نائب مزن وزیر اسحاق ڈار ءَ کم ھرچ ءُ درچ کمیٹی ءِ دیوان ءِ سروکی کت، ھاسیں پیسلہ آنی منظوری

اسلام آباد۔10جون  (اے پی پی): نائب مزن وزیر ءُ دری کارانی وزیر سینیٹر محمد اسحاق ڈار ءَ چار شمبے ءِ روچ ءَ ایندھن ءِ رکھینگ ءُ گیشیں کفایت شعاری ءِ گامگیج آنی نگرانی ءُ عمل درآمد ءِ کمیٹی ءِ دیوان ءِ سروکی ءَ کت۔ نائب مزن وزیر کارگس ءِ نیمگ ءَ جاڑی بوتگیں بیان ءِ رد ءَ دیوان ءَ جتا جتائیں وزارت ءُ ڈویژن آنی نیمگ ءَ لہتیں کفایت شعاری ءِ گامگیج آنی تہ ءَ چہ استثنیٰ ءِ واستہ جم کتگیں درخواست آنی سر ءَ چار ءُ تپاسی کنگ بوتگ ءُ ایشی ءِ سر ءَ سفارش آناں گڈی رنگ دیگ بوتگ۔ دیوان ءَ اے ھم پیسلہ کنگ بوتگ کہ وزارت ءِ درئی کار ءُ کوئٹہ، کراچی، پشاور، گجرات ءُ لاہور ءَ آئی ءِ رابطہ کارگس آنی تہ ءَ قونصلر ویریفیکیشن سروسز لس مردمانی آسراتی ءِ واستہ جمعہ ءِ روچ ءَ برجاہ دارگ بنت۔ کمیٹی ءَ گیش سفارش کتگ کہ 13 جون 2026 ءَ ھلاس بوھگ ءِ ھاتر ءَ گیشیں کفایت شعاری ءِ گامگیج 30 جون 2026 ءَ تاں گیش کنگ بہ بنت۔دیوان ءَ اے ھم پیسلہ کنگ بوتگ کہ  شمبے ءُ یک شمبے آنی روچ ءَ شپ ءِ 10 بج ءَ تاں  اسٹورز ءِ کاروباری  جاہ پج بنت  ءُ   دیوان ءِ تہ ءَ پٹرولیم، موسمی مٹ ءُ بدل ءُ آئی ٹی اینڈ ٹیلی کام ءِ وفاقی وزیر، مزن وزیر ءِ ھزانگ ءِ ھوالگ ءَ ھاسیں کمکار، نائب مزن وزیر ءِ ھاسیں کمکار، کابینہ ءِ سیکرٹری، کامرس، پٹرولیم ءُ آئی ٹی اینڈ ٹیلی کام ءِ وزارت، دری کارانی وزارت ءُ ایندگر آں بھر زوری کت۔