جتا جتائیں تہذیب، دود ءُ ربیدگ ءُ راجانی نیام ءَ یکے دومی ءِ احترام، برداشت ءُ تعمیری سیادی ءِ دیمروئی پہ جھان ءِ امن، مھکم ءُ یکجاھیں دیمروئی ءَ المی  اِنت، سردار ایاز صادق

اسلام آباد۔9جون  (اے پی پی): راجی اسمبلی ءِ اسپیکر سردار ایاز صادق ءَ گوشت کہ جھان ءِ امن، برجائی ءُ یکجائی دیمروئی ءِ واستہ جتا جتائیں تہذیب، دود ءُ ربیدگ ءُ راج آنی نیام ءَ وت مہ وتی احترام، برداشت ءُ جوڑیشت ءِ دیمروئی المی اِنت۔ انوگیں جھان ءِ جاور ھال ءِ تہ ءَ اے وھد ءِ لوٹ اِنت کہ اختلافات ءُ جیڑھانی گیش ءُ گیوار ءِ ھاترا دیم پہ دیم بوھگ ءِ بدل ءَ گپ ءُ تران، سفارتکاری ءُ یکے دومی ءِ کمک ءِ راہ ءَ بہ زیریں۔ اے ھیالانی درشانی آئی ءَ تہذیب آنی نیام ءَ گپ ءُ تران ءِ میاں اوستمانی روچ ءِ موہ ءَ وتی کلوہ ءِ تہ ءَ کت کہ سرجمیں دگنیا ءَ ھمک سال 10 جون ءَ برجم دارگ بیت۔ اسپیکر سردار ایاز صادق ءَ گوشت کہ پاکستان جھان ءِ تک ءَ امن، برداشت، بین المذاہب یکوئی ءُ یکوئی ءِ شرپ ءَ را دیم ءَ برگ ءِ واستہ مدام پیشگام بوتگ۔ آئی ءَ گوشت کہ میاں اوستمانی براتی ءِ دیم ءَ اوشتاتگیں سیکورٹی، اقتصادی ءُ چاگردی جیڈھ آنی جوانیں ءُ پائیدار گیواری یکجائی کوشست، پارلیمانی سفارتکاری ءُ جوڑیشت ءِ وسیلگ ءَ چہ ممکن انت۔ اسپیکر سردار ایاز صادق ءَ گیش گوشت کہ پارلیمنٹ الس ءِ نمائندہ آواز انت ءُ وت مہ وتی یکوئی، شرپ ءُ دوستی ءِ دیمروئی ءِ واستہ کلیدی کرد پیلو کت کن انت۔ آئی ءَ گوشت کہ پاکستان ءِ راجی اسمبلی ءَ جوڑ بوتگیں 103پارلیمانی دوستی گروپ سرجمیں دگنیا ءِ پارلیمنٹ آنی گوما رابطہ آناں دیمروئی دیگ، یکے دومی ءِ لیکہ آناں شریں رنگ ءَ سرپد کنگ، وت مہ وتی بھروسہ ءُ احترام ءَ را مھکم کنگ ءُ یکجائی دیمروئی ءُ برجمیں امن ءِ ھاترا جوانیں کرد پیلو کنگ ءَ اَنت۔ اسپیکر سردار ایاز صادق ءَ گوشت کہ میاں اوستمانی تک ءَ انوگیں کش ءُ چیل ءِ وھد ءَ پاکستان یک زمہ وار ءُ امن دوستیں ریاست ءِ بستار ءَ رودراتک ءُ مغرب ءِ نیام ءَ گپ ءُ تران ءُ مفاہمت ءِ دیمروئی ءَ جوانیں ءُ سرگرمیں کرد پیلو کتگ۔ آئی ءَ گوشت کہ میاں اوستمانی تک ءَ گپ ءُ تران ءِ دیمروئی ءِ واستہ پاکستان ءِ کوشست آناں ساڑاھگ بوتگ۔ اسپیکر سردار ایاز صادق ءَ گوشت کہ پاک بھارت ءِ نیام ءَ کش ءُ چیل ءِ وھد ءَ ھم پاکستان ءَ پہلگام ءِ دروگیں پرچم آپریشن ءِ ھوالگ ءَ پاکستان ءِ ھلاپ ءَ بھارت ءِ دروگیں پروپیگنڈا ءِ سر ءَ شفاف، غیر جانبدار ءُ یکجائی پٹ ءُ پول ءِ پیشکش کنان ءَ ذمہ واریں رویہ ءِ درشانی کتگ ءُ گپ ءُ تران ءِ زورگ ءُ سفارتی چینل ءِ گیواری ءِ سر ءَ زور پر داتگ۔ آئی ءَ گوشت کہ پاکستان ءَ ھمک موہ ءِ سر ءَ جیڈھ آناں پرامیں رنگ ءَ گیواری، دمگی برجائی ءُ وت مہ وتی یکوئی ءِ دیمروئی ءَ را اولی ترجی داتگ۔ اسپیکر راجی اسمبلی ءَ گوشت کہ مزن وزیر محمد شہباز شریف ءِ زانتکاریں سروکی ءُ چیف آف ڈیفنس فورسز فیلڈ مارشل سید عاصم منیر ءِ دور اندیشیں حکمت عملی ءَ پاکستان ءِ جہانی تک ءَ پوزیشن ءَ را جوانیں رنگ ءَ پدر کنگ ءَ مزنیں کرد پیلو کتگ، ایشی ءَ را سرجمیں دگنیا من اِتگ۔ آئی ءَ درستیں بقایا جیڈھ آنی پرامنیں رنگ ءَ گیواری ءِ ضلورت ءِ سر ءَ زور پر دیان ءَ گوشت کہ جیڈھ آناں گیواری ایوک ءَ گپ ءُ تران، یکے دومی ءِ ھک آناں سرپدی ءُ منگ، حاکمیت ءِ احترام ءُ وت واجہی ءِ ھک ءِ منگ ءِ وسیلگ ءَ ممکن اِنت۔ آئی ءَ بھارت ءِ سر ءَ ناجائزیں قبضہ ءِ چیر دستی ءَ جموں ءُ کشمیر ءُ فلسطین ءِ جیڈھ آناں پرامن گیواری ءِ ضلورت ءِ سر ءَ زور پر دیان ءَ اے جیڈھ آنی گیواری ءِ واستہ ناگزیر ءِ رنگ ءَ گپ ءُ تران، سفارتکاری ءُ اقوام متحدہ ءِ ھمگرنچیں قرارداد آنی سر ءَ عمل کنگ ءِ لوٹ کتگ۔ آئی ءَ گوشت کہ مقبوضہ جموں ءُ کشمیر ءَ بھارتی اُرد ءُ فلسطین ءَ اسرائیل ءِ قبضہ گیریں اُرد ءِ نیمگ ءَ بے گناہ ءُ مظلومیں شہری آنی سر ءَ کنگ بوھوکیں ظلم ءُ زوراکی سکیں جیڈھ ءِ سبب انت۔ آئی ءَ کشمیری ءُ فلسطینی الس ءِ سر ءَ بوھوکیں ظلم ءُ زوراکی آنی ھلاسی ءِ واستہ میاں اوستمانی براتی ءِ وتی سرگرمیں کرد ءَ پیلو کنگ ءِ ضلورت ءِ سر ءَ زور پر دات۔ اسپیکر سردار ایاز صادق ءَ گوشت کہ بھارت ءِ نیمگ ءَ سندھ ءِ آپانی معاہدے ءِ یک نیمگی معطل کنگ میاں اوستمانی کانود ءُ معاہدے ءِ ذمہ واری آنی ھاسیں ھلاپ ورزی اِنت۔ آئی ءَ گوشت کہ سندھ ءِ آپانی معاہدہ ءِ احترام کنگ دمگی امن، برجائی ءُ وت مہ وتی یکوئی ءِ دیمروئی ءِ واستہ المی انت۔ اسپیکر قومی اسمبلی ءَ گوشت کہ تہذیب، راج ءُ ریاست آنی نیام ءَ گپ ءُ تران ءُ یکوئی ءِ پجاری نہ ایوک ءَ یکوئی ءِ دیمروئی ءِ وسیلگ اِنت بلکینگ ءَ جھان ءِ جیڈھ آناں ایمنی ءِ رنگ ءَ گیش ءُ گیوار کنگ، بھروسہ ءِ جوڑ کنگ ءُ پائیداریں دیمروئی ءِ ھاترا موثریں راہ اِنت۔ آئی ءَ وتی جزم ءِ یک رندے پدا گوشت کہ پاکستان جھان ءِ امن، میاں اوستمانی کمک ءُ جوڑیشت ءِ سفارتکاری ءِ دیمروئی ءِ واستہ جوانیں کرد ءَ را برجاہ دار ایت۔ اے موہ ءِ سر ءَ راجی اسمبلی ءِ ڈپٹی اسپیکر سید غلام مصطفیٰ شاہ ءَ وتی کلوہ ءِ تہ ءَ گوشت کہ جتا جتائیں تہذیب، مذہب ءُ دود ءُ ربیدگ آنی نیام ءَ رابطہ، گپ ءُ تران ءُ وت مہ وتی شرپ ءُ شرپ ءِ سبب ءَ نفرت، انتہا پسندی ءُ تعصب ءِ ہلاس کنگ ءَ کلیدی کرد انت۔ آئی ءَ گوشت کہ یک پرامن، مھکمیں ءُ وشھالیں دگنیا ءِ برجائی ءِ واستہ میاں اوستمانی براتی ءَ را وت مہ وتی شرپ ءُ شرپ، برابری ءُ یکجائی نپ آنی بنیاد ءَ سیادی ءَ را گیش مھکم کنگ ءِ ضلورت انت۔