اسلام آباد۔9جون (اے پی پی): مزن وزیر محمد شہباز شریف ءَ گوشت کہ پاکستان ءَ گلوبل فنڈ ءِ گوما وتی شریکداری ءَ را ارزشت دنت وھدیکہ دیمروئی کنوکیں دگنیا ءَ السی جان سلامتی ءَ را گہتر کنگ ءِ واستہ گلوبل فنڈ ءِ نامداریں کرد ءُ کمک ءَ را ساڑات کنت۔ آئی ءَ گوں گلوبل فنڈ ءِ ڈل ءَ گپ ءُ تران کنگ ءَ ات کہ آئی ءَ سئے شمبے ءِ …
پاکستان ءَ گلوبل فنڈ ءِ گوما وتی شریکداری ءَ را ارزشت داتگ، مزن وزیر شہباز شریف ءَ گوں گلوبل فنڈ ءِ ڈل ءَ گپ ءُ تران
گیشتریں ھال
اسلام آباد۔9جون (اے پی پی): مزن وزیر محمد شہباز شریف ءَ گوشت کہ پاکستان ءَ گلوبل فنڈ ءِ گوما وتی شریکداری ءَ را ارزشت دنت وھدیکہ دیمروئی کنوکیں دگنیا ءَ السی جان سلامتی ءَ را گہتر کنگ ءِ واستہ گلوبل فنڈ ءِ نامداریں کرد ءُ کمک ءَ را ساڑات کنت۔ آئی ءَ گوں گلوبل فنڈ ءِ ڈل ءَ گپ ءُ تران کنگ ءَ ات کہ آئی ءَ سئے شمبے ءِ روچ ءَ ادا گند ءُ نند کتگ ات۔ ڈل ءِ سروکی ءَ گلوبل فنڈ ءِ گرانٹ مینجمنٹ ڈویژن ءِ مارک ایڈنگٹن ءَ کتگ ات ءُ دگہ باسک آنی تہ ءَ سینئر پورٹ فولیو منیجر عزیزکن گاویریا ءُ ڈپٹی جنرل کونسل نتاشا ہفنیک ھوار اتنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ ڈل ءَ را پاکستان ءَ سر بوھگ ءِ پد ءَ وش آتک کتگ۔ آئی ءَ گوشت کہ پاکستان گلوبل فنڈ ءِ گوما وتی شریکداری ءَ را ارزشت دنت ءُ دیمروئی کنوکیں دگنیا ءَ السی جان سلامتی ءَ را گہتر کنگ ءِ واستہ گلوبل فنڈ ءِ نامداریں کرد ءُ کمک ءَ را ساڑات کنت۔ مزن وزیر ءَ گوشت کہ پاکستان ءَ جان سلامتی ءِ نظام ءَ را گہتر کنگ ءِ واستہ گلوبل فنڈ پاکستان ءِ سک باز ارزشتی شریک انت، حکومت ملک ءَ چہ ٹی بی، ایچ آئی وی ءُ ملیریا ءِ شنگ ءُ تالان ءَ را ھلاس کنگ ءِ واستہ جزمیگ انت ءُ اے پڑ ءَ سرجمیں کوشست کنگ ءَ انت۔ مزن وزیر ءَ ڈل ءَ گوں گشتانک دیان ءَ گوشت کہ شمئے شریداری پاکستان ءَ چہ ایچ آئی وی، ٹی بی ءُ ملیریا ءِ ھلاسی ءِ واستہ مئے کوشست آں گیش مھکم کنگ ءَ انت۔ مزن وزیر ءَ حکومت پاکستان ءُ گلوبل فنڈ ءِ نیام ءَ ایچ آئی وی وائرس ءِ گر ءُ دار ءِ ھوالگ ءَ یکجائی کارگس ءِ جوڑ کنگ ءِ پنت ءُ شون کت۔ وزارت ءِ راجی جان سلامتی ءِ کارندہ آں پاکستان ءَ ٹی بی، ایچ آئی وی ءُ ملیریا ءِ گر ءُ دار ءِ ھوالگ ءَ حکومتی کوشست آنی بابت ءَ ڈل ءَ را سرپد کت۔ ڈل ءَ پاکستان ءِ حکومت ءِ شگر ءُ منت گپت کہ آئی ءَ پاکستان ءَ ایشی ءِ میزبانی کتگ۔ ڈل ءَ ٹی بی، ایچ آئی وی ءُ ملیریا ءِ ھلاسی ءِ واستہ پاکستان ءِ حکومت ءِ نیمگ ءَ چست کتگیں گامگیج آناں ساڑات ءُ اے نادراھیانی ھلاسی ءِ واستہ پاکستان ءِ گوما شریکی ءِ یک رندے پدا گوشت۔ گند ءُ نند ءِ تہ ءَ وفاقی وزیر ءِ منصوبگ بندی احسن اقبال، راجی جان سلامتی ءِ وفاقی وزیر سید مصطفیٰ کمال، وفاقی وزیر ءِ اھوالکاری عطا اللہ تارڑ، مزن وزیر ءِ پولیو ءِ گر ءُ دار ءِ فوکل پرسن عائشہ رضا فاروق ءُ سیادی داروکیں مزنیں سرکاری کارندہ ھم ھوار اتنت۔
