سید مصطفیٰ کمال تون ہیلتھ ریسرچ ایڈوائزری بورڈ انا ڈل انا وڑدہی، جان جوڑی نا بارواٹی پٹ وپول نا نظام ءِ سوگو جوڑ کننگ و ایلو گام گیج آتا جاچ ءِ ہلکر

اسلام آباد۔ 11 جون (اے پی پی ) بنجائی وزیر جان جوڑی سید مصطفیٰ کمال تون ہیلتھ ریسرچ ایڈوائزری بورڈ انا چیئرمین نا کماشی ٹی ڈل اوڑدہی کرے ہراٹی جنرل سیکرٹری و فنانس سیکرٹری ہیلتھ ریسرچ ایڈوائزری بورڈ ئسک ہم اوار ئسر۔ اوڑدہی ٹی ملک اٹی جان جوڑی نا بابت پٹ وپول نا نظام ءِ سوگو جوڑ کننگ، ناجوڑی تا گچین چاروکی نا مون آ دننگ و قومی کہول آ جان جوڑی نا ڈیٹا نا گچین کاریم اٹ اتنگ نا بابت گام گیج آتا جاچ ءِ ہلنگا۔ سید مصطفیٰ کمال پارے کہ حکومت قومی کہول آ جان جوڑی نا حساب وکتاب ءِ یکجا کرسا شاہدی تیا تالان پالیسی سازی ءِ سوگو جوڑ کننگ ءِ۔ اوپارے کہ ڈیجیٹل ہیلتھ ڈیٹا نا گچین کاریم اٹ اتنگ نا کمک اٹ الس ءِ گچین طبی آسراتی تا فراوانی ممکن مریک و جان جوڑی نا بشخ اٹی شفافیت و گچین گورننس ءِ مون آ دننگک۔ وزیرجان جوڑی نا پارت آ ناجوڑی تا قومی رجسٹری نا نظام نا چاروکی وقومی کہول آ جان جوڑی نا ڈیٹا نا گچین کاریم اٹ اتنگ کن نیشنل سٹیئرنگ کمیٹی اس جوڑ کننگانے۔ ترجمان وزارتِ قومی جان جوڑی نا رداٹ کمیٹی نا جوڑ کننگ نا باضابطہ نوٹیفکیشن جاری کننگانے۔ نوٹیفکیشن نا رداٹ 15 باسکی نیشنل سٹیئرنگ کمیٹی ٹی بنجائی و صوبائی جان جوڑی کمامدار، جان جوڑی چاہندار، پولکار، شونداری شریدار آتا نمائندہ، غٹ صوبہ غاتا ڈائریکٹر جنرلز ہیلتھ، اسلام آباد ، آزاد جموں و کشمیر وگلگت بلتستان نا جا ن جوڑی نا نمائندہ غاک ہم اوار مریرہ۔ داکان بیدس پاکستان ڈائبیٹیز رجسٹری و پاکستان کارڈیک رجسٹری نا بانی ڈائریکٹرآک ہم کمیٹی نا بشخ مریرہ۔