ صوبہ آنی وسیلگ آنی جیڈھ چست کتگ، صوبہ آنی اقتصادی وسیلگ آنی ھک ایشانی ھک اِنت، ایشی ءَ سر ءَ ھچ وڑیں جیڑھ نیست، ریکوڈک معاہدہ یک درپشناکیں مثال اِنت، اے معاہدہ بلوچستان ءَ سروک آنی گوما سرجمیں شور ءَ سلاھ ءَ پد وجود ءَ اتکگ، ایشی ءَ بلوچستان ءَ ھر یک دیم ءَ بھر اِنت۔ آئی ءَ گوشت کہ 2010 ءَ این ایف سی ایوارڈ پاکستان ءَ راجدپتر ءَ تہ ءَ دہمی داد انت، آئی ءَ گوشت کہ بلوچستان یک جوانیں صوبہ ءَ ھوار دلیریں مردمانی سرڈگار انت، آئی ءَ بھر سد درسد گیش کنگ بوتگ، ایشی ءَ تہ ءَ دراہیں صوبہ آں قربانی داتگ ءَ پنجاب ءَ چہ وتی بھر ءَ گیش ءَ چہ گیش بلوچستان ءَ را داتگ۔ پنجاب ءَ بلوچستان ءَ سالے 11ارب کلدار چہ وتی بہر ءَ داتگ۔ اگاں مئے کرّا نانے گون بہ بیت گڑا ما بھر ءَ بانگ کنیں، اے مھر نہ اِنت، یکمشتی اِنت۔ آئی ءَ گوشت کہ معاشی ءَ چاگردی انصاف ءَ ھست نہ بوھگ ءَ گس ھم کار کت نہ کنت۔ 2 سال پیش بلوچستان ءَ یک کشاردارے ءَ را 70 ارب کلدار ءَ ھرچ ءَ سولر پینل دیگ بوتگ ۔ ایشی ءَ چہ وفاقی حکومت ءَ 50ارب کلدار کمک کتگ۔ کہ اے قربانی ءَ براتی ءَ مثال اِنت، ہمے رنگ ءَ گوادر چمن دوئیں گاڑیانی راہ 300 ارب کلدار ءَ ھرچ ءَ درچ ءَ جوڑ کنگ بوھگ ءَ اِنت۔ اے اپوزیشن سروک ءَ لوٹ نہ بوتگ بلکیں اے منی مزن وزیر ءَ بستار ءَ ذمہ واری بوتگ کہ من انچیں گامگیج بہ زوراں کہ دیمروئی ءَ دوڑ ءَ چاریں صوبہ برابر بہ بنت۔ البت اے کار ءَ وھد لوٹیت۔ اے یک شپے ءَ ممکن نہ اِنت، اے یکجاہ بوھگ ءَ ممکن اِنت۔ آئی ءَ گوشت کہ وطن ءَ رکھینگ ءَ واستہ پاکستان ءَ سلاہ بندیں اُرد آنی قربانی ابدمان انت۔ سئے روچ پیش بالی گراب ءَ حادثہ ءَ 22 افسر ءَ سرمچار شہید بوتگ انت کہ آہانی تہا دو عیسائی ہم ہوار انت۔ ھمے وڑ ءَ بلوچستان ءَ ھم شپ ءَ روچ ناشرکاری ءَ جنگ بیگ ءَ اِنت ءَ اے ناشرکاری ءَ تہ ءَ مالی ءَ تکنیکی کُمک ءَ دری دستانی دزمانگی ءَ شوھاز ھست اَنت۔ بلوچستان ءَ مئے ایمنی ءَ ھاتر ءَ سیمسر ءَ باڑ مڈ کنگ بیتگ ۔ ناشرکاری خیبرپختونخوا ءَ شپ ءَ روچ بوھگ ءَ اِنت ءَ پاکستانی سلاھبند ایشانی ھلاپ ءَ شپ ءَ روچ جنگ ءَ اَنت۔ افسر ءَ سرمچار شھید بوگ ءَ اَنت ءَ آ وتی جند ءَ زھگاں یتیم کنان ءَ میلیوناں پاکستانی زھگاں یتیم کنگ ءَ رکّینگ ءَ اَنت۔ بیا اِت کہ ما یکجاہ ایشانی قربانیانی شرپ ءَ بہ کنیں۔ آئی ءَ گوشت کہ من وھدیکہ ھیلی کاپٹر ءَ وئیل ءَ شھید آنی نماز ءَ جنازہ ءَ ھوار بوتگ آں گڑا شھید آنی معصومیں چک ھم گوں گند ءَ نند بوتگ آں کہ آھاں اے گپ ھم نہ زانتگ کہ آیانی مات ءَ پت شھید بوتگ اَنت۔ نوں آیاں زند ءَ مشکلانی دیمپانی کنگی اِنت۔ آئی ءَ گوشت کہ مرچی اگاں ما لاپرواہ بہ باں گڈا آیوکیں باھند مارا معاف نہ کن انت۔ اگاں اپوزیشن ءَ سروک جاتی عمرہ ءَ وتی گس لیک ایت گڈا من وہدے کوئٹہ ءَ شتاں آئی ءَ گس ءَ ہم شتاں۔ اے پوائنٹ اسکورنگ نہ اِنت۔ مزن وزیر ءَ گوشت کہ آئین، کانود ئُُ جمہوریت ئِ دیمروئی ئِ واستہ گپ ئُُ تران ئِ واستہ ساڑی آں۔ گوستگیں وھداں آئی ءَ اپوزیشن ءَ سروک ءَ بستار ءَ اقتصادی منشور ھم چو جمہوریت ءَ منشور ءَ وڑ ءَ دعوت داتگ ات بلے گوں حقارت ءَ رد کنگ بوتگ ات۔ ما مرچی ھم پہ ایشی ءَ تیار ایں۔