سی پیک ءِ دومی بھر، پاکستان ءِ معیشت، ٹیکنالوجی ءُ دمگی رابطہ ءِ نوکیں دور ءِ بندات

اسلام آباد۔10جون  (اے پی پی): چین ءُ پاکستان اقتصادی راہداری ءِ دومی بھر نوکیں جزم ءُ وژن ءِ گوما بندات کنگ بوھگ ءَ انت، ایشی ءِ چیر دستی ءَ پاکستان ءَ را یک نوکیں، پائیدار ءُ برآمدات ءِ سرا مبنی معیشت ءِ تہ ءَ بدل کنگ ءِ واستہ پنچ مزنیں راہداری آنی سر ءَ مشتمل یک سرجمیں حکمت عملی ءِ منوگری کنگ بوتگ۔ سی پیک دومی بھر ءِ چیر دستی ءَ انوویشن راہداری ءَ چہ پاکستان ءَ را آرٹیفیشل انٹیلی جنس، نوکیں ٹیکنالوجی ءُ ڈیجیٹل معیشت ءِ لوٹ آنی گوما یکجا کنگ ءَ ٹیکنالوجی ءُ انوویشن ءِ بنیات ءَ اقتصادی مرکز جوڑ کنگ ءَ کمک رسیت۔ ھمے رنگ ءَ گرین راہداری موسمی بدلی ءِ چیلنج آنی گیواری، قابل تجدید توانائی ءِ دیمروئی، چاگردی رکھینگ ءُ پائیدار دیمروئی ءِ مول ءُ مراد آنی سرجمی ءِ تہ ءَ ھاسیں کرد پیلو کنت۔ اے گامگیج ءَ چہ پاکستان ءِ چاگردی لچک ءُ توانائی ءِ وت مہ وتی ءَ را گیش مھکم کنگ بیت۔ سی پیک ءِ دومی بھر ءَ یک پچیں راہداری ءِ تصور ھم ھوار اِنت کہ ایشی ءِ وسیلگ ءَ منصوبگ ءِ پائدگ دمگ ءِ ایندگر ملک آنی تہ ءَ سر کنگ بنت، ایشی ءَ چہ دمگی کمک، رابطہ، تجارتی کار ءُ کرد ءُ یکجائی وشھالی ءِ وژن ءِ سرجمی ءَ کمک رسیت۔ سی پیک ءِ دومی بھر ءِ مفاہمت نامہ ءِ سر ءَ دستخط کنگ ءَ گوں پاکستان ءُ چین ءَ اے اسٹریٹجک شریکداری ءَ را گیش وسعت دیگ ءِ واستہ وتی جزم ءِ پدا پدر کتگ۔ منصوبگ ءِ چیر دستی ءَ پنچ راہداری آنی وسیلگ ءَ پاکستان ءِ پیداوار ءُ برآمد ءِ گنجائش ءَ را گیش کنگ بیت وھدیکہ اقتصادی دیمروئی، روزگار ءِ موہ، السی گہبود، نوآبادیاتی ءُ ٹیکنالوجی، چاگردی رکھینگ ءُ دمگی رابطہ آناں دیمروئی دیگ بیت۔ واکدارانی رد ءَ سی پیک دومی بھر ءِ چیر دستی ءَ پدمنتگیں ءُ کم دیمروئی کتگیں دمگ آنی سر ءَ ھاسیں دلگوشی دیگ بیت تانکہ نوکیں روزگار ءِ موہ پیداک بہ بنت ءُ دیمروئی ءِ میوہ عام مردم ءَ سر بہ بنت۔ اے پڑ پاکستان ءِ دراجیں مدتی اقتصادی دیمروئی، صنعتی توسیع ءُ دمگی اقتصادی یکوئی ءِ ھاتر ءَ یک ھاسیں سنگ میل ءِ ثابت بیت۔