وفاقی بجٹ 2026-27: وزارت مواصلات ءُ نیشنل ہائی وے اتھارٹی ءِ واستہ کل ءَ 148.2 ارب کلدار ءَ چہ گیش ءِ کچ ءُ کساس ءِ  شور ءُ مشور

اسلام آباد۔12جون  (اے پی پی): وفاقی حکومت ءَ مالی سال 2026-2027 ءِ سالانہ بجٹ ءَ سرجمیں ملک ءَ مواصلات ءِ نیٹ ورک ءِ تہ ءَ گیشی ءُ شاہراہ آنی جوڑیشت ءُ مرمت ءِ واستہ وزارت مواصلات ءُ ایشی ءِ چیر دستی ءِ ادارگ آنی واستہ 148.2ارب کلدار ءِ کلیں بجٹ ءِ تخصیص ءِ شور ءُ مشور داتگ۔ اے زرّ آنی تہ ءَ غیر دیمروئی ءِ جاری ھرچ ءُ درچ ءُ وفاقی دیمروئی پروگرام ءِ چیر دستی ءَ دارگ بوتگیں دیمروئی زرّ ھوار اَنت۔ بجٹ دستاویز ءِ رد ءَ وزارت مواصلات ءِ روچ مرزی کاروائی، ملازم آنی پگار، پنشن ءُ دفتر ءِ نظام ءِ چلائینگ ءِ واستہ جاری (غیر دیمروئی) ھرچ ءُ درچ ءِ واستہ 43.2ارب کلدار ءِ ھرچ ءُ درچ ءِ واستہ ایر کنگ ءِ شور ءُ مشور پیش کنگ بوتگ۔ دومی نیمگ ءَ وفاقی پبلک سیکٹر ڈویلپمنٹ پروگرام ءِ چیر دستی ءَ دیمروئی منصوبگ آنی واستہ کل ءَ 105ارب کلدار ءِ زرّ ءِ ھرچ کنگ ءِ شور ءُ مشور دیگ بوتگ کہ ایشی ءِ تہ ءَ درملکی کمک ھوار اِنت، سرجمیں ملک ءَ شاہراہ، موٹروے ءُ سی پیک ءِ مغربی روٹ ءِ جوڑیشت ءُ گیشی ءِ واستہ۔ دستاویز ءِ رد ءَ اے دیمروئی فنڈز ءِ مزنیں بھرے نیشنل ہائی وے اتھارٹی ءِ چیر دستی ءَ جاری ءُ نوکیں کمیونیکیشن منصوبگ آنی سر ءَ ھرچ کنگ بیت تانکہ صنعتی ءُ پدمنتگیں دمگ آناں موٹروے ءُ ہائی وے ءِ وسیلگ ءَ مزنیں مارکیٹ آنی گوما ھمگرنچ کنگ بہ بیت۔ ایشی ءَ ابید وزارت ءِ چیر دستی ءَ ایندگر ماتحت ادارگ آنی ڈیجیٹلائزیشن ءُ آپریشنل گنجائش ءَ را گیش کنگ ءِ واستہ ھم فنڈز پجارینگ بوتگ۔